LÚKAS 14 - KARÚK-PËRIM KAWALU Nouveau Testament

Yeesu yësan nalon ñaan na wúri uliaf

¹ Tsi Unu-pënaakësa, a Yeesu ya bariala di kato nalon nawiak tsi Bafariseu; bañaan ci tsi pëjutsul.

² Tsi bërunul, aka nalon ñaan na wúri uliaf.

³ Yeesu yepar bajukan-ulua, ni Bafariseu, aja bukul: “Ulua, aniiran ñaan pëyësanaa tsi Unu-pënaakësa, oo niiraants-a?”

⁴ Maa, ba yëŋandar. Din, a Yeesu jej namoj ayësan, a na wëtanul na tsëp.

⁵ A nu ba, na ja bukul: “Naom tsi ind, uci abukul yër pëlik, oo uyëtul, tsi Unu-pënaakësa, na rits toti wul uyëk umënts wun?”

⁶ Maa, bë yëlaants pëyankës irim imënts yan.

Ñaan nan tiesëtsani beenul

⁷ A Yeesu kë win banduee biki ci tsi përat itsoari urispiitu, na tib bukul përim, aja:

⁸ “Aja m duura ufesta bënim, cats ya kii tsoar tsi pëtsoari urispiitu. Par ulon unk, nan peui përispitaara ka bof tsi karua.

⁹ Din, nandui ind unk, ind batëb, ka bi nii jau: ‘Natsaanul tsi pëtsoari.’ Din, kë tsëp ni mkaw kee tsoar tsi pëtsoari pan dispitaara punk ko uties.

¹⁰ Maa, aja m duee, kë bi kee tsoar tsi pëtsoari pan dispitaara punk ko uties; pa ubaandi nan duiu unk, në jau: ‘Bëfetsar! Kíkaraan pan pe punk.’ Din, u ci ko wi kan dëmbanu wi, tsi bërun bañaan bëlieng ban tsoar biki bariala ni wi.

¹¹ Par, nan diangi beenul, në welanaa; na welani beenul, në riangaa.”

¹² A Yeesu ja buts nanduiul unk: “Aja kë juŋar bañaan uwaay, oo ufëri, cats rui ifetsaru, nin ban tsaar biki ni wi, nin bayëtsu, nin barëmb ban ci biki bacënu, pa bukul buts përits ruiu, din u ci bëluku.

¹³ Maa, aja ku ruur bañaan ufesta, u ci baranj, ni baka-basal, ni bajënk, ni bakuel;

¹⁴ din kë naak. Par, bë kaats ko wi bu kii lukënu wi. Maa kii lukaa, unatsee bamabal di pëcäts.”

Yeesu tib përim, anaamanaan ufesta uwiak

¹⁵ Nalon tsi ban tsoar biki bariala, bi na te bi ko wan, a na ja Yeesu: “Anaak, ni kan dialee di pësien Nasien-batsi!”

¹⁶ Din a Yeesu jaul: “Aka nalon ñaan nandoi ufesta uwiak, a na rui bañaan bacumal.

¹⁷ Uband uler ufesta, na yël naleempul, na ya nii ja banduee biki: ‘Nda bili! Par ngëko yecisa ba.’

¹⁸ Maa, ba kur bëlieng pëlaabësar, naloole-naloole. Nacak ajaul: ‘Man weel bëreeŋ, a n ka pëya pëteen bul. Man ñaanu këñaanu, jampësain!’

¹⁹ A nalonja: ‘Man weel këper kañan ki ngëyët-ngëkas; mán tsëp pëteenaman ngul. Man ñaanu këñaanu, jampësain!’

²⁰ Nalon kak ja: ‘Man du yank bënim, wul ka wun in di ka n yëlan pëya.’

²¹ Naleemp witsa ee leents ko wan ajugul. Din ajug kato riabats, na ja naleemp: ‘Tsëpan ucar di ngëmbeera ni di iga përaasa, kë tsiji baranj tsi, ni baka-basal, ni bakuel, ni bajënk.’

²² Naleemp bi a na ja: ‘Ajug! Ko wi m ja wi u rola, arolaa, a pëlas wama ci.’

²³ Din, ajug ja naleemp: ‘Tsëpan di iga ni di ilël, kë forsaar bañaan ba niaji, pa kato nji pëcum.

²⁴ Par, ma n ja ind: Nin naloole tsi bayënts ban do bukunk ruee, di ka teenaman përe ufesta nji.’”

Pëci nafets Yeesu m ka pëwëtan ngëko bëlieng

²⁵ Bi indënd bañaan iwiak repa bi bëga ni Yeesu, a na witsësa, na ja bukul:

²⁶ “Uci ñaan kë bi tsi nji a ñaasats asinul, ni aninul, ni aarul, ni upätsul, ni ban tsaar biki ni nul, bayënts, ni bakaats, ni ŋal ubiiraul bërierul, di ka yëlan pëci nafetsin.

²⁷ A na lapatsi kruusul puu fetsin, di ka yëlan pëci nafetsin.

²⁸ Par, naom tsi ind ka ŋal un pëniew kato-mtaa, a rits na cakës bërun na tsoar, në jaak pëme ko wi nu pënan wi pëleempëna kul, në teen ne ka yël ank bëro, pëniew kul na ba.

²⁹ Ucits ank, a na niew ujuundi, a yëlaants pëba pëniew kato, din ba win biki kul bëlieng ka kur përiatul

³⁰ koo ja: ‘Ñaani kur pëniew, a yëlaants pëba!’

³¹ Oo naom nasien ka natsara un pëkaman nalon nasien, a rits na cakës bërun na tsoar, në jaak pëme ne nul ni bañaanul ngëmiil untaaja (10.000), ayëlan ank pëkaman ni kan bii pëkamanul ni bañaan ngëmiil ngëntaaja ngëtëb (12.000)?

³² Ucits ank ba, bi nacints nun wama bunk alawani, në yël banatsarul di nul, bee ba ro pëfac.

³³ Unk buts, tsi ind, ñaan na wëtanatsi ba ngiicul bëlieng, di ka yëlan pëci nafetsin.

Pënam pan katse pi caab

³⁴ Pënam, awara; maa uci pa katse caab, we ka kakanaan wël pul pa caab?

³⁵ Katats pa utsia, nin pa ugijan; ka gutsa di utsand. Nan kai ibats iteeni, na teen.”