KOLOS 3 - KARÚK-PËRIM KAWALU Nouveau Testament

¹ Bi nda natsee bunk ni Këristu di pëcäts, nda tsasan ngi ruets, di Këristu tsoar ri, tsi kariir Nasien-batsi.

² Nda tsuun ibats ind tsi ngëko ruets, cits tsi ngi utsia.

³ Par nda cäts, a ngëbiira ind beka ni Këristu tsi Nasien-batsi.

⁴ Upibandari Këristu, nul nan ci ngëbiira ind, din ind buts ndë pibandari ni nul tsi përëmb.

Ubiira ujon, ni ubiira uwalu

⁵ Bi u ci bank, ngiic ind ngi umundu, nda tsuun ngul nga cäts, un ci wi: katúk-ufuts, bëtsopal, karí-ko kan pelëk ki, uŋal u waraatsa wi, nikariisan-ko, kul kan ci ki kajintëla-icap.

⁶ Undo ngëmënts ngun, ka wun uriab Nasien-batsi kë baandë-ni babuk karoots ko un jaka wi.

⁷ Unk di nda ro run ka ro, uwal wi nda ro wunk ci tsi ngul.

⁸ Inkri, bi u ci bank, ind buts nda wëtani ngëmënts ngi ngul bëlieng: ukulëñ, ni uriab, ni kajuats-uwaas, ni pëja uwutsëtsuel tsi uleka ñaan, ni irim karika-kawa i kan pëni yi tsi itum ind.

⁹ Ñaan tsë tsupar acintsul. Par nda pënan bëci bëjon, ni ngi ba uwakëtsa ngi përo,

¹⁰ a nda tiema bëci buwalu, bul ba n ja bi ba roon, buu witsa buwalu tsi bënaam na leempi bul, pa pëka ume.

¹¹ tsul, katse ka nagërek oo Najudeu; katse ka nawela-kambac oo nawelaatsa-kambac; katse ka napayi oo najintela-ngëcaay; katse ka naluek oo nafacal; maa Këristu ci-un, nul nan ci blieng, tsi blieëng.

¹² Bi u ci bank, undo nda ci biki Nasien-batsi ban data biki, ba yëman biki, ba ŋalaa biki, nda tiemaan kayëk-ipës, ni kawara-uwaas, ni kawelan-been, ni kajuab-uwaas, ni umiira;

¹³ uja nan ci nuu miira acintsul, ñaan në jampësa acintsul uci na kaar ko ni nul. Bi Ajug jampësa ind bunk, ind buts nda rolan unk.

¹⁴ A tsi ruets ngëmënts ngan bëlieng, nda tiemaan bëŋal, un ci wi, ko wi ka mobulan wi ngul bëlieng tsi pëba pëwara.

¹⁵ Pëfac pan ci pi pi Këristu, pa ciin pan tsijëna pi ngëwaas ind, undo nda ruee tsi pul pa pëci uliaf uloole baŋ. Nda ciin babaran.

¹⁶ Përim Këristu, ni bëka pul bëlieng, pa ciin tsi ind. Ni kameko bëlieng, nda ciin tsi puu jukan, ni tsi puu tseendar ibats. tsi ngëwaas ind, nda yaan Nasien-batsi iya ubëndan, ni iya-ubaran, ni iya tsi Uwejats-ujënts.

¹⁷ Ko wi nduu ro wi ba këro, tsi irim oo tsi karo-ko, nda roan wul tsi katim Yeesu, Ajug; tsi nul nduu baran Nasien-batsi, Asin.

Bi bafets Këristu kë ro bi di ito bukul

¹⁸ Ind bakaats ba nima biki, nan ci, na moban tsi përim ayënul, bi u mab bi tsi Ajug.

¹⁹ Ind bayënts ba nim biki, nan ci, na ŋalan aarul, te nul tsë tsijandul përim pa lílats pi.

²⁰ Ind upäts, nda fetsan përim bábuk ind, tsi ko un ci wi-ba këci, par aci ko u líl wi Ajug.

²¹ Ind basin upäts, ind tsë riabatsan upäts ind; ucits ank ba, ndë catsan bukul ngëwaas.

²² Ind baluek, nda fetsan përim bajug ind tsi utsia tsi, tsi ko un ci wi-ba këci. Cits rin tsi uwal wi ba tsuuna ind wi këkës, pi nduu tsas bukul pëlilandër ind, maa nda roan ank ni ngëwaas ngan fac ngi, ni urispiitu, pa Ajug.

²³ Ko wi nduu ro wi ba këro, nda baari ngëwaas tsi wul, pi aci Ajug ni nduu roor un, cits bañaan.

²⁴ Par nda me koon, Ajug ka wël ind bërukanda, bë ci bëluk. Aci Këristu, Ajug, ni nda ci-un tsi pëleempar.

²⁵ Par, nandoi kamabats, ka luka kamabats ki na ro ki; te, pëkicës bañaan cits.