KAKÚRAN-KAWAR YEESU KRISTU BI JOŊ LEENŢ BI KUL AJA 2 - KARÚK-PËRIM KAWALU Nouveau Testament

Bënim di untab Kana

¹ tsi unu uwaajantsan, a bënim dolaa di untab Kana, di Galileeya; anin Yeesu aci rul.

² A Yeesu do ruura buts pëmaatiir bënim ni bafetsul.

³ Bi pëwat ba bi, a anin Yeesu jaul: “Bu katse ka pëwat.”

⁴ A Yeesu jaul: “Ŋaats, we ci wun tsi nji ni wi? Uwal nji netse band.”

⁵ Din, a aninul ja baleemp: “Ko wi na ja ind wi-ba këja, nda rolan wul.”

⁶ A u ro ka këliiki paaj ka leempëna ki ilaak, kan tsua ki tsul pa Bajudeu puu jëntsandaraan; a uja kara pëliiki, pë yëlan ilitar ngëntaaja këwas, oo ilitar useent ni ngëntaaja ngëtëb.

⁷ A Yeesu ja bukul: “Nda cumani iliiki yi mlik.” A ba cuman yul te di iruj.

⁸ A na ja bukul: “Nda likan, ndë rëŋan namuan.” A ba rëŋan.

⁹ Bi namuan mel bi mlik ma witsaa mi pëwat, a meets tsi pëwat pëmënts pun pënë-ni tsi. Maa baleemp ame, par bukul lik bukun mlik. A namuan dui nanim,

¹⁰ a na jaul: “Bañaan bëlieng ka cakësaan pëfa bërun pëwat pëlílal, a uwal wi bañaan daan wi a ba kësan, bu ka ruka pënani pan buërats punk pëlíl. Maa wi, m gaang pëwat pëlílal te inkri.”

¹¹ Yeesu ro ko wan di Kana Galileeya; ci wun ujuundi ngëpibanaani; apiban përëmbul, a bafetsul wak tsi nul.

¹² Bi ko wan par bi, a Yeesu juŋa atsëp Kafarnaum, ni aninul, ni ban tsaar biki ni nul Yeesu, ni bafetsul; a ba ro rul ngënu ngan dëmbats ngi.

Yeesu ajëntsan kato-kayëman

¹³ Bi Ufesta-pëbuer, wi Bajudeu wokani bi, a Yeesu kata atsëp Jerusalem.

¹⁴ A na tsënk bawaap ngëyët-ngëkas, ni ngënkanel, ni ngëtuuba di kato-kayëman, a batsëtsëlan uncaam tsoar.

¹⁵ A na leemp pëlumbaj icär, a na ruak bukul bëlieng apënan di kato-kayëman, na ruakand ngëyët-ngëkas ni ngënkanel; a na gar-garan uncaam-utsak batsëtsëlan, na kuutës ngëntabël,

¹⁶ a na ja bawaap ngëtuuba: “Nda pënani ngul tsi! Ind tsë ro kato Asin nji kato pëjúla.”

¹⁷ A bafetsul les u picanaa aja: “Bëŋal bi n ŋal bi katou ka fiŋin.”

¹⁸ A Bajudeu yeparul aja: “Wom upibanaani ka piban wund wun m yëlan përo ngëko ngi?”

¹⁹ A Yeesu yank bukul aja: “Nda watan kato-kayëman ki, tsi ngënu ngëwaants ka n natsan kul.”

²⁰ Din, a Bajudeu jaul: “Kato-kayëman ki, aleempa ngëwaanu ngëntaaja ngëbaakër ni paaj, a ka ru ba; a wi m ja, tsi ngënu ngëwaants kë natsan kul-a?”

²¹ Maa kato-kayëman ki Yeesu ja kank, aci uliaful.

²² A bi Yeesu natsee bi di pëcäts, a bafetsul les na ro ñakanaan bukul ko wi, a ba uwak tsi Bëpican, ni tsi përim pi na ja pi bukul.

²³ Bi Yeesu ci bi di Jerusalem tsi Ufesta-pëbuer, a bañaan bacumal win ngëpibanaani ngi nuu ro ngi, a ba uwak tsi katimul.

²⁴ Maa Yeesu, nul, fiaarats bukul, par ame bañaan bëlieng,

²⁵ a fierats pëleentsa ko tsi uleka ñaan-najin, par nul bërierul ame ko un ci wi tsi ñaan-najin.