LÚKAS 1 - KARÚK-PËRIM KAWALU Nouveau Testament

Ujuundi

¹ Teofilu, niints nawiak! Bañaan bacumal, ro ko wi ba yëlan wi përo, ba pican ko undola wi tsi pëncuaf wund.

² Bë pican ngëko ngi wund leentsa ngi. Te ba leents wund biki ngul, kul, ki ujuundi, win ngul ni këkës kul, a bee ci baleents përim Nasien-batsi.

³ A nji, ma yepar ngul bëlieng uwar, ki ucaki-ko; a u wara ndoon, ka pican ngul bi nga par bi ja, pa wi.

⁴ Mando ank, pa kë ba pëme ne, ko wi m leentsa wi, abaaraan pëci ucär.

Uwaanju acar aleents ubukara Joŋ-namijan

⁵ Pëcël pi Eroodis sien pi pëboos Judeeya, a u ka nalon najakan, ni ka n jakee Sakaria. Aci nalon tsi ngërúp bajakan ban bofëna biki tsi Abia. Áarul ka jaka Elisabet, abof ts tsi kajër Aaron.

⁶ Sakaria ni Elisabet, bë ci bamabal tsi bërun Nasien-batsi; bë meandaatsa uwutsëtsuel tsi ngëtsua Ajug bëlieng, ni tsi irim i na ja yi bëlieng.

⁷ Maa bë kaats napäts, par Elisabet ajaka cits ŋaats, te bë tsaf bëlieng.

⁸ Bëlon bëyaas, bi ngërúp Sakaria ci bi tsi përo uleemp, Sakaria ci tsi uleemp bëjakan tsi bërun Nasien-batsi.

⁹ Bi u ja bi u roon u rolaa tsi bëro bajakan, iko júgatsa a na rata, pa pëniaj tsëko-tsëyëman Ajug në taban ucuraay.

¹⁰ Bi ucuraay kë yëk bi, a kandënd bañaan-ucaak bëlieng ci tsi bëñaan di utsand.

¹¹ Ulon uwaanju Ajug pibandari tsi bërun Sakaria; anats tsi kariir tsëtabanaani ucuraay.

¹² Sakaria kë win, ubëlul pën, na lënk mak.

¹³ Maa uwaanju jaul: “Sakaria, cats lënk! Par, bëñaanu aniirana. Áaru Elisabet ka kaaru napäts niints, kë tsuul katim, Joŋ.

¹⁴ Kë lílan undoul, kë piban m lílan. Bañaan bacumal ka lílan, undo ukaraul.

¹⁵ Par ka ci ñaan nawiak tsi bërun Ajug. Di ka raan ubiiñu, nin pëwat pëyëk. Ka wama ci di pëpës aninul, Uwejats ujënts ka cumul.

¹⁶ Ka tsu bañaan Israel bacumal, ka kaki tsi Ajug, Nasien-batsi kul.

¹⁷ Nasien-batsi ka runanul, në wëlandul uwejats ni uyëlan Eliyas, nayëlia. Ka wëlul wul, pa në yëlanaan pëtsu bayënts-bamkari, ka kakan ngëwaas kul tsi upäts kul, ni pëtsu barika-ro ko wi ba jaka wi, ka ka kameko bamabal, pa pëyecis bañaan-ucaak ka ci ban yecis biki pa Ajug.”

¹⁸ Sakaria ja uwaanju: “Mán meena we umënts wan kë ci? Par man tsaf mak, aar nji ruka tsaf buts.”

¹⁹ Uwaanju jaul: “Nji n ci-un Gabriel, nji n ja un n doon koo nats tsi bërun Nasien-batsi. Man yëlee këyëlee pa pëñakanaanu, ni pëleentsu Upetsan-uwar umënts wi.

²⁰ Bi u ci bank, kë ci narika-ñakan; m di kë yëlan uñakan te unu wi ngëko ngëmënts kë baandi wi. Par, m fiaarats përim nji. Uband pul pëci, pë ci.”

²¹ Bi Sakaria kë ñakanaana bi, bañaan kë lipul di utsand. A ngëwejats pe kul ibats, uleka bi na wami bi di tsëko-tsëyëman.

