KAKÚRAN-KAWAR YEESU KRISTU BI JOŊ LEENŢ BI KUL AJA 5 - KARÚK-PËRIM KAWALU Nouveau Testament

Yeesu ayësan nalon niints nan kai basal

¹ Uba ngëmënts ngan, a u ka ufesta Bajudeu, a Yeesu kata atsëp Jerusalem.

² Maa di Jerusalem, tsi kawok Pëlëman Ngënkarnel, aka pëwal pi ka n jaka pi tsi uñakan Bayebëreu, Bet-sata. Pul, aka ngëkuëra kañan,

³ a bamoj bacumal kë ci tsul: bakuël, bajënk, baka-basal. [Bu ja ba roon bë ka piints tsul koo lip usiintsar mlik.

⁴ Par, ulon uwaanju aja u roon u welee tsi ulon uwal tsi pëwal pëmënts pun, u siints-siintsan mlik; a namoj nacak na welee di mlik uba mul pësiintsar, në yësana pëmaak pi na ka pi ba këka.]

⁵ A u ka tsul nalon niints nandoi ngëwaanu ngëntaaja ngëwaants ni këwas tsi pëmaak.

⁶ A Yeesu win na piints, a na me na jon ki na ci ki unk, a na jaul: “M ŋal pëyësana-a?”

⁷ Nul namoj yankul aja: “Ajug! Nji n kaats ñaan ni ka welanini di Pëwal, uler wi mlik siintsar wi. Ma n ja ndu n ya pëwela, nalon ka welain bërun.”

⁸ A Yeesu jaul: “Natsaan, jejan pëyoongiau kë yandaar.”

⁹ Ucar umënts wun, a niints namënts un yës, a na jej pëyoongiaul a na tsëp. Unu umënts wun aro ci-unu-pënaakësa.

¹⁰ A Bajudeu ja niints na yësana unk: “Aci-unu-pënaakësa; ulua apoku pëtsëpand pëyoongiau.”

¹¹ A na ja bukul: “Na yësanini, nul bërierul jain un: ‘Jejan pëyoongiau kë yandaar.’”

¹² Ba yeparul aja: “Naom ñaan ci-un na n jaui: ‘Jejan pëyoongiau kë yandaar?’”

¹³ A kayësana katse me ñaan namënts, par Yeesu apën tsul, te bañaan cum mak.

¹⁴ Bi ngëmënts ngan par bi, a Yeesu bi winul di kato-kayëman, a na jaul: “Teenan-e, m kak m yës; cats juban kak, pa un pe wi pëjuats përits baandë-niu.”

¹⁵ A niints namënts un tsëp ee leents Bajudeu u ci Yeesu yësanul un.

¹⁶ Wul ka wun Bajudeu kë noor-nooran Yeesu, bu kë tsasul pëfiŋ, par aja na roon nuu ro ngëmënts ngan tsi Unu-pënaakësa.

¹⁷ A Yeesu ja bukul: “Asin nji aci tsi uleemp te inkri, nji buts man ci tsi uleemp.”

¹⁸ Wul ka wun Bajudeu ru pe këpe pëtsas pëfiŋul, par cits undo bi na rispiitaarats bi Unu-pënaakësa, maa aja, Nasien-batsi bërierul, ci-un Asinul, unk atsu beenul aci Nasien-batsi.

Pëyëlan pi Abuk Nasien-batsi ka pi

¹⁹ A Yeesu yank bukul aja: “Mán leents ind ucär: Abuk yëlaants përo ulon ko bërierul, ucits ba wi na win wi Asindo. Par ko wi Asin kë ro wi, Abuk buts, unk di nu ro run wul.

²⁰ Par Asin aŋal Abuk, a na ja na roon në pibanul ngi nuu ro ngi bëlieng. Kee na pibanul ngan pe ngi ngi përëmb, pa ndë pikra.

²¹ Par, bi Asin kë natsani bunk bacäts në wël bukul ubiira, unk buts, Abuk ka wël ubiira pa biki na ŋal biki pëwël.

