KAKÚRAN-KAWAR YEESU KRISTU BI JOŊ LEENŢ BI KUL AJA 6 - KARÚK-PËRIM KAWALU Nouveau Testament

Yeesu arialan kandënd bañaan

¹ Upar ngëmënts ngan, a Yeesu pën atsëp kalutar kacints, ki bërëk Galileeya, ban ci bi buts bërëk Tiberiadi.

² A bañaan bacumal kë fetsul, par bu win ngëko bawitsa ngëcumal ngi nuu ro ngi tsi bamoj.

³ A na tsëp ee paya untunda, a na tsoar rul ni bafetsul.

⁴ Ufesta-pëbuer, un ci wi ufesta Bajudeu, awokani.

⁵ A Yeesu kat këkës, a na win kandënd bañaan kawiak kë bi tsi nul, a na ja Filip: “tsum tsi nja kë weelëni tsun bariala pa bamënts biki përiala?”

⁶ Yeesu aja ko wan pa pëteenaman Filip, par nul ame ba ko wi na ka wi përo.

⁷ A Filip yankul, aja: “Ngëseent ngëtëb uncaam Dinaariu pa bariala, di ka kës bukul ñaan në ka ko uties.”

⁸ A nalon tsi bafetsul, ni ka n jakee Andëre, nan tsaari ni Simon Per, jaul:

⁹ “Nalon napäts niints aci tsi, a tsij këpom kañan ki ucímp, ni ngëtsëb ngëtëb ngëties; a wee nga kës wun pa bañaan biki bëlieng?”

¹⁰ A Yeesu ja bukul: “Nda tsuun bañaan ba tsoar.” Tsëko tsëmënts aro tsij pëtsats mak. A ba tsoar, bë ci ko pi bayënts ngëmiil kañan (5.000).

¹¹ Din, a Yeesu jej upom abaran, na fa wul ban tsoar biki. A na ro unk buts ni ngëtsëb, aa ba liingan bi ba ŋal bi.

¹² Bi ba suets bi, a Yeesu ja bafetsul: “Nda bofëlani itawësar indukësa yi, pa ko tsë niam.”

¹³ Unk, a ba bofëlan itawësar këpom kañan ki ucímp kan dea kunk, acuman këcaa untaaja ni këtëb.

¹⁴ Bi bañaan win bi bawitsa bi Yeesu ro bi, a ba ja: “tsi ucär, ni ci-un Nayëlia nan ka unk pëbi tsi umundu.”

¹⁵ A Yeesu me ba wejats pëbi pii mobul ni uyëlan ba tsuul nasien, a na pën kak ee paya untunda, nul koorul.

Yeesu ayandaar tsi ruets mlik

¹⁶ Uyër pëcaal, a bafets Yeesu juŋa tsëp te di bërëk.

¹⁷ A ba gija kanawa pëtsëp Kafarnaum di kalutar kacints. tsëko rëmënts ba, a Yeesu netse band di bukul.

¹⁸ A ufuts uwiak natsee, a bërëk kë siintsar mak.

¹⁹ Bi ba paat bi awokan ngënkilometar kañan pëya paaj, a ba win Yeesu kë yandaari tsi ruets mlik, awokani kanawa; a ba lënk.

²⁰ Maa a na ja bukul: “Aci nji, ind tsë lënk!”

²¹ A ba ŋal pëgíjul di kanawa; ucar umënts wun a kanawa band ucaak wi ba pënar wi.

Yeesu aci bariala ubiira

²² Ujënts unu, a kandënd bañaan ban dukee biki di kalutar kacints me u ci kanawa katies ruka kun dul, a te Yeesu gijaatsa kul, maa bafetsul tsëp bukun koor bukul.

²³ Maa ilon inawa baandi di kalutar Tiberiadi di kawok tsëko tsi ba reena tsi upom, tsi Ajug jejëna tsunk upom a na baran.

²⁴ Bi bañaan bacumal winats bi Yeesu di tsëko tsëmënts tsun, a nin bafetsul buts bu winaats, ba gija inawa atsëp Kafarnaum pa pëtsas Yeesu.