²² Bi na pëni bi utsand, yëlaants pëñakanaan kul. Din ba me na win bëwinal di tsëko-tsëyëman. A nuu way këway kul iñan; aruka ci narika-ñakan.

²³ A ngënu uleempul kë ba, na witsa katoul.

²⁴ Ngënu ngëmënts par, aarul Elisabet mob pëpës, na bekar, ko u yëlan wi këlí kañan. Par nul Elisabet aci tsi pëja:

²⁵ “Ko wi ci wun wi Ajug roorin wi, tsi ngënu ngi na fierandin ngi, a na pënanin mkaw tsi këkës bañaan.”

Uwaanju acar aleents ubukara Yeesu

²⁶ Tsi pëli pëpaajantsan, Nasien-batsi yël uwaanju Gabriel di përaasa pan ciina Galileeya, puu jaka Nasaret,

²⁷ pa u tsëp di ŋaats na meetsi niints, nan kai natsasaul ni ka n jakee Juse; Juse apënë-ni pëka Dawid. Katim ŋaats ka jaka Maaria.

²⁸ Uwaanju niaj di Maaria, u jaul: “Man leenu, wi kantsuunkara! Ajug aci ni wi.”

²⁹ A Maaria pikra mak tsi përim pan. Nu tsas tsi ibatsul, pëme ko un ci wi kawël-mboos kan.

³⁰ A uwaanju jaul: “Cats lënk, Maaria. Par Nasien-batsi atsuunkaru.

³¹ Teenan-e! Kë mob pëpës, kë k napäts niints, kë tsuul katim, Yeesu.

³² Ka ci ñaan nawiak, nuu jaka, Abuk Kanpe pëci di ruets. Ajug, un ci wi Nasien-batsi, ka wëlul pësien asinul Dawid,

³³ në sien kato Jakob pa sandëndën, te pësienul di ka ba.”

³⁴ A Maaria ja uwaanju: “Um bi ko wan kë ci n? Par, nji n meets niints.”

³⁵ Uwaanju jaul: “Uwejats-ujënts ka welee tsi wi; pëyëlan Kanpe pëci di ruets ka límtsanu. Wul ka wun, nayëman ni kan kee koo jaka, Abuk Nasien-batsi.

³⁶ Teenan-e Elisabet, ni nda kee! Atsaf, maa nul seempa ink ts napäts niints; nul nandoi jaka di ka k, nul ci ink tsi pëlíul pëpaajantsan.

³⁷ Par, kaats ko wi Nasien-batsi yëlaants wi.”

³⁸ A Maaria ja: “Man ci naluek Ajug. U roaan bi m jain bank.” Uwaanju pën aruk Maaria.

Maaria aya pëwula Elisabet

³⁹ Maaria natsa uwal umënts wun, na míint pëtsëp pëlon përaasa, pan ciina pi Judeeya, di kajara ngëntunda.

⁴⁰ A na niaj kato Sakaria, na leena Elisabet;

⁴¹ Elisabet kë te Maaria wël mboos, napäts raŋar di pëpësul; Elisabet cum ni Uwejats-ujënts.

⁴² Na kat përim mak, a na ja: “M beenira tsi bakaats, napäts ni këbuk ki beenira!

⁴³ Aro um a umënts wi wëlain, bi anin Ajug nji bi bink pëain?

⁴⁴ Par, teenan-e! Bi n te bi m wël mboos, napäts raŋar di pëpës nji, apiban na lílan.

⁴⁵ Anaak, nan fiaari ngëko ngi Ajug jaul ngi kë rola.”

Kaya Maaria ki ubëndan

⁴⁶ Maaria ja: “Uwejats nji aci tsi përëmban Ajug,

⁴⁷ uwaas nji kë lílan tsi Nasien-batsi, naëran nji.

⁴⁸ Par alesin, nji nan ci naluekul, na welani been nji. Bañaan bëlieng ka ruka ka jain, nanaakal;

⁴⁹ par Kayëlan-bëlieng aroorin ngëko ngëwiak; katimul aci kayëman.

⁵⁰ Kayëk-ipësul, aci pa ba lënkul biki, tsi bak kul, tsi batiemi kul, pëtsëp.

⁵¹ Apiban uyëlan kañanul; aruak bañaan ban tsij biki ngëwejats kape iyeen kul, ba garandar.

