LÚKAS 11 - KARÚK-PËRIM KAWALU Nouveau Testament

Yeesu jukan bafetsul bëñaan

¹ Bëlon bëyaas, Yeesu ci tsi bëñaan di tsëlon tsëko. Bi na ba bi, nalon tsi bafetsul jaul: “Ajug! Jukan ni wund bëñaan, bi Joŋ jukan bi bafetsul.”

² A Yeesu ja bukul: “Uñaan ind, nda jaan: Paapa, katimu ka ciin ka yëman ki; pësienu pa bili;

³ wël wund, kara unu, bariala wund bi unu un ci wi.

⁴ Jampësan wund ngëjuban wund, par wund bërier wund, aja ñaan lac wund, wund ka jampësaul. Tsë tsu wund tsi pëteen-teenana.” [Maa buërani wund tsi kañan Ujuatsal.]

Përim pa naamanaana pi namin-minan bëfetsarul

⁵ A Yeesu ja bukul kak: “Uci iink nalon tsi ind ka bëfetsar, na ya di nul, myëŋ, na jaul: ‘Bëfetsar! Tsiatsanin-e këpom këwaants,

⁶ par, aka bëlon bëfetsar nji, nan pënari bëyaas, na baandi use nji; maa nji n kaats ko wi n du n wëlul wi.’

⁷ A uci nun di bametsu jaul: ‘Cats min-minanin! Pëlëman anigana ba, a n piints ni upäts nji. Nji n yëlanats pënatsa pëwëlu ko.’

⁸ Man ja ind: Uci na natsaatsa pa pëwëlul upom undo bi na ci bi bëfetsarul, maa në natsa aatsum ka wëlul ko wi na fier wi bëlieng, undo bi na kawaraatsa bi pëmob tsi pëbuaraul.

⁹ Wul ka wun ndu nja ind: Nda yepan, ndii wëlaa; nda tsasan, ndii win; nda koŋkoŋani, ndii waantsaa.

¹⁰ Par, na yepi, në yank; nan tsasi, në win; a nan koŋkoŋani, nii waantsaa.

¹¹ Naom niints tsi ind, ni abuk kë yep un upom, maa u ci pëlaak pi në wëlul pun? Oo në yep utsëb, në wëlul uko-pëtsats tsi pëlas utsëb?

¹² Oo në yepul pëjeenj, maa u ci utiifar wi nu wëlul wun?

¹³ Bi u ci bank, uci ind ban juats bikink ngëwaas, a nda me aatsum pëwël upäts ind ngëko ngëwar, andes Asin ind nan ci di batsi, ba yepul biki Uwejats-ujënts, ka wël bukul wël.”

Yeesu yësan nalon narika-ñakan

¹⁴ Bëlon bëyaas, a Yeesu ci tsi përuak ucaay un dits wi ka ñakan, pa u pëni di nalon niints. Bi ucaay pën bi, narika-ñakan ñakan, a indënd bañaan pikra.

¹⁵ Maa, a u ka ban ja biki: “Aci Beelsebul, uwiak ngëcaay, wi nu ruakëna wun ngëcaay nga pëni di bañaan.”

¹⁶ Balon yepul upibanaani un pëni wi batsi, pa pëteenamanul.

¹⁷ A Yeesu me ibats bukul, na ja bukul: “Pësien pi kan kaman pi tsi bametsu pul, di ka wam; kaja kato, kë yërëna kacints.

¹⁸ A uci Useetaani kë kaman been wul, um bi pësien wul kë nats bun? Par nda ci tsi pëja, aci Beelsebul wi ndu nduakëna wun ngëcaay.

¹⁹ A uci u ci Beelsebul wi ndu nduakëna wun ngëcaay nga pën di bañaan, a babuk ind, bu ka ruakëna ngul yën-i? Wul ka wun, bukul ka ci bukun bawat ind pëleents.

²⁰ Maa, uci u ci pëkuanj Nasien-batsi pi ndu nduakëna pun ngëcaay nga pën di bañaan, ndë me, pësien Nasien-batsi abaandi tsi ind.

²¹ Ñaan nan kai uyëlan, na tsij iŋi-ukam in kësul yi, uci na ci tsi pëwaay katoul, bëkaul ka ci tsi tsëko tsa wakan tsi.

²² Maa, nan peuli uyëlan bi baandi a na yëlanul, në caul iŋi-ukam i na watsaraan yi, në fa ngëko ngi na caanul ngi.

²³ Ñaan nan biitsi kajara nji, anatsara pëkamanin. A nan jukëlënatsi ni nji, aci tsi pëgarës.

Pëkat ibats, pa përits yër kak

²⁴ Aja ucaay ujuatsal pëni di ñaan, u pën koo yaana ijara in kay yi, pëtsas pënaakësa, maa di ka win. Din u ja: Mán witsa kato nji di n pëni ri.

²⁵ Ubaandi wul, u tsënki kato wetaa, a ngëko tsua tsi ilas ngul.

²⁶ Din, u tsëp wii pënandi ngëlon ngëcaay paaj ni ulon, ngan pe ngi wul pëjuats; ngë niaj bametsu, ngë ciina rul. A bëci ñaan namënts un bëtuami pe bëcak pëjuats.”

Ba naak biki

²⁷ Bi Yeesu wama bi ka ja ko wan, a ŋaats nalon kati përim tsi pëncuaf bañaan, ajaul: “Anaak, ŋaats nan bukui a na buatanu!”

²⁸ Maa, Yeesu jaul: “M dits ja, bë naak, biki kan cikëndën biki përim Nasien-batsi, a bu kë ro ko wi pa ja wi!”

