KAKÚRAN-KAWAR YEESU KRISTU BI JOŊ LEENŢ BI KUL AJA 7 - KARÚK-PËRIM KAWALU Nouveau Testament

Ban tsaar biki ni Yeesu wakats tsi nul

¹ Bi ngëmënts ngan par bi, a Yeesu kë yaana pëboos Galileeya. Nul ŋalats pëyaana pëboos Judeeya, par Bajudeu ka tsas pëfiŋul.

² Maa bi ufesta Bajudeu, wi ngëkëb, ruka wi wokani,

³ a ban tsaar biki ni Yeesu jaul: “Pënan tsi, kë tsëp Judeeya, pa bafetsu buts pii win ngiicu, ngi kë ro ngi.

⁴ Par ñaan cits, ni kan tsasi pëmea tsi bërun bañaan, a nuu ro ngëko tsi kambeku. Uci bi kë ro bink ngëmënts ngi, pibandari bërieru tsi umundu.”

⁵ Par, ŋal ban tsaar biki ni nul, bë wakats tsi nul.

⁶ A Yeesu ja bukul: “Uwal nji netse band. Maa uwal ind aci-un ci wi, ngënu bëlieng.

⁷ Bañaan umundu yëlanats pëñaas ind; maa nji, bë ñaasin, par ma nja n doon ka leents ngi bu kë ro ngi ci nga waraatsa ngi.

⁸ Ind, nda kataan pëya ufesta. Nji, in di ka n kata pëya ufesta umënts wi, par uwal nji netse band.”

⁹ Bi Yeesu ba bi pëja ngëko ngan, a na ruka di Galileeya.

Yeesu aci di ufesta ngëkëb

¹⁰ Maa, bi ban tsaar biki ni nul kata bi atsëp ufesta, nul buts, na kata atsëp, pibandarats, maa aro pi abeka.

¹¹ A Bajudeu kë tsasul di ufesta, a bu kë ja: “Namënts nan aci tsum?”

¹² Tsi indënd bañaan, a u ka mŋëmŋëm mcumal tsi ulekaul; balon ka ja: “Aci ñaan na waree uwaas.” A bacints kë ja: “Nin a, aci na niaman bañaan.”

¹³ Unk, a kaats na yeentsi pëñakanaan ulekaul, par bë lal Bajudeu.

¹⁴ A bi ufesta ruka bi band umetaari, a Yeesu kata atsëp kato-kayëman, a nuu jukan.

¹⁵ Din, a Bajudeu pikra, a bu kë ja: “Um bi namëntsi me bun Bëpican, te jukats?”

¹⁶ A Yeesu yank bukul aja: “Bëjukan nji, cits bëmíñ, maa aci bi na yëliini.

¹⁷ Uci ñaan ŋal përo uŋal Nasien-batsi, në me ne bëjukan bi apënë-ni tsi Nasien-batsi, oo ne mán ñakan uleka nji bërierin.

¹⁸ Ñaan ni ka ñakandar ulekaul bërierul, namënts un ka tsas këtsas Përëmbul bërierul; maa, ñaan ni kan tsasi Përëmb na yëliuli, namënts un aci nacär, a kamabats cits tsi nul.

¹⁹ Moises wëlats ind iink ulua-a? Maa, nin naloole tsi ind roots ko wi ulua ja wi. A we ka wun, a nduu tsas pëfiŋin?”

²⁰ A kandënd bañaan yankul aja: “M tsij ucaay! Yën ka tsas un pëfiŋu?”

²¹ A Yeesu yank bukul aja: “Man do bawitsa bëloole rin, a nda pikra bëlieng.

²² Undo bi Moises tsu ind bi pëwelana kambac, a nda ja nduu welan upäts uyënts kambac tsi Unu-pënaakësa; te kul pënënatsi tsi Moises, maa apënë-ni tsi basin ind.

²³ Uci ñaan welana kambac tsi Unu-pënaakësa a umënts wun cokats ulua-Moises, a we ka wun nda riabatsarin, undo bi n yësan bi ñaan a n ba bëlieng tsi unu-pënaakësa-a?

²⁴ Nda tsañani pëja nduu wat pëleents ndë teenëna tsi bëci ñaan, maa nda watan pëleents tsi ko u mab wi.”

Ane Yeesu ci-un Këristu-a?

²⁵ A balon ban ciina biki Jerusalem kë ja: “Cits niints ni, ni bu kë tsas un pëfiŋ-a?

²⁶ Nda teenan-e, nul ka ñakan unk tsi pëncuaf bañaan, a bë jaatsul ko. Ane bawiak nja tsi ucär, bë niiran u ci namëntsi ci-un Këristu-a?

