KOLOS 4 - KARÚK-PËRIM KAWALU Nouveau Testament

¹ Ind bajug baluek, nda tsijan baluek ind tsi ko u mab wi, a u liing bi u ka bi pëci. Par nda me koon, ind buts nda ka Ajug di batsi.

Ngan tsua ngi puu rolaa

² Nda moban tsi bëñaan, nduu waants ibats tsi bul, nduu baran;

³ nduu ñaandar wund buts, pa Nasien-batsi pëwaants wund pëlëman, pëleents përim, pa puu leents wi Këristu undoots wunk mea; undo wul buts ka wun n dica.

⁴ Nda ñaanan nji pëtsu bañaan ba me wul, bi n ka bi ndoon ka ñakan.

⁵ Nda yandaari ni kameko, tsi bëci ind ni bañaan utsand. Nda jalaan tsi uwal un ci wi-ba këci.

⁶ Përim ind pa lílan ngëwal bëlieng, pa tean pënam, ndë me bi u ka bi pëja nan ci bi nu jankma bi acintsul.

Kawël-mboos katuamë-ni

⁷ tsi uleka ngi n ciina ngi, Tiikiku ka leents ind ko un ci wi-ba këci. Nul aci nan tsaari ninjana ŋalee, a na ciind naleemp na mobi tsi ko wi na tsua wi, naleemp ni nji tsi Ajug.

⁸ Man yëliul tsi ind, pa ndë me ngi wund ciina ngi, në liinc-liincan ind ngëwaas.

⁹ Acii ni Oneesimu, na mobi tsi ko un jaka wi, nan tsaari ninjana ŋalee, nul nan pënë-nii tsi ind; bu ka leents ind ngan par ngi bëlieng tsi.

¹⁰ Aristaarku, nan dicee ni nji, aleeni ind. Marku buts, nul abuk niints nan tsaari ni asin Barnabas, aleeni ind; nda leentsa ulekaul. Uci na baandi tsi ind, ndë welanul.

¹¹ Yeesu buts, ni ka n jaka unk Justus, aleeni ind. tsi baleemp ni nji pa pësien Nasien-batsi, bamënts biki baŋ ci bukun Bajudeu bafets Yeesu Këristu; bë ci ban juabutsanin biki uwaas.

¹² Epafëras, nul nan pënë-nii tsi ind, naleempar Këristu Yeesu, aleeni ind. tsi ngëwal bëlieng, aci tsi pëkamandër ind tsi bëñaan, pa ndë liincandar, ndë jëŋ, nduu ro ko wi Nasien-batsi ŋal wi ba këŋal.

¹³ Má n ja përim pi tsi ulekaul: acibar ind mak, ni pa ban ci biki di Laodiseeya, ni pa ban ci biki di Yerapolis.

¹⁴ Lúkas, nacuunkan, nul na ŋalee, aleeni ind; Deemas buts aleeni ind.

¹⁵ Nda leendarin ban tsaar biki ni njaa ba ci di Laodiseeya. Ndë leendarin buts ŋaats ni ka n jaka unk Nimfa, ni Ngëriisia ngan ci ngunk di katoul.

¹⁶ Uwal wi uletar wi layira wi tsi pëncuaf ind, ndë ro bi nda yëlan bi pa u layira buts tsi Ngëriisia bañaan Laodiseeya, a ind buts ndë layir wi kan pëni wi Laodiseeya.

¹⁷ Nda jaan Arkiipu: “Jutsan tsi uleemp wi m yank wi tsi Ajug, kë roon wul ka ba.”

¹⁸ Nji Pol, nji n pican un kawël-mboos kamënts ki ni kañan nji. Nda lesan mdica mi n dica mi. Bëtseend Nasien-batsi, ba ciin ni ind.