LÚKAS 12 - KARÚK-PËRIM KAWALU Nouveau Testament

Përuk ibats tsi banguungu

¹ Bi kandënd ngëmiil bañaan júk bi aa bu kë poosëlar, a Yeesu kur pëñakanaan bukul. Acakësaan bafetsul, na ja bukul: “Nda rukan ibats tsi uleka bëko Bafariseu, bëlëntsantsaani, un ci wi kanguungu.

² Kaats ko un kunda wi, un dits wi ka kundësaa, nin un beka wi, un dits wi ka meaa.

³ Par, ko wi nda ñakan wi ba këñakan tsi karëm, ka teaa pënak dakaŋ. A ko wi nda kuetan wi ba këkuetan ñaan di bametsu uniew, ka wuurana di ruets ito.”

Ni kan lalee

⁴ “Ifetsar nji, ma n ja ind: Ind tsë lal biki ka fiŋ biki uliaf a uu ba, bë katse ka yëlan përo ulon ko kak.

⁵ Mán piban ind ni nduu lali: Nda lalan ni kan fiŋ unk uliaf a uu ba, në ka pëyëlan pa pëgutsar nfeernu. Eey-e, ma n ja ind, nda lalan namënts un.

⁶ Ngëkac pëweer kañan, di ka waapara iink këtakan këtëb-a? Maa Nasien-batsi finats nin uloole tsi ngul.

⁷ Ŋal uweel iyeen ind apina bëlieng. Ind tsë lal; ngëkac pëweer cum ngunk, maa nda pe ngul kaka bëkat.”

Pëja tsi bërun bañaan m mob tsi Këristu oo pëja m wëtanul

⁸ “Man ja ind: Na niirani tsi bërun bañaan na ci namiñ, Abuk ñaan-najin, kee niiranul tsi bërun ngëwaanju Nasien-batsi.

⁹ Maa, na niiraantsi tsi bërun bañaan na ci namiñ, di kee niirana buts tsi bërun ngëwaanju Nasien-batsi.

¹⁰ Na n jai ba këja përim pa mabats pi, tsi uleka Abuk ñaan-najin, kee jampësaa. Maa na njai ba këja përim pa mabats pi, tsi uleka Uwejats-ujënts, di kee jampësaa.

¹¹ Uwal wi nda tsëpanda wi di ito-ijúki, ni tsi bërun bañaan-pësien, ni tsi bërun ba tsijëna-këboos, ind tsë wejats ko wi ndu laabaraan wi, oo ko wi ndu ja wi.

¹² Par, uwal umënts, Uwejats ujënts ka leents ind ko wi ndu ja wi.”

Yeesu tib përim, anaamanaan narëmb nan doi ngëko bëfuur

¹³ Tsi pëncuaf kandënd bañaan, a nalo n ja Yeesu: “Najukan! Jaan nan tsaari ni nji, na faar bërukanda ni nji.”

¹⁴ A Yeesu jaul: “Namíñ, yën tsuin nun pëci napätsës, oo nafa ind ngëko?”

¹⁵ Na ja bukul: “Nda roon bëwaar! Ind tsë tsu ibats tsi karísan-ko. Par ubiira ñaan ciinats tsi urëmbar ngëko ngi na ka ngi.”

¹⁶ A na tib bukul përim, aja: Aka nalon narëmb, mleempënaul abuk mak.

¹⁷ Na ja tsi ibatsul: “We wi n du n do wun? Par nji n kaats tsëko tsëjúkëlaani mbuk nji.”

¹⁸ Din, na ja: “Ko wi, wi n du n do wun: Mán gar ilëpats nji, ka rura leemp in pe yi përëmb, ka jukëlënaan mbuk nji, ni ngëko-ngëro nji.

¹⁹ Din, ka ja uwaas nji: Uwaas nji, m dëmban ngëkou ngan jukëlëna ngi, pa ngëwaanu ngëcumal. Naakësaan, dialaan, daanan, ciin tsi ulílan uwiak.”

²⁰ Maa, Nasien-batsi ja narëmb namënts un: “Nafuur! Bërëm bi kalon, kë yepaa uwaasu. A yën ka rukanda un ko wi m jukëlën wi?”

²¹ Ni kan jukëlëni ngëko pa beenul, te cits narëmb tsi uleka Nasien-batsi, unk di uu ci run pa nul.

Pëfiaar tsi Nasien-batsi

²² Din, a Yeesu ja bafetsul: “Ko umënts wun, ka wun ndu nja ind: Ind tsë wejatsar tsi uleka ubiira ind tsi uleka ko wi nduu re wi. Te ind tsë wejatsar tsi uleka ngëliaf ind tsi uleka ko wi nduu tiema wi.

²³ Par, ubiira ape bariala, a uliaf pe kaŋí-bëtiem.

²⁴ Nda teenan-e ngëwaac: di ka wayan, a di ka cët; kaats tsëjúkëlaani, a kaats kalëpats; maa Nasien-batsi kë rialan ngul. Te ind, nda pe ngëko-ngëyits kaka bëkat.

²⁵ Naom tsi ind ka wejatsar un, a në yëlan pëlak ko tsi ubiiraul?

²⁶ Uci nda yëlaants përo ko uties, we ka wun nduu wejats ngëcínts ngun?

²⁷ Nda teenan-e mkekalets, bi mu wiaka bi; mul di ka ka leemp, a di ka ñíngëts. Maa ma n ja ind, ŋal Salomon, ni përëmb pi na rëmb pi, tiemaatsa kaŋí ka wara ki pi bëlon tsi mul.

²⁸ Uci u ci unk di Nasien-batsi kë tieman dun pëtsats bëreeŋ, pan ci pink ntsari, maa faan pë gutsa di bërua, andes ind ban ka biki uwak uties!

