KAKÚRAN-KAWAR YEESU KRISTU BI JOŊ LEENŢ BI KUL AJA 20 - KARÚK-PËRIM KAWALU Nouveau Testament

Yeesu anatsee di pëcäts

¹ tsi unu ucäk kanëm, tsi ufa-unu, tsëko wama rëmënts, a Maaria kanpënë-ni Magëdala tsëp di pëbuk, a na win pëlaak pënana tsi pëbuk.

² Din, a na túk atsëp di Simon Per, ni nafets ni Yeesu ŋal unk, a na ja bukul: “Ajug apënanaa di pëbuk, wund meets tsi na tsua tsi!”

³ A Per pën ni nafets nacints nun, a ba tsëp di pëbuk.

⁴ A ba túk bëlieng bukul batëb, maa nafets nacints nun pe Per pëcar, a na bandul bërun di pëbëk.

⁵ A na ŋëp, a na win ileenj tsi i júkana tsi, maa niajats.

⁶ A Simon Per runaniul, a na baandi ee niaj di pëbëk, a na win buts ileenj tsi i júkana tsi.

⁷ Pëfaal pando pi tsua tsi been Yeesu, cits tsi ileenj, maa abuatsa apatsana tsi kalon kaleka.

⁸ Din, a nafets nacints nun, nan cakës unk pëband pëbëk, niaj buts, a na win, a na wak.

⁹ Par, bë netse ro me ko wi Bëpican pac wi, bul ban piban bi Yeesu ka na roon në natsee tsi bacäts.

¹⁰ A bafets bamënts bukun pën atsíis.

Yeesu apibandar tsi Maaria kanpënë-ni Magëdala

¹¹ A Maaria nats di utsand tsi kawok pëbëk, a nuu rug. Bi na ci bi tsi irug, a na ŋëpar uleka bametsu pëbëk,

¹² a na win ngëwaanju ngëtëb nga tiema ngi iŋi ifaacal, a nga tsoar tsi tsëko tsi puum Yeesu ro tsi tsuaa; ulon atsoar tsi ubuuru been, a ucints tsoar tsi ubuuru itsiim.

¹³ A nga ja Maaria: “Ŋaats, wee kë rug wun?” A na yank ngul aja: “Bë tsëpand Ajug nji, a nji n meets tsi ba tsuul tsi.”

¹⁴ Bi na ba bi pëja ko wan, a na witsësëra ufets, na win Yeesu nats, maa meets ne aci Yeesu.

¹⁵ A Yeesu jaul: “Ŋaats, wee kë rug wun? Yën ni kë tsas un?” A na ja ne aci nawaay uwoorta, a na jaul: “Ajug, uci wi jejul un, leentsin tsi m tsuul tsi, ka jejiul.”

¹⁶ A Yeesu jaul: “Maaria!” A Maaria witsësa ajaul tsi ulíingu uyebëreu: “Rabëni!” Un ci wi, Najukan.

¹⁷ A Yeesu jaul: “tsë kërarain, par nji n netse n paya di Asin nji. Maa tsëpan di ban tsaar biki ni nji, kë ja bukul, mán paya di Asin nji, nul Asin ind, di Nasien-batsi nji, nul Nasien-batsi ind.”

¹⁸ Din, a Maaria kanpënë-ni Magëdala tsëp ee leents bafets na win Ajug, a Ajug jaul ngëmënts ngan.

Yeesu apibandar tsi bafetsul untaaja

¹⁹ tsi uyër pëcaal unu umënts wun, un ci wi unu ucäk kanëm, a ilëman tsëko tsi bafets ci tsi nigana, undo bë lal Bajudeu. A Yeesu baandi ee nats tsi pëncuaf bukul, a na ja bukul: “Pëfac pa ciin ni ind!”

²⁰ Bi na ja bi ko wan, a na piban bukul iñanul, ni katiañul. A bafets lílan, undo bu win Ajug.

²¹ A Yeesu kaka ja bukul: “Pëfac pa ciin ni ind! Bi Asin nji yëliin bink, unk buts di n du n yël ind run.”

²² Bi na ba bi pëja ko wan, a na futsar bukul, na ja bukul: “Nda yankan Uwejats-ujënts.

²³ Biki nda jampësa biki ngëjuban, bu ka jampësaa; a biki nda jampësaats biki, bë ri ka jampësaa.”

Kakaats-uwak Tomaas

²⁴ A Tomaas, nul nan ci nalon tsi untaaja bukun ni batëb, a nuu jaka Diidimus, roots ci ni bukul uwal wi Yeesu bi wi tsi bukul.

²⁵ A bafets bacints buku n jaul: “Wund awin Ajug!” Maa a Tomaas ja bukul: “Uci n winats ba ngëlu iregu tsi iñanul, a n tsuuts pëkuanj tsul, a n tsuuts kañan tsi katiañul, in di ka n fiaar yaas.”

²⁶ A u par ngënu këwas, a bafetsul kaka ci di bametsu, a Tomaas ci ni bukul. Ŋal bi ilëman nigana bi, a Yeesu baandi ee nats tsi pëncuaf bukul, a na ja: “Pëfac pa ciin ni ind!”

²⁷ Din a na ja Tomaas: “Baandani pëkuanju tsi, kë teen iñan nji; baandani kañanu kë tsu tsi katiañ nji. cäts ci narika-wak, maa ciin nawak.”

²⁸ A Tomaas yankul, aja: “Ajug nji, Nasien-batsi nji!”

²⁹ A Yeesu jaul: “Tomaas! Undo m winin, a m wak-a? Bu naak, ba winats biki a ba uwak.”

³⁰ Yeesu aroond ngëlon ngëpibanaani ngëcumal tsi bërun bafetsul, ngan picanaatsa ngi tsi ulibëru wi.

³¹ Maa, ngëko ngi apicanaa, pa ind pëfiaar u ci Yeesu ci-un Mesia, Abuk Nasien-batsi, pa uwal wi nda ci wi tsi pëwak, ndë ka ubiira tsi katimul.