KOLOS 2 - KARÚK-PËRIM KAWALU Nouveau Testament

¹ Man ŋal ind pëme ukam uwiak wi n ci wi tsi pëkamandër ind, ni ban ci biki di Laodiseeya, ni bañaan bëlieng ba winats biki urostu nji tsi uyamats.

² Unk bu ka liinc-liincana ngëwaas, bu ka ci baloole tsi bëŋal. Din tsi bëka ban ci bi ba këci, bu ka tsënkan pëcum ni bëlipal, pëme wi Nasien-batsi undoots wunk mea, un ci wi Këristu;

³ tsi nul tsi bëka ban ci bi ba këci bekëna tsun, bëka kameko ni bi ume.

⁴ Ma n ja ko wan, pa ñaan tsë fal ind ni irim ilílal.

⁵ Par, ŋal bi n winaatsa bi tsi uliaf, maa tsi uwejats, man ci ni ind, a n lílan tsi pëwin bëci ind ci bëwar, a nda liincand uwak tsi Këristu.

Ubiira u liinc wi tsi Këristu

⁶ Bi u ci bank, bi nda niiran bink Këristu Yeesu, nul Ajug, nda moban unk tsi puu yandaar ni nul;

⁷ nda ciin ba n jab biki tsi nul, ndë liinc, nduu pe këpe pëka uyëlan tsi uwak, bi nda jukana bi; din ngëwaas ind kë cum ni puu baran.

⁸ Nda katan ibats pa ñaan tsë mob ind tsi pëgungan bëŋal-kameko, bul ban ci bi manfalar mjënts, ban pënë-ni bi tsi undimaan bañaan-bajin ni tsi ngëko umundu, maa pënënatsi tsi Këristu.

⁹ Par, Kësien-batsi bëlieng aciina tsi Këristu, tsi bëci uliaf;

¹⁰ a nda ruka cumana ngëko tsi nul, nul na wiaki un tsijëna wi ba këtsijëna pëyëlan, ni un ka wi ba këka uyëlan.

¹¹ tsi nul, nda welana kambac ki iñan ñaan welanats ki, ki kan pënan ki bëci uliaf uyamats, kambac ki Këristu welan ki;

¹² nda mooya ni nul tsi bëmijan, a nda natsee ni nul, undo nda wak tsi pëyëlan Nasien-batsi, pul pan tsuul pi a na natsee di bacäts.

¹³ A ind ban do biki cats undo kaguus-ko ind, ni undo kawelaatsa-kambac tsi ngëliaf ind, Nasien-batsi tsu ind a nda ci bayësal ni Këristu: Ajampësa nja ngi ngë ro ngi nga waraatsa ngi ngul bëlieng,

¹⁴ afaa kakaarta kan picana ki koo kaman nja ki ngëtsua ngan doots ngunk wara nja; apënan kul, par arieŋ kul tsi kruus;

¹⁵ aca iŋi-ukam ngan tsijëna ngi pëyëlan, ni yi ngan ka ngi uyëlan, a na kawaran ngul tsi bërun bañaan, akuk ngul tsi kruus.

¹⁶ Wul ka wun, ñaan tsë lacan ind tsi undo ko wi nduu re wi, ni tsi undo ko wi nduu raan wi, oo tsi undo ufesta bëga, oo ufesta pëli pëwalu, oo ngënu pënaakësa.

¹⁷ Ngëmënts ngun aci këci ulimënts ngëko ngi kan bi ngi; maa uliaf aci wi Këristu.

¹⁸ Ñaan nan ci tsi puu lílan tsi kawelan-been kan cits ki kacär, ni tsi puu jintëla ngëwaanju, ind tsë wëtul na lacan ind tsi pëkamandër bëluk. Ñaan pi namënts un, atsu ibats tsi ngëko buwinal; bëlipalul aci bi ñaan-najin, a u tsuul tsi mguukandër mjënts.

¹⁹ Nul, awëtan puu mob tsi Been, bul ban tsijëna bi uliaf bëlieng a u mobular uwar tsi ngësúk ni tsi intaañ, a uu wiaka bi Nasien-batsi tsu bi wul puu wiaka.

Pëcäts ni Këristu, pa pëka ubiira tsi nul

²⁰ Uci bi nda cäts bunk ni Këristu, a u tsu ind a nda pën tsi ngëko umundu, we ka wun a nduu luekandar tsi përo ngi ngëtsua ja ngi, pi nda wama ci biki umundu,

²¹ bi u jaka bi: “cäts jej, nin tsë juaban, nin tsë kërara!”

²² Ngëmënts ngi bëlieng, aci pa ngëko ngi ka coka ngi, uba ngul pëleempënaa. Par ngul aciina tsi ngëtsua bañaan-bajin, ni tsi bëjukan bukul.

²³ tsi ucär, ngëtsua pi ngëmënts ngun aja nga roon ngë naam aci kameko, undo ka tsu ñaan pëforsaar beenul përo ngi bëga, ni pëwelan-been pan cits pi pëcar, ni përean uliaful mak bërierul. Maa ngul kaats nin bëkat, aci këci tsi pësuetsan uliaf.