²⁵ Bi ba winul bi di kalutar bërëk kacints kun, a ba yeparul ajaul: “Rabi! Uwal uwom wi m baandi wun tsi?”

²⁶ A Yeesu yank bukul aja: “Mán leents ind ucär: Nda ci tsi pëtsasin; cits undo ngëpibanaani ngi nda win ngi, maa undo bi nda re bi upom a nda suets.

²⁷ Ind tsë leempar bariala bi kan coka bi, maa nda leempari bariala bi kan ci bi pa ubiira un dits wi ka ba, bul bi Abuk ñaan-najin kë wël ind bi. Par, nul ni Nasien-batsi, Asin, markaar un ni tampoŋul.”

²⁸ A ba yeparul aja: “We wi wund kë ro wun pa përo ngi Nasien-batsi?”

²⁹ A Yeesu yank bukul aja: “Wi ci wun uleemp Nasien-batsi: ind pëwak tsi ni na yëlii.”

³⁰ Din a ba jaul: “Wom upibanaani wi kë ro wun pa wund pëwin, wund ka wak tsi wi? Wee kë ro wun?

³¹ Basin nja bë re manaa di ulaalats, bi u picana bi di ulibëru Nasien-batsi, aja: ‘Awël bukul ba bariala ba pëni-ni bi batsi, pa ba re.’”

³² A Yeesu ja bukul: “Mán leents ind ucär: Cits Moises wël ind un bariala un pëni wi batsi, maa aci Asin nji ka wël ind un bariala ucär un pëni wi batsi.

³³ Par pëpom Nasien-batsi, aci nan pëni unk di batsi awelee, a nu wël bañaan umundu ubiira.”

³⁴ Din, a ba jaul: “Ajug, wël wund pëpom umënts wan ngënu bëlieng.”

³⁵ A Yeesu ja bukul: “Nji n ci-un pëpom pi ka wël pi ubiira; nan bii tsi nji, yaas a në bonats; a na waki tsi nji, yaas a në lofënts.

³⁶ Maa bi n ja ind bunk: Nda winin, maa nda netse wak.

³⁷ Bañaan biki Asin nji wëlin biki bëlieng, bu ka bi tsi nji; a nan bii tsi nji, yaas a ka gutsarul utsand.

³⁸ Par man welee di batsi, cits përo uŋal nji bërierin, maa uŋal na yëliini.

³⁹ A uŋal na yëliini ci wun wi: Pa nin naloole tsi biki na wëlin biki bëlieng tsë niamënin, maa nji pënatsani bukul di pëcäts, tsi unu utuami.

⁴⁰ Maa tsi ucär, bëŋal Asin nji ci bun bi: Ñaan na wini Abuk, a na wak tsi nul, në ka ubiira un dits wi ka ba. Nji, mee n natsaniul di pëcäts tsi unu utuami.”

⁴¹ Din, a Bajudeu ci tsi pëŋëmŋëm tsi uleka Yeesu, par aja: “Nji ci-un pëpom pa welee pi di batsi.”

⁴² A bu kë ja: “Namëntsi cits iink Yeesu, abuk Juse-a? Ngë meets iink asinul ni aninul-a? Aro um a na ja: ‘Man welee di batsi!’”

⁴³ A Yeesu yank bukul aja: “Nda wëtan mŋëmŋëm tsi nda ci tsi.

⁴⁴ Nin ñaan yëlanats pëbi tsi nji, ucits ba Asin nji, na yëliini, tsijiul un. A nji, mee n natsaniul di pëcäts, tsi unu utuami.

⁴⁵ Iink ri u picana run di ulibëru bayëlia: ‘Bu ka ci bëlieng biki Nasien-batsi jukan biki.’ Wul ka wun, ñaan nan cikëndëni Asin nji, a na niiran bëjukanul, ka bi tsi nji.

⁴⁶ Cits pëjaa ne ñaan win Asin, ucits ba nan pënë-ni unk tsi Nasien-batsi. Nul, awin Asin.

⁴⁷ Mán leents ind ucär: Na waki tsi nji, aka ubiira un dits wi ka ba.

