LÚKAS 13 - KARÚK-PËRIM KAWALU Nouveau Testament

Pëyaar ibats, oo pëniam

¹ Tsi uwal umënts wun, a balon bi ee leents Yeesu uleka bañaan Galileeya, biki Pilaatus gëbulan biki pëñaak bukul ni pi ijakan bukul.

² A Yeesu yank bukul, aja: “Nda ja ne bagalileeya bamënts biki, bi ba rola bank ko wan, bë pe këpe bagalileeya bacints bukun pëci bajuban-a?

³ Man ja ind, nin a! Maa uci nda yaarats ba ibats, ndë niam bëlieng, bi ba niam bunk.

⁴ Oo nda ja ne bañaan untaaja bukun ni këwas, biki kato-mtaa Silowe yërëna bukunk afiŋ, bë pe këpe bañaan Jerusalem bëlieng pëka ulaci-a?

⁵ Man ja ind, nin a! Maa uci nda yaarats ba ibats, ndë niam bëlieng, bi ba niam bunk.”

Yeesu tib përim, anaamanaan bëfíigu ban bukats bi

⁶ Din, na tib përim pi, aja: “Aka nalon ñaan, nan kai bëfíigu ba yíira bi tsi uwoortaul. Na bi pëtsas mbuk tsi bul, maa tsënkatsi ko.

⁷ Din, na ja naleemp tsi uwoorta: ‘Wul ro ink ngëwaanu ngëwaants, a ndu n bi pëtsas mbuk tsi bëfíigu bi, maa nji n tsënkatsi ko. Këntan bul! We ka wun ba wama laaŋara tsëko, te kaats bëkat?’

⁸ Maa, naleemp tsi uwoorta yankul aja: ‘Ajug! Wëtan bul piekal kak. Mán jëp tsëko n fayësan bul, ka tsu ugijan;

⁹ uci bee buk, u wara. Ucits ank, kë tsu bul ba kënta.’”

Tsi Unu-pënaakësa, Yeesu yësan nalon ŋaats nan kai basal.

¹⁰ Tsi Unu-pënaakësa, a Yeesu ci tsi bëjukan di kalon tsi ito-ijúki.

¹¹ A u ka rul nalon ŋaats, ni ucaay tsui basal, ngëwaanu untaaja ni këwas. Aci naŋëpal nan, yëlaants pënats ucol yaas.

¹² A Yeesu kë winul, na ruiul, a na jaul: “Ŋaatsi, m pënana basalu.”

¹³ Bi nu ja bi përim pan, na paf iñanul tsi ŋaats. Ucar umënts wun, a ŋaats nats ucol, a nuu bëndan Nasien-batsi.

¹⁴ Maa nawiak kato-kajúki riabats, undo bi Yeesu yësan bi ñaan tsi Unu-pënaakësa. Ariabats, a na ja kandënd bañaan: “Ngënu uleemp aci paaj; nda bili tsi ngënu ngëmënts ngun ndë yësana, di ka ci tsi Unu-pënaakësa.”

¹⁵ Ajug yankul, ajaul: “Nda ci banguungu! Kara ñaan tsi ind, di ka paci uyët oo ubúuru di pëtan tsi Unu-pënaakësa na tsëpand wul bëraanan-a?

¹⁶ A ŋaatsi, nul nan ci abuk Abraam, a Useetaani tanul ngëwaanu untaaja ni këwas, kaats na roon në pacaa tsi Unu-pënaakësa, tsi pëtana pi na tanaa pink-a?”

¹⁷ Bi Yeesu ja bi ngëmënts ngan, babërul bëlieng kawa mak. Maa kandënd bañaan ci tsi ulílan, undo ngëko bëlieng ngi përëmb ngi na ro ngi ka ro.

Yeesu tib përim, anaamanaan pëbuk bëmutaar

¹⁸ A Yeesu yepar, aja: “Pësien Nasien-batsi, anaam ni we i? We wi ndu n naamanaan wun pul?

¹⁹ Anaam ni pëbuk bëmutaar, pi ñaan jej pi a na saal tsi uwoortaul, a pee mayi, pa wiaka aruka ci bëko; a ngëko-ngëyits cangan tsi ina bul.”

Yeesu tib përim, anaamanaan bëko-bëlëntsantsaani

²⁰ Na yepar kak, aja: “We wi ndu n naamanaan wun pësien Nasien-batsi?

²¹ Pësien Nasien-batsi anaam pi bëko-bëlëntsantsaani, bi ŋaats jej bi abofëlan ni ifar, i niiba yi iniibi iwaants, aa i lëntsantsan bëlieng.”

Pëlëman pan kats pi

²² A Yeesu kë tsëp Jerusalem, na yaana iraasa ni ngëntab, nuu jukan bañaan.

²³ A nalon yeparul aja: “Ajug! Biki kan buër biki, bë ci ko uties-a?” Yeesu ja bukul:

²⁴ “Nda kamandari pëniajëna pëlëman pan kats punk. Par ma n ja ind, bañaan bacumal ka këmand pëniaj, maa bë ri ka yëlan.

²⁵ Uband ajug kato pënatsa na ric pëlëman, din ndë ci di utsand, ndë jot pëkoŋkoŋan pëlëman, nduu ja: ‘Ajug! Waants wund.’ Maa në ja ind: ‘Nji n meets tsi nda pënë-ni tsi.’

²⁶ Din, ndë jot pëja: ‘Wund ariala a wund raan tsi bërunu; a m jukan di ngëmbeera wund.’

²⁷ Maa, në ja ind kak: ‘Nji n meets tsi nda pënë-ni tsi. Nda lawanin, ind bëlieng baro-ngëko-kawaraatsa.’

²⁸ Tsul tsi irug kë ci tsun, ni kañaam irumaj, uwin ind Abraam ni Isaak ni Jakob, ni bayëlia bëlieng di pësien Nasien-batsi; maa ind, ndë gutsa di utsand.

²⁹ Bañaan ka pëni ujara umay-unu, ni ujara uyër-unu, ni ujara ruets-ucaak, ni ujara utsia-ucaak, bu kee tsoar bariala di pësien Nasien-batsi.

³⁰ Unk, aka batuami, biki keen ci biki bacak; a u ka bacak, biki keen ci biki batuami.”

Bëŋal bi Yeesu ŋal bi Jerusalem

³¹ Tsi uwal umënts wun, aka Bafariseu ban bi biki ee ja Yeesu: “Kíkaan tsi, tsëpan, par Eroodis aŋal pëfiŋu.”

³² Na yank bukul, aja: “Nda tsëpan ndii ja ucuts umënts wun, nji ka nduak ink ngëcaay nga pën di bañaan, a ndu n yësan bañaan, ntsari ni faan; unu uwaajantsan, ka ba ko wi n du n do wi.

³³ Man ka pëmob tsi përepa bëga, ntsari, ni faan, ni tsankotse. Par, nayëlia pëcäts di utsand Jerusalem, yëlanats pëci.

³⁴ Jerusalem, Jerusalem, wi ni kan fiŋi bayëlia, a kë tap ba yëlee biki tsi wi ni ilaak aa bu ka cäts! Ngëyaas um, ngnja ngun n doon ka ŋal pëjukëlën upätsu, pi uguk kë jukëlën pi kabuk wul tsi utsia ibaakëla; maa nda ŋalats!

³⁵ Nda teenan-e! Kato ind abërara ind. Man ja ind: Nda ri ka winin kak, te ndë yaa ndë ja: Ni kan bi ink tsi katim Ajug, a jara ngëwar!”