KAKÚRAN-KAWAR YEESU KRISTU BI JOŊ LEENŢ BI KUL AJA 9 - KARÚK-PËRIM KAWALU Nouveau Testament

Yeesu ayësan nalon niints nan bukandee bukuel

¹ Bi Yeesu kë par bi, a na win nalon niints nan bukandee bukuel.

² A bafetsul yepar aja: “Rabi, yën juban un, bi niintsi bëkanda bink bukuel, nul oo ban bukul biki-a?”

³ A Yeesu yank bukul aja: “Cits undo ajuban, te cits undo ban bukul biki ajuban; maa aci-undo uleemp Nasien-batsi pëpibanaa tsi nul.

⁴ Bi unu wama bink aci pënak, ngë ka përo uleemp na yëliini. Bërëm ka baandi, uwal wi ñaan dits wi ka yëlan pëleemp.

⁵ N wama n ci ba këci tsi umundu, nji n ci-un ufac umundu.”

⁶ Bi Yeesu ja bi ngëko ngan, a na túj tsi utsia. Ni itúj na ro bupot, a na tsu bul tsi këkës nakuel;

⁷ a na jaul: “tsëpan kii ñawa di pëwal Silowe,” un ci wi: Na yëlee. A nakuel tsëp, nee ñawa, a na witsee a nuu win.

⁸ Din, a bañaan pëcën, ni bañaan ban do biki ka winul a nuu ñaan, kë yepëlar koo ja: “Cits iink namëntsi ci-un nan don unk ka tsoar a nuu ñaan a?”

⁹ A balon kë ja: “Aciul” bacints kë ja: “Citsul, aci nalon na naami ni nul.” Nul bërierul, a na ja: “Aci nji.”

¹⁰ Maa, ba jaul: “A um bi këkësu waantsar bun?”

¹¹ Na yank aja: “Niints ni ka n jaka unk Yeesu, do un bëpot na kërin di këkës, a na jain: ‘tsëpan kii ñawa di Silowe.’ Din, a n tsëp ee ñawa, a nduka ka n win.”

¹² A ba jaul: “Aci tsum, namëntsnan?” A na yank aja: “Nji n meets.”

Bafariseu ci tsi pëtsas pëme bi nakuel yës bi ja

¹³ A ba tsëpand niints nando unk kuelëts di Bafariseu.

¹⁴ A u ro ci-unu-pënaakësa, wi Yeesu ro wun bëpot, na waantsënul këkës.

¹⁵ A Bafariseu yeparul bi na ro bi a nuu win. Na ja bukul: “Nul, atsuin bëpot di këkës, a n tsëp ee n ñawa, a ndu n win.”

¹⁶ Wul ka wun, a balon tsi Bafariseu kë ja: “Namënts nan, pënënatsi tsi Nasien-batsi, par mobats tsi përo ko un tsua wi tsi Unu-pënaakësa.” Maa bacints kë ja: “Um bi ñaan-najin, nul nan ci najuban, yëlan bun përo ngëpibanaani pi ngëmënts ngi?” Din, a manteelarats ci tsi bukul.

¹⁷ A ba kaka yepar nakuel aja: “A wi, wee kë ja wun tsi uleka na waantsu ink këkës?” A na yank bukul aja: “Aci nayëlia.”

¹⁸ Maa, Bajudeu fiaarats na ro ci nakuel a na ruka ka win; a ba tsënkëne rui bábukul.

¹⁹ A ba yepar bukul, aja: “Namëntsi ci-un abuk ind, ni nda jai abukanda bukuel-a? A um bi na ro bun a nuu win inkri?”

²⁰ A bábukul yank aja: “Wund ame namëntsi ci abuk wund, a na bëkanda bukuel.

²¹ Maa, bi na ro bi a na ruka ka win, wund meets; a na waantsuli këkës, wund meets. Nda yepariul, nul aci nawiak, ka leents bërierul ulekaul.”

²² Bábukul aja ko wan, undo bë lal Bajudeu; par Bajudeu abaar ba pëloole pa uci ñaa n ja Yeesu ci-un Këristu, bu ka pënanul di kato-kajúki.

²³ Wul ka wun bábukul ja: “Nul, aci nawiak, nda yepariul.”

²⁴ Din, a Bafariseu tëbants përui niints nandon unk kuelëts, a ba jaul: “Dëmbani Nasien-batsi; wund ame ñaan ni ci najuban.”

²⁵ A na ja bukul: “Uci na ci najuban, nji n meets. Ko uloole wi n me wun: man do n ci nakuel, maa inkri a ndu n win.”

²⁶ Maa ba kaka jaul: “We wi na rou wun? Um bi na waantsu bun këkës?”

²⁷ A na yank bukul aja: “Man leents ind ba, a nda teets. We ka wun a nda kaka ŋal pëte? Nda ŋalats përuka ci bafetsul buts-a?”

²⁸ Din a Bafariseu karul, ba jaul: “Wi ci-un ni kan fetsi namëntsnan; maa wund, wund aci bafets Moises.

²⁹ Nja ngë me Nasien-batsi ñakanaan Moises; maa namëntsi, wund meets tsi na pënë-ni tsi.”

³⁰ A niints yank bukul aja: “Ko wan apikran, bi nda meets bank tsi na pënë-ni tsi; maa nul waantsin un këkës.

³¹ Nja ngë me Nasien-batsi di ka cikëndën baro-ngëjuban, maa uci ñaan ci nalënk Nasien-batsi, a nuu ro uŋalul, namënts un Nasien-batsi ka cikëndënul.

³² Ki umundu juund ki, yaas a u tea ñaan waants këkës nan bukandee bukuel.

³³ Uci namëntsi roots pënë-ni tsi Nasien-batsi, bitse ka yëlan përo ko.”

³⁴ A ba yankul aja: “Wi nan bukee bëlieng tsi ngëjuban, a kë jukan wund-a?” A ba ruakul.

Bakuel tsi uwejats

³⁵ Yeesu te ba ruakul, a nuu winul, na jaul: “M wak tsi Abuk ñaan-najin-a?”

³⁶ A na yankul aja: “Ajug! Aci yën, pa nji pëwak tsi nul?”

³⁷ Yeesu jaul: “M winul; ni ka ñakan ink ni wi, ciul un.”

³⁸ A na ja Yeesu: “Ajug, ma wak!” A na yër ajintëlaul.

³⁹ Din, a Yeesu jaul: “Man bi tsi umundu wi, pa kawat-pëleents; pa ban dits biki ka win, bu kë win; a biki ka win biki, bu ka witsa ka ci bakuel.”

⁴⁰ A balon tsi Bafariseu ban ci biki tsi kawok Yeesu te ko wan, ba ja Yeesu: “A wund buts, wund aci bakuel-a?”

⁴¹ A Yeesu ja bukul: “Uci nda ro ci bakuel, nda bitse ka ka ujuban. Maa bi nda ja bink: ‘Wund awin;’ ujuban ind ka ruka unk.