⁵² Apënan basien tsi itsoari kul yi pësien, na kat ba welan biki iyeen kul.

⁵³ Awël babonats ngëko ngëwar akësan, maa na ruak barëmb, iñan bajëntsu.

⁵⁴ Na tsënk Israel, naleempul, alesëna kayëk-ipësul

⁵⁵ tsi uleka Abraam ni kajërul, pa sandëndën, bi na ro bi ja basin inja.”

⁵⁶ Maaria tsoar ni Elisabet, ko u wokan wi këlí këwaants, na ru witsa katoul.

Ubukara Joŋ-namijan

⁵⁷ Uband uwal wi Elisabet kë k wi, na k napäts niints.

⁵⁸ Bacënul, ni bayëtsul te u jaka Ajug ayëkarul ipës mak, ba lílan ni nul.

⁵⁹ Unu uwasantsan wi napäts ka wi, ba bi pëwelanul kambac. Ba ŋal pëtsuul katim asinul, un ci wi Sakaria.

⁶⁰ Maa, aninul ja: “Naaw! Joŋ di nu rua run.”

⁶¹ Ba jaul: “Kaats ñaan tsi kayëtsu nan tsuee katim kan.”

⁶² Ba wiil asin napäts iñan, pa pëyeparul katim ki na ŋal ki napäts pëtsua.

⁶³ Sakaria yep katagëba, na pican përim pi: “Katimul Joŋ.” Ba pikra bëlieng.

⁶⁴ Uyëk umënts wun, mtum Sakaria waabësa, pëndiamëntul kabësa, na ñakan, na rëmba Nasien-batsi.

⁶⁵ Bañaan pëcën bëlieng lënk. Ngëko ngan par ngank bëlieng kë ñakanaana tsi kajara ngëntunda Judeeya kun bëlieng.

⁶⁶ Bañaan bëlieng, ban te biki ngul, gaang ngul tsi ngëwaas kul, kë ja: “We wi napätsi kii ci wun-i?” Par, uyëlan ajug awina ci ni nul.

Kaya Sakaria ki ubëndan

⁶⁷ Sakaria, asin napäts, cum ni Uwejats ujënts, na car aleents përim, aja:

⁶⁸ “Ajug, na jaaraan ngëwar, nul Nasien-batsi Israel, par abi pëwula bañaanul, na facan bukul.

⁶⁹ Anatsani pëntin pëbuërëni pa n ja, tsi pëka Dawid naleempul;

⁷⁰ aci ko wi na ro wi ja, ajaana wël tsi mtum bayëliaul bayëman, ki uwal ujon;

⁷¹ aci pëbuër pi kan pënan nja pi tsi ban bër nja biki, ni tsi iñan ba ñaas nja biki,

⁷² pa pëpiban kayëk-ipës ki na yëkar ki basin nja ni pëles karo-pëlooleul kayëman.

⁷³ Aci ubaaja wi na baaja wi asin nja Abraam. Unk,

⁷⁴ bi ngë ba bi pëbuërana tsi iñan ban bër nja biki, na wël nja pëyëlan puu bëndanul, te ngë ri ka ciind ni bëlal;

⁷⁵ nja kë ci tsi ko u yëman wi, ni tsi ko u mab wi, tsi bërunul, tsi ngënu bëlieng ngi ubiira inja.

⁷⁶ A wi, napäts nji, kuu jaka, nayëlia Kanpe pëci di ruets. Par, kuu yandaar tsi bërun Ajug, pa pëyecisul bëga,

⁷⁷ pa pëtsu bañaanul pëme pëbuër, tsi pëjampësaa ngëjuban kul,

⁷⁸ undo bi Nasien-batsi nja cum bi ni kayëk-ipës; ka wun unu kë natsee di ruets, u wúleenja

⁷⁹ pa pëfiets ban ci biki tsi karëm, a pëcäts límtsan kul, pa pëkaŋan iyots nja tsi bëga bi kan tsij nja bi tsi pëfac.”

⁸⁰ Napäts kë wiaka, uwejatsul kë pe këpe pëka uyëlan. Na ciina ngëlaalats, te unu pë pibandarul tsi Israel.