²⁷ Nja ngë me tsi namëntsi pënë-ni tsi; maa ubaandi Këristu, ñaan di ka me tsi nu pënë-ni tsi.”

²⁸ Bi Yeesu kë jukan bi di kato-kayëman, a na lie aja: “Ind nda mein, a nda me buts tsi n pënë-ni tsi! Nji n biits tsi uŋal nji bërierin, maa na yëliini aci nacär; ind nda meetsul.

²⁹ Nji man meul, par man pënë-ni di nul, a nul yëliin un.”

³⁰ Din, a bu kë tsas pëmobul, maa kaats ñaan na lakuli kañan, par Uwalul netse band.

³¹ tsi ko wan, a bacumal ban ci biki tsi kandënd bañaan wak tsi Yeesu, a bu kë ja: “Ubaandi Këristu, ane ka ro ngëpibanaani ngëwiak, ngan pe ngi ngi niints ni ro ngink-a?”

Bagaarir ayëla pii mobi Yeesu

³² A Bafariseu te kandënd bañaan kë ŋëmŋëm ngëmënts ngan tsi uleka Yeesu; din a bawiak-bajakan, ni Bafariseu, yël bagaarir kato-kayëman pa pii mobi Yeesu.

³³ A Yeesu ja bukul: “Man wama ci ni ind ko uties, a uu ba, ka tsëp di na yëliini.

³⁴ Nduu tsasin, maa nda ri ka winin; par di ndu n ci ri, nda ri ka yëlan pëbi rul.”

³⁵ A Bajudeu kë ja tsi ba ci tsi: “tsum tsi namëntsi pënar tsun, tsi ngë yëlanats tsi pëwinul? Ane ka fetsan bayiic nja ban garandar biki aband tsi Bagërek, në jukan bagërek-a?

³⁶ Wee pa pac wun, përim pi na ja pink: ‘Ndu tsasin, maa nda ri ka winin;’ ni: ‘Di n du n ci ri, nda ri ka yëlan pëbi rul.’”

Yeesu ci-un ukëpës mlik mi ka wël mi ubiira

³⁷ tsi unu utuami, un ci wi unu uwiak tsi ufesta, a Yeesu natsa anats, a na lië aja: “Uci ñaan lofënts, na bili tsi nji, në raan.

³⁸ Bi Bëpica n ja bi, na waki tsi nji: ‘Ibulaŋ mlik ubiira koo tulee di nul.’”

³⁹ Yeesu ja ko wan, uleka Uwejats-ujënts wi bawak tsi nul kii yank wi; par Uwejats-ujënts netse ro wëlaa, par Yeesu netse ro rëmbanaa.

Kandënd bañaan teelarats undo Yeesu

⁴⁰ tsi kandënd bañaan ban cikëndën biki irim yan, aka ban ci biki tsi pëja: “Aci ucär, ni ci-un nayëlia namënts un.”

⁴¹ A balon ci tsi pëja: “Nul ci-un Këristu.” Maa, bacints kë ja: “Ane di Galileeya di Këristu kë pënë-ni run-a?

⁴² Bëpica n jaats iink Këristu ka pënë-ni tsi kajër Dawid-a? A jaats iink nul ka pënë-ni Betëleem di Dawid ro ri ciina?”

⁴³ Unk, a kandënd bañaan teelarats tsi ba ci tsi, undo Yeesu.

⁴⁴ A balon tsi bukul ŋal pëmobul, maa ñaan lakatsul kañan.

⁴⁵ A bagaarir kato-kayëman witsa di bawiak-bajakan ni Bafariseu; a ba yepar bukul aja: “We ka wun nda tsijatsiul?”

⁴⁶ A bagaarir yank bukul aja: “Yaas a ñaan ka ñakan pi niintsi.”

⁴⁷ Din, a Bafariseu yank bukul aja: “Ind buts, nda falaa-a?

⁴⁸ Ane, aka nalon tsi bawiak, oo tsi Bafariseu, na waki tsi nul-a?

⁴⁹ Maa kandënd bañaan ba meets bikink ulua-Moises, bë ci tsi unjuatsia!”

⁵⁰ A Nikodemus, nan ci nalon tsi bukul, nul na doi bi tsi Yeesu, yepar bukul aja:

⁵¹ “Ane ulua nja ka lacan ñaan, te netse ñakan pa n ja pëme ko wi na ro wi-a?”

⁵² A ba yank Nikodemus aja: “M cits iink buts nan pënë-nii Galileeya-a? Teenan uwar, kë me, nayëlia di ka pënë-ni Galileeya.”

⁵³ A uja nan ci në tsëp katoul.