LÚKAS 15 - KARÚK-PËRIM KAWALU Nouveau Testament

Unkaanel u niam wi

¹ Bayep bëluk-uraasa, ni bajuban, bë tsëp bëlieng ee wok Yeesu, pa pëcikëndënul.

² A Bafariseu, ni bapican-ulua ci tsi pëŋëmŋëm koo ja: “Namëntsi awelan bajuban, a nu riala ni bukul.”

³ Din, a Yeesu tib bukul përim pi, aja:

⁴ “Naom ñaan tsi ind ka ka un ngënkaanel useent, a ulon tsi ngul niam, dits na ruk ngënkaanel ngëntaaja këwas ngun ni ulon ni ngënkaanel këwas ni ulon, tsi ulaalats, në ya pëtsas u niam wunk, aa në wini wul?

⁵ Na yaa na wini wul, në tsui wul tsi icakul, në ci tsi ulílan.

⁶ Nu baandi kato, në rui ifetsarul ni bacënul ka jukëlën, në ja bukul: ‘Nda lílani ni nji, par ma wini unkaanel nji un do wi niam.’

⁷ Man ja ind, unk di ulílan uwiak kë ci run di batsi, undo najuban naloole na yaari ibats, apean ulílan bamabal ngëntaaja këwas ngun ni ulon ni bamabal këwas ni nalon ban fierats biki kayaar-ibats.

Uncaam-baceenc u niam wi

⁸ Oo naom ŋaats ka ka un untaaja Drakëma, uci patakan pëloole niam, a rits na taban unkaandia, në wet kato, në tsas pul uwar aa në tsënkëna ka wini.

⁹ Na yaa na wini pul, në rui ifetsarul bakaats, ni bacënul bakaats, ka jukëlën, në ja bukul: ‘Nda lílani ni nji, par ma wini patakan nji pan do pi niam.’

¹⁰ Man ja ind, unk di ulílan uwiak ci run tsi ngëwaanju Nasien-batsi, undo najuban naloole na yaari ibats.”

Abuk nalon niints aniam, a nee kaki

¹¹ A Yeesu ja kak: “Aka nalon niints, nan kai babukul batëb, bayënts;

¹² a naties ja asinul: ‘Paapa, wëlin kafa nji ki bëka, ki bërukanda.’ Na fa bukul bëkaul.

¹³ Jonats, a naties nun waap kafaul bëlieng, na pën atsëp ucaak ulawanuël, nee cok rul bëkaul tsi ngëko ngi ka niaman ngi.

¹⁴ Bi na cok bi bul aba bëlieng, a ubon yëri tsi ucaak umënts wun, na kur pëci tsi bëranj.

¹⁵ Na tsëp pëleempar nalon tsi babuk ucaak umënts wun; a namënts un tsuul pëya pëyafan ngënkëmbe di bëreeŋul.

¹⁶ A na rí pëjaa acuman pëpësul ni bariala ngënkëmbe, maa ñaawëlatsul nin ko.

¹⁷ Na ru yaar ibats, na ja: ‘Baleemp asin nji bë ci um ban ka biki bariala, a nji a ndu n cats tsi ni ubon!

¹⁸ Mán natsa n tsëp di asin nji, kee jaul: Paapa, man juban tsi uleka batsi, ni tsi bërunu.

¹⁹ In katse n tsënkan pëjaa man ci abuku. Tsuin pi nalon tsi baleempu.’

²⁰ A na natsa tsëp di asinul. Bi na wama bi lawani, asinul winul, na yëkarul ipës, na túkarul, a na yërandul di katsuts, awúnkëraul.

²¹ A abukul jaul: ‘Paapa, man juban tsi uleka batsi, ni tsi bërunu. In katse n tsënkan pëjaa man ci abuku…’

²² Maa, asinul ja baleemparul: ‘Nda tsiji ucar kaŋí-bëtiem kan pe kunk pëwara, nda tiemaniul, nda tsuunul kanel tsi pëkuanj, ni iraala tsi itsiim.

²³ Nda tsiji ubay-ukas uniiral wun, nda fiŋan wul; nda ju ngë riala, nja ka lílan.

²⁴ Par abuk nji ni, aro cats, a nul kaki ink nayësal; aro niam, a nul wina ink.’ Din a ba kur ulílan.

²⁵ Uwal umënts wun, bajanul ro ci di bëreeŋ. Bi na pëni bi pëwitsee a nu wokani kato, a na te pëlas ni ukay.

²⁶ Na rui nalon tsi baleemp, na yeparul ko un ci wi.

²⁷ A na yankul, ajaul: ‘Aci atsau witsee un, a asinu fiŋ ubay-ukas uniiral wun, par akaki tsi nul nayësal.’

²⁸ Din bajanul riabats, a ŋalats pëniaj bametsu. Asinul pëni ee ka buaraul na niaji.

²⁹ Maa na yank asinul, aja: ‘Nji, ngëwaanu bëpinaats a ndu n leemparu pi naluëk, te nji n pokats përo ko wi m tsu wi yaas. Maa m wëlatsin ŋal upi uties yaas, n doona ufesta ni ifetsar nji.

³⁰ Maa abuku baandi ink, nul nan coki bëkau ni batúk-ufuts, a m fiŋarul ubay-ukas uníiral wun.’

³¹ A asinul jaul: ‘Napats, m ci ni nji ngënu bëlieng; a ko wi n ka wi bëlieng, aci wíicu.

³² Maa ngë ka ngë roon nja ka lílan, nja ka juc ni ulílan. Par atsau ni, aro cäts, a nul kaki ink nayësal; aro niam, a nul wina ink.’”