KAKÚRAN-KAWAR YEESU KRISTU BI JOŊ LEENŢ BI KUL AJA 21 - KARÚK-PËRIM KAWALU Nouveau Testament

Yeesu apibandar tsi kawok bërëk

¹ Bi ngëko ngan par bi, a Yeesu kaka pibandar tsi bafets, tsi kawok bërëk Tiberiadi. Iink di na pibandar run:

² Bë júk tsëloole, aci Simon Per, ni Tomaas, ni ka n jakee Diidimus, ni Natanael kanpënë-ni Kana di pëboos Galileeya, ni babuk Sebede, ni balon batëb tsi bafetsul.

³ A Simon Per ja bukul: “Mán tsëp babuëts.” A ba jaul: “Wund ka tsëp buts ni wi.” A ba pën ee gija kanawa. tsi bërëm bëmënts bun, bë mobats ko.

⁴ Ujënts unu, a Yeesu nats tsul tsi kambaŋ bërëk. Maa bafets roots me ne aciul.

⁵ A Yeesu ja bukul: “Upats! Cits nda kaats utsëb-a?” A ba yankul aja: “Nin a.”

⁶ Din, a na ja bukul: “Nda gutsari pëtseenk kajara kariir kanawa, ndë ka.” A ba guts pëtseenk, maa bë yëlaants pëtoti pul, par acum ngëtsëb mak.

⁷ A nafets ni Yeesu ŋal unk ja Per: “Aci Ajug!” Bi Simon Per te bi u jaka aci Ajug, na tiema iŋiul, par aro tiemësar; a na cat ayër di bërëk.

⁸ Maa, bafets bacints bukun bi ni kanawa katies, bu kë púuli pëtseenk ni ngëtsëb, par bë roots lawan kankay, aci ko pi ngëmetar useent.

⁹ Bi bu kë katee bi kankay, a ba win tsul ijuas bërua, a ngëtsëb pafa tsi ruëts yul, ni upom.

¹⁰ A Yeesu ja bukul: “Nda tsiji-e ngëlon tsi ngëtsëb ngi nda ru ba ink pëmob!”

¹¹ A Simon Per gija kanawa, a na puular pëtseenk kankay, pul pan cum pi ngëtsëb ngëwiak; aci ngëtsëb useent ni ngëntaaja kañan ni ngëtsëb ngëwaants. Maa ŋal bi ngëtsëb liing bank, pëtseenk tawaatsa.

¹² A Yeesu ja bukul: “Nda bili ndë re.” Nin naloole tsi bafets yeentsats pëyeparul na ja: “Wi m ci yën-i?” Par bë me u ci Ajug.

¹³ A Yeesu bi, na jej upom, na wël bukul; a na ro unk buts ni ngëtsëb.

¹⁴ A umënts wi ci uyaas uwaajantsan, wi Yeesu pibandar wi tsi bafets, bi na natsee bi di pëcäts.

Yeesu añakanaan Per

¹⁵ Bi ba ba bi bariala, a Yeesu yepar Simon Per aja: “Simon, abuk Joŋ, m pe biki pëŋalin-a?” A na yankul, aja: “Eey-e Ajug, m me n ŋalu.” A Yeesu jaul: “Këmandi ngëbuk ngënkanel nji.”

¹⁶ A na kaka yeparul uyaas utëbantsan, aja: “Simon, abuk Joŋ, m ŋalin-a?” A Per yankul, aja: “Eey-e Ajug, me ŋalu.” A Yeesu jaul: “Yafani ngënkanel nji.”

¹⁷ A Yeesu kaka yeparul uyaas uwaajantsan, aja: “Simon, abuk Joŋ, m ŋalin-a?” A Per juatsan bi na jaul bi uyaas uwaajantsan: “M ŋalin-a?” A na yankul aja: “Ajug, wi m me ngëko bëlieng; m me n ŋalu.” A Yeesu jaul: “Këmandi ngënkanel nji.

¹⁸ Mán leentsu ucär: Bi m do bi ci upaas, m do ja m doon kë tiemandar bërieru, kë tsëp tsi m ŋal tsi; maa utsafu, kë ja m colan iñan, nalon ka tiemanu, në tsëpandu tsi m ŋalats tsi.”

¹⁹ Yeesu aja ko wan, pa pëpibanaan pëcäts pi Per kii rëmbanaan pi Nasien-batsi. Bi na ba bi pëja ank, a na jaul: “Fetsin.”

²⁰ Din a Per kë witsësa, a na win nafets ni Yeesu ŋal unk ci tsi pëfetsiul; nul ci-un nan do unk ragara tsi bëjínc Yeesu bi ba ci bi tsi kare ufëri a na jaul: “Ajug! Yën ci-un ni ka yaui ufets i?”

²¹ Bi Per winul bi, a na ja Yeesu: “Ajug! A niintsi, we ka baandë-niul wun-i?”

²² A Yeesu yankul aja: “Uci n ŋal na ci te ubi nji, wee m ka wun tsul? Wi, fetsin.”

²³ A ko wan ñakanaana tsi ban tsaar biki tsi Këristu, ajaka, nafets namënts un di ka cäts. Maa, Yeesu jaats, nafets namënts un di ka cäts; maa aja: “Uci n ŋal na ci te ubi nji, wee m ka wun tsul?”

²⁴ Nafets namëntsi, ci-un ni ka leents ink uleka ngëko ngi, a nul pican un ngul. A wund me, ko wi na leents wi aci ucär.

²⁵ Aka buts ngëlon ngëcumal ngi Yeesu ro ngi. Uci nga ro picana bëlieng uloole uloole, man fiaar, ngëlíbëru ngi kan picana ngi, di ka yëla ŋal umundu upëban.