⁴⁸ Nji n ci-un pëpom pi ka wël pi ubiira.

⁴⁹ Basin ind are manaa di ulaalats, a ba cäts aatsum.

⁵⁰ Maa, pi ci pun pëpom pa pëni punk batsi awelee, pa nan dei ba këre ko tsi pul, di ka cäts.

⁵¹ Nji n ci-un pëpom ubiira pa pëni punk batsi; uci ñaan de ko tsi pul, në ka ubiira pa sandëndën; a pëpom pi n du n wël pi pa bañaan umundu pëka ubiira, aci uyamats nji.”

⁵² Din, a Bajudeu ci tsi mantotëlër koo ja: “Um bi namëntsi yëlan bun pëwël nja uliaful bërierul ngë re?”

⁵³ A Yeesu ja bukul: “Mán leents ind ucär: Uci nda reets uliaf Abuk ñaan-najin a nda raanats pëñaakul, nda kaats ubiira tsi ind bërier ind.

⁵⁴ Nan dei uliaf nji a na raan pëñaak nji, aka ubiira un dits wi ka ba. Nji, mee n natsaniul di pëcäts, tsi unu utuami.

⁵⁵ Par, uliaf nji aci bariala bëcär, a pëñaak nji ci përaan pëcar.

⁵⁶ Nan dei uliaf nji a na raan pëñaak nji, ka mob tsi pëci tsi nji, a nji mán mob tsi pëci tsi nul.

⁵⁷ Bi Asin nji nan kai ubiira yëliin bink, a nji buts a n kaana ubiira tsi Asin nji, unk buts, ñaan ni n ci barialaul, në ka ubiira tsi nji.

⁵⁸ Pi ci pun pëpom pa pëni pi batsi awelee; naamats ni wi basin ind re wi, a ba cäts aatsum. Maa nan dei upom wi, në ka ubiira pa sandëndën.”

⁵⁹ Yeesu aja ngëmënts ngan, bi nu jukan bi di kato-kajúki Bajudeu di Kafarnaum.

Bafets Yeesu bacumal abërul

⁶⁰ Bi ba ba bi pëcikëndën irim Yeesu, a bacumal tsi bafetsul ja: “Irim yan abuer përíts; yën yëlan un pëcikëndën yul?”

⁶¹ Maa Yeesu me bërierul bafetsul ci tsi pëŋëmŋëm tsi uleka irim yan, a na ja bukul: “Ko wan acok ind ngëwaas-a?

⁶² A we kee ci wun, u ci ndee win Abuk ñaan-najin, a nu paya pëwitsa tsi na ro tsi ci ucäk?

⁶³ Uwejats ka wël wun ubiira, uliaf kaats bëkat. Irim nja ind yi, aci Uwejats, a i ci ubiira.

⁶⁴ Maa, aka balon tsi ind ba uwakats biki.” Par, ki ujuundi, Yeesu me ban fiaarats biki, ni ñaan ni ka yauli ufets.

⁶⁵ A na kaka ja: “Wul ka wun n ja ind: ñaan yëlanats pëbi tsi nji, uci Asin nji tsijatsiul.”

⁶⁶ Tsi uwal umënts wun, a bacumal tsi bafetsul kak ufets, bë katse yandaar ni nul.

⁶⁷ A Yeesu yepar bafetsul, untaaja bukun ni batëb, aja: “A ind buts, nda ŋalats pëtsëp-a?”

⁶⁸ A Simon Per yankul aja: “Ajug, di yën di wund kë ya run? Wi ka un irim i ka wël yi ubiira un dits wi ka ba.

⁶⁹ Wund awak a wund me u ci wi ci-un Nayëman, nan pënë-nii tsi Nasien-batsi.”

⁷⁰ A Yeesu yank bukul aja: “Ind untaaja ni batëb, cits iink nji n dat ind un-a? Maa nalon tsi ind aci Ujabël.”

⁷¹ Añakan ank tsi uleka Judas, abuk Simon Iskarioti. Par Judas yecis un pëyaul ufets, nul nan ci nalon tsi untaaja bukun ni batëb.