KAKÚRAN-KAWAR YEESU KRISTU BI JOŊ LEENŢ BI KUL AJA 4 - KARÚK-PËRIM KAWALU Nouveau Testament

Yeesu, ni ŋaats nan pënë-nii Samaaria

¹ Bi Yeesu me bi Bafariseu te u jaka atsu bañaan pëci bafetsul, a nuu mijan bañaan apean Joŋ,

² — te cits Yeesu bërierul ka mijan un bañaan, maa aci bafetsul —

³ a na pën tsi Judeeya awitsa Galileeya.

⁴ A te nul aka pëpar-na bi Samaaria pëwitsa Galileeya.

⁵ A na band pëlon përaasa pan ciina pi Samaaria, pi ka n jaka pi Sikar, tsi kawok bërig bi Jakob wël bi abëkul Juse.

⁶ Pëlik Jakob aci tsul. A Yeesu noor tsi bëyaas, a na tsoar tsi karuj pëlik. Aci uwokan uson-unu.

⁷ A nalon ŋaats nan pënë-nii Samaaria bi kalik mlik. A Yeesu jaul: “tseendin përaan.”

⁸ A bafetsul ro ya përaasa pa pëweel bariala.

⁹ A ŋaats Nasamaaria jaul: “Wi nan ci Najudeu, um bi kë ñaanin bun përaan, nji nan ci ŋaats Nasamaaria?” — Par Bajudeu ni bañaan Samaaria bë teelarats —

¹⁰ A Yeesu yankësul ajaul: “Uci m do me bëtseend Nasien-batsi, ni na n jaui tseendin përaan, wi bi ka ñaanul, nul në wëlu mlik ubiira.”

¹¹ A ŋaats jaul: “Ajug, m kaats ko wi kë likëna wi, te pëlik awand; tsum tsi kë kaana tsun mlik ubiira man?

¹² Ane wi m pe Jakob pëci nawiak, nul asin wund, na wël wundi pëlik pi. Nul bërierul araan mlik pul ni babukul, ni ngëncaamul.”

¹³ A Yeesu jaul: “Ñaan daan mlik mi, në wama ka lofënts,

¹⁴ maa ñaan daan mlik mi ndu wëlul mi, di ka lofënts yaas; par mlik mi ndu wëlul mi ka witsa man ci ukëpës tsi nul, wi kan këpësi wi mlik pa ubiira un dits wi ka ba.”

¹⁵ A ŋaats jaul: “Ajug! Wëlin mlik man, din in dits n kaka lofënts, in dits n kaka n bi pëlik mlik tsi.”

¹⁶ Din a Yeesu jaul: “tsëpan kii rui ayënu, kë witsee tsi.”

¹⁷ A ŋaats yankësul ajaul: “Nji n kaats ayën nji.” A Yeesu jaul: “M leents ucär, bi m ja bank nji n kaats ayën nji.

¹⁸ Par m do ka bayënu, kañan; a ni m ka ink inkri, cits ayënu. Ko wi m ja wank aci ucär.”

¹⁹ A ŋaats jaul: “Ajug! Man win m ci nayëlia.

²⁰ Par, basin wund aro ka jintëla Nasien-batsi tsi ngëtúnda ngi; maa ind Bajudeu nda ja, tsëko tsi kan jintëlaana tsi Nasien-batsi, aciina Jerusalem.”

²¹ A Yeesu yankul, ajaul: “Ŋaats! Fiaarin. Uler ka band, wi nda rits wi ka jintëla Asin, nin tsi untunda wi, nin di Jerusalem.

²² Ind, nda ja nda roon nduu jintëla ni nda meetsi; wund, wund kë jintëla ni wund mei, par ubuerëni apënë-ni tsi Bajudeu.

²³ Maa uler ka band, aci inkri, wi bajintëla bacar kë jintëla wi Asin ni uwejats, ni ucär. Par bajintëla pi bamënts bëkun, ci bëkun biki Asin kë tsas biki.

²⁴ Nasien-batsi aci Uwejats, a biki kan jintëlaul biki, bë ka puu jintëlaul ni uwejats, ni ucär.”

²⁵ A ŋaats jaul: “Ma me Mesia kë bi, nul ni kan duee Këristu; ubaandiul në leentsi njangë ko bëlieng.”

²⁶ A Yeesu jaul: “Nji n ciul un, ni ka ñakanaanu ink.”