²⁹ Ind tsë fierand ko wi ndu re wi, ni wi ndu raan wi; ngul tsë cum ind uwejats.

³⁰ Par ngëmënts ngan bëlieng, aci bañaan ban cits biki Bajudeu tsi umundu ka tsas bëkun ngul. Asin ind nan ci di batsi, ame nda fier ngëmënts ngan.

³¹ Un pe wi pëwara, nda tsasan pësienul, din ngëmënts ngan ka watsësa ind.

Bëka di batsi

³² Ind ban ci bikink pëtan pëties, ind tsë lënk. Par Asin ind alílandër pëwël ind pësien.

³³ Nda waapan ngëko ngi nda ka ngi, ndë tseend baranj. Nda yecis ngënkuañ ind ngan dits ngi ka lúŋ, un ci wi bëka ban dits bi ka ba di batsi. Nakiej di ka band rul, nin ngëbob di ka cok.

³⁴ Par, tsi bëka ind ci tsi, ngëwaas ind ka ci tsul buts.

Karuk-ibats

³⁵ Nda tiemaan iŋi-uleemp, ngëlamp ind kë tab.

³⁶ Nda ciin pi bañaan biki ka lip biki nawiak bukul, pa upëniul di tsëko bënim, a nu baandi a na koŋkoŋan, din bu ka waantsul pëlëman.

³⁷ Bë naak, baleemp biki nawiak kë tsënki biki a ba ci tsi kawaay! Mán leents ind ucär: Ka tiema iŋi-uleemp, në tsoaran bukul bariala, në kaaya nu wël bukul.

³⁸ Na baandi ank myëŋ ucaak, ane uwaan uguk ucak ank, a na tsënki unk bukul, bë naak!

³⁹ Nda cikëndëni-e! Uci ajug kato ro me uwal wi nakiej kë bi wi, bitse ka wët katoul ka lúŋana.

⁴⁰ Ind buts, nda yecis. Par, Abuk ñaan-najin, ka baandi uwal wi nda meets wi.”

⁴¹ Din, Per ja: “Ajug! Përim pi m tib pank, aci pa wund oo pa bañaan bëlieng-a?”

⁴² Ajug yankul, aja: “Yën ci-un naleemp na mobi tsi përim pi na jaka pi, na ka ibats? Aci naleemp ni nawiak kë tsui përukanda baleemp tsi katoul, uja ba band pëwëla bariala, në wël bukul.

⁴³ Anaak, naleemp namënts un, ni nawiakul kë tsënkii uwitseeul a nuu ro ank.

⁴⁴ Mán leents ind ucär: Nawiak ka tsuul na tsijëna ngëko bëlieng.

⁴⁵ Maa, uci naleemp namënts un ja tsi ibatsul: ‘Nawiak nji ka faatsan pëbaandi,’ na jot pëtucan baleemp, bayënts ni bakaats, na mob tsi bariala ni përaan, ni ukuj,

⁴⁶ din nawiak naleemp namënts un ka baandi unu wi na wejatsats wi, ni uwal wi na meets wi, në fal-falanul, në tsuul në bof tsi ko wi kan baandë-ni wi bamobats tsi uwak.

⁴⁷ Naleemp na mei ko wi nawiakul ŋal wi, maa a yecisats, nindoots bi nawiakul ŋal bi, ka kobaa ngëkob ngëcumal.

⁴⁸ Maa naleemp na meetsi ko wi nawiakul ŋal wi, a na ro ngëko ngan ka ngi nu pikaara, ka kobaa ngëkob ngan cumats ngi. Na wëlee arëmbana, ka yepaa un dëmb wi. A nan tergaaree ko un dëmb wi, ka yeparaa ko un pe wi përëmb.

Yeesu ka mankicësar kë ci tsi bañaan

⁴⁹ Man bi pëgur bërua tsi umundu, a n do n ŋal ba roon bë tab ba!

⁵⁰ Aka bëmijan bi n ka bi pëmijana; a n juatsan aa ko umënts wan ka tsënkëna ka ci.

⁵¹ Nda ja ne man bi pëwël pëfac tsi umundu a? Nin na! Maa ma n ja ind, aci mankicësar.

⁵² Par, ka ruka ja bañaan kañan ban ci biki tsi kato, bu ka patsësar; bawaants ka natsara batëb, batëb ka natsara bawaants.

⁵³ Niints-nambukari ka natsara abukul niints; napäts niints ka natsara asinul. Ŋaats-nambukari ka natsara abukul ŋaats, napäts ŋaats ka natsara aninul; ŋaats ka natsara aar abukul, napäts ŋaats ka natsara anin ayënul.”

Pëme uwal Këstu

⁵⁴ A Yeesu ja buts indënd bañaan: “Nda ja nda win isa jínani di kajara uyër-unu, din ndë ja: ‘Usubal ka subi;’ din u ci unk.

⁵⁵ A uwal wi ufuts utsia-ucaak futsi wi, ndë ja: ‘Ka yëkan mak;’ din u ci unk.

⁵⁶ Nda ci banguungu! Ande nda yëlan pëyëkëran bënaam utsia ni batsi; a nda ro um a nda yëkëranats uwal untsari?

⁵⁷ We ka wun nda ri ka wejats bërier ind ko u mab wi?

⁵⁸ Aja m pën ni bëñaasaru pëya di ñaan-ulua, tsi bëga doon ujiitu kë teelar ni nul; ucits ank në púulu na bandand di nawat-pëleents, nawat-pëleents ka gutsu tsi iñan napulis, napulis ka gutsu di ukalabus.

⁵⁹ Ma n jau: M di kë pëni rul, te m tuamats pëluk unciliŋ utuami.”