Upibanaani wi Jonas ci wi

²⁹ Bi indënd bañaan kë watsësari bi, a Yeesu ja: “Bañaan ntsari, bë ci bañaan ba waraatsa biki! Bë ci tsi pëyep upibanaani, maa bë ri ka wëla ulon upibanaani, ucits ba wi Jonas wun.

³⁰ Par, bi Jonas ci bunk upibanaani pa bañaan-ucaak Niniwe, unk di Abuk ñaan-najin, kë ci run pa bañaan ntsari.

³¹ Unu kawat-pëleents, nasien ŋaats, nan pënë-ni unk uleka utsia-ucaak, ka natsee ni bañaan ntsari, në lacan bukul. Par apëni tsan buer tsi pëlaw, na bi pëcikëndën kameko Salomon; te, nan pei Salomon ci ink tsi.

³² Unu kawat-pëleents, bañaan-ucaak Niniwe ka natsee ni bañaan ntsari, bu ka lacan bukul. Par, bi Jonas leents bi bukul përim Nasien-batsi, ba fets pul; te, nan pei Jonas ci ink tsi.

Ulamp uliaf

³³ Ñaan di ka taban ulamp, në tsu wul di tsëko tsi uu beka tsi, nin di ka jej ko na kundëna wul. Maa, ka tsu wul di tsëpafëni wul; uja biki ka niaji biki, bu ka win ufacar tsëko.

³⁴ Pëkësu, ci pun ulamp uliaf. Pëkësu ci ba pëyësal, din uliafu bëlieng ka ci tsi ufac. Maa pa waraatsa ba, din uliafu ka rëmënts.

³⁵ Rukan ibats pa ufac un ci wi tsi wi tsë ci karëm.

³⁶ Bi u ci bank, uci uliafu bëlieng cum ni ufac, te kaats kaŋí uliaf kan dëmënts ki, din u baar pëcum ni ufac, bi ulamp kë fietsu bunk ni ufac wul.”

Yeesu leentsar Bafariseu ni bajukan-ulua

³⁷ Bi Yeesu kë ba bi uñakan, nalon Nafariseu ruul, pa ba ya bariala di useul. A Yeesu niaj bametsu, na tsoar bariala.

³⁸ A Nafariseu pikra, bi na win bi Yeesu tsoar bariala te ñawësarats bërun, bi u tsua bi tsi undimaan bukul.

³⁹ Din Ajug jaul: “Teenan-e, ind Bafariseu, nda ja nda roon ndu jëntsan bafetsu karaani, ni bafetsu përialaani; maa bametsu ngëwaas ind acum ni kaca ngëko bañaan, ni kawaraatsa.

⁴⁰ Nda ranj ibats! Na leemp unk bafetsu, leempats bametsu buts-a?

⁴¹ U wara wi, nda tseendan baranj ngan ci ngi di bametsu, din ngëko bëlieng ka jënts ind.

⁴² Cay ind Bafariseu! Nda ja tsi kara ifa untaaja ngëko pi umbaantu, ni kamaatu, ni mko uwoorta bëlieng, ndë wël kaloole. Maa, nda tsuuts ibats tsi bëmabal ni bëŋal bi nda ro bi ka pëka tsi uleka Nasien-batsi. Ngëmënts ngi aka përolaa, te nda rits wët përo ngan duka ngunk.

⁴³ Cay ind Bafariseu! Par, nda ja nda roon di ito-ijúki, ndë ŋal puu tsoar di bërun. Nda ŋaland puu leenaa di injëkënts.

⁴⁴ Cay ind! Par, nda ci pi ibëk in kaats yi uyëkëraani, a bañaan kë yandaar tsi ruëts yul, te bë meets.”

⁴⁵ A Nalon tsi bajukan-ulua ja Yeesu: “Najukan! Bi m ñakan bank, m ci tsi pëkar wund buts!”

⁴⁶ Maa, Yeesu ja: “Cay ind buts bajukan-ulua! Par, nda ja nda roon nduu yuuntsan bañaan pëyunts pan dits pi pëyunts; maa ind bërier ind, nda ri ka kërara pëyunts pëmënts, ŋal ni pëlon pëkuanj tsi ikuanj ind.

⁴⁷ Cay ind! Par, nda ci tsi pëniew ibëk bayëlia, te basinind fiŋ bukun bukul.

⁴⁸ Unk di nda piban dun, nda niiran ngëko ngi basinind ro ngi. Par bë fiŋ bayëlia, a ind nda niew ibëk bukul.

⁴⁹ Wul ka wun Kameko Nasien-batsi ja: ‘Mán wëtani bukul bayëlia ni bapostolu, bu ka fiŋ balon tsi ba wëtanee biki, bu ka noor-nooran bacints;’

⁵⁰ unk pa bañaan ntsari pëyepara unkonta pëñaak bayëlia bëlieng, pan tula pi, ki umundu juund ki.

⁵¹ Akur-ni tsi pëñaak Abel, te tsi pëñaak Sakaria, nan fiŋee pëpën tsi bëgij, pëya Kato Nasien-batsi. Eey-e, ma n ja ind, bañaan ntsari ka yeparaa.

⁵² Cay ind bajukan-ulua! Par, nda pënan kanigësaani ume. Ind bërier ind, nda niajats; biki ka niaj biki, nda laaŋ bukul.”

⁵³ Bi Yeesu pën bi tsul, a bapican-ulua ni Bafariseu jot pëkuliñ, ba ci tsi pëyepar-yeparanul tsi uleka ngëko ngëcumal,

⁵⁴ pa pëgunganul, pa pëmob ko ulon un pëni wi di mtumul.