²⁷ Din a bafetsul baandi, a ba pikra tsi bi na ci bi tsi pëñakan ni ŋaats. Maa, ñaa n jaatsul: “Wee kë yepar wun?” Oo: “We ka wun a kë ñakan ni nul?”

²⁸ Din, a ŋaats ruk tsul pëliikiul a na pën atsëp përaasa ee ja bañaan:

²⁹ “Nda bili-e ndë win ñaan na leentsini ngi n do ngi bëlieng. Ane citsul ci-un Mesia a?”

³⁰ Din a ba pëni di përaasa abi tsi Yeesu.

³¹ tsi uwal wi ŋaats tsëp wunk, a bafets Yeesu kë jaul: “Rabi! Dialaan.”

³² Maa a Yeesu ja bukul: “Man ka bariala bi ndu n de bi, ind nda meets bul.”

³³ A bafetsul kë yepëlar koo ja: “Ane nalon ñaan a tsijiul kare-ko-a?”

³⁴ A Yeesu ja bukul: “Bariala nji aci përo uŋal na yëliini, ni pëtuam uleempul.

³⁵ Nda ja nda roon nda ri ka ja iink, aruka këlí këbaakër uwal kacët ka band a? Maa nji, má n ja ind: Nda katan-e këkës, ndë teen mleempëna bi ma njank bi, aband kacët.

³⁶ Nacët ka yank bëluk, në jukëlën mbuk pa ubiira un dits wi ka ba. Unk, nagur ka bof ulílan ni nacët.

³⁷ Par un jaka wink, aci ucär: ‘Nalon aci ni kan guri, a nacints nun ci ni kan cëti.’

³⁸ A nji ka n yël ind ink kacët tsi tsëko tsi nda leempats tsi; balon do bukun cíb tsi uleemp, a nda rukee yank bëkat uleemp bukul.”

³⁹ A bañaan Samaaria bacumal di përaasa pëmënts pun wak tsi Yeesu, undo ko wi ŋaats leents wi aja: “Aleentsin ngi n do ngi bëlieng.”

⁴⁰ Bi bañaan Samaaria bi bi tsi Yeesu, a ba ñaanul pa na ruka ni bukul; a na ruka rul aro ngënu ngëtëb.

⁴¹ A bañaan bacumal mak wak tsi nul, undo përimul.

⁴² A ba ja ŋaats: “Inkri, cits undo ko wi m ja wi rin ka wun wund wak; par wund bërier wund ateul, wund ame nul cara un aci Nabuëran umundu.”

Yeesu ayësan abuk nalon nawiak basondaari nasien

⁴³ Bi u par bi ngënu ngëtëb, a Yeesu pën tsul atsëp Galileeya.

⁴⁴ Par nul Yeesu bërierul aja: “Nayëlia di ka rispiitaara tsi ucaakul.”

⁴⁵ A bi na band bi Galileeya, bañaan Galileeya welanul uwar; par bukul buts bë ro ya ufesta, a ba win ngëko bawitsa ngi na ro ngi di Jerusalem, unu umënts wun.

⁴⁶ A Yeesu kaka bi Kana Galileeya, di na wítsëna ri mlik aro pëwat. A u ro ka nalon nawiak basondaari nasien, ni abukul niints maaki di Kafarnaum.

⁴⁷ Bi na te bi u jaka Yeesu pëni Judeeya abaandi Galileeya, a na ya di nul ee buaraul na bi nii yësan abukul niints ni kan tsasi pëcäts.

⁴⁸ A Yeesu jaul: “Uci nda winats ngëpibanaani, ni ngëko ngan pikran ngi, nda ri ka wak, yaas.”

⁴⁹ A nawiak basondaari nasie n jaul: “Ajug! Júŋee, tsini abuk nji kë cats.”

⁵⁰ A Yeesu jaul: “tsëpan, abuku, aci nayësal.” A niints wak tsi përim pi Yeesu jaul pi, a na tsëp.

⁵¹ Bi nu witsa bi, a baleempul bi ee jëk ni nul, a ba jaul, abukul aci nayësal.

⁵² A nawiak basondaari nasien yepar bukul uler wi na mat wi; a ba jaul: “Taakal, tsi ucëta-unu, wi pëmaak pën wun tsi nul.”

⁵³ Din, a asin napäts me u ro ci uler wi Yeesu jaul wunk: “Abuku aci nayësal.” A na wak, nul ni bañaan katoul bëlieng.

⁵⁴ Umënts wi ci wun upibanaani utëbantsan wi Yeesu ro wi, bi na pëni bi Judeeya abaandi Galileeya.