²² Te, Asin di ka wat ñaan pëleents, maa awël Abuk kawat-pëleents kan ci ki-ba këci,

²³ pa bañaan bëlieng përëmban Abuk bi ba rëmban bi Asin.

²⁴ Mán leents ind ucär: Nan tei përim nji a na wak tsi na yëliini, aka ubiira un dits wi ka ba; di ka wata pëleents, apar ba tsi pëcäts pa ubiira.

²⁵ Mán leents ind ucär: Uler ka bi, te wul band wink, wi bacäts kë te wi përim Abuk Nasien-batsi, a ban te biki pul, bu ka ka ubiira.

²⁶ Par, bi Asin ka bunk ubiira tsi nul bërierul, unk buts di Abukul ka run ubiira tsi nul bërierul.

²⁷ A na wëlul pëyëlan pa na wat pëleents, par nul ci-un Abuk ñaan-najin.

²⁸ Ind tsë pikra tsi umënts wan, par uler ka band, wi bacäts bëlieng ban ci biki di ibëk kë te wi përimul.

²⁹ Bando biki úwar ka natsee pa ubiira, a bando biki útsëtsuel ka natsee pa kawata-pëleents.

³⁰ Nji, in yëlaants përo ko bërierin; a bi n te bi, unk ri ka n wat run pëleents; a kawat-pëleents nji ci kamabal, par in di ka n tsas uŋal nji, maa uŋal na yëliini.

³¹ Uci n do ka leents uleka nji bërierin, ko wi n du n leents wi bitse ka ci ucär.

³² Aci nalon ka leents un uleka nji, a me koon, ko wi në leents wi tsi uleka nji aci ucär.

³³ Ind, nda yël bañaan di Joŋ, a na leents uleka ucär.

³⁴ Nji, cits pëjaa mán niiran ko wi ñaan-najin leents wi, maa ma nja ank, pa ndë buer.

³⁵ Joŋ aro ci ulamp wi ka yëk wi, a uu fiets; a ind, nda ro ŋal pëlilan tsi ufacul, tsi uwal un jonats wi.

³⁶ Maa nji, ko wi n ka wi pa pëleents, ape wi Joŋ. Par, ngi Asin nji wëlin ngi përo n ba, ngul, ngi n ci ngink tsi përo, apiban uleka nji, u ci Asin nji yëliin un.

³⁷ Asin nji na yëliini, nul bërierul aleents uleka nji. Maa nda teets përimul yaas, nin nda winats bënaamul;

³⁸ a përimul cits di ind, par nda wakats tsi ni na yëlii.

³⁹ Nda ja nda roon nduu tsas tsi Bëpican, par nda wejats pëkaana tsi bul ubiira un dits wi ka ba. Te, bul Bëpican, ci bun tsi pëleents uleka nji.

⁴⁰ Maa a nda ŋalats pëbi tsi nji pa ndë ka ubiira.

⁴¹ Përëmb, nji n yankats pul tsi bañaan-bajin.

⁴² Maa man me ind uwar, nda kaats bëŋal Nasien-batsi tsi ngëwaas ind.

⁴³ Nji, man biini tsi katim Asin nji, a nda niiraantsin. Maa uci nalon bi tsi katimul bërierul, ndë niiran namënts un.

⁴⁴ Um bi nda yëlan bun pëwak? Ba nda ja nan dooni nu yank Ubëdan tsi bacintsul, a nda ri ka tsas Përëmb pa pënë-ni pi tsi Nasien-batsi baŋ.

⁴⁵ Ind tsë ja ne mán tumtsar ind tsi bërun Asin nji; ni kan tumtsar indi aci Moises, ni nda watsaraani.

⁴⁶ Par uci nda ro wak tsi Moises, nda bi ka wak tsi nji, par aci uleka nji wi na pican wun.

⁴⁷ Uci nda wakats tsi ngi na pican ngi, um bi nduu wak bun tsi irim nji?”