KAKÚRAN-KAWAR YEESU KRISTU BI JOŊ LEENŢ BI KUL AJA 17 - KARÚK-PËRIM KAWALU Nouveau Testament

Yeesu añaandar bafetsul

¹ Bi Yeesu ba bi pëja ngëmënts ngan, a na katar këkës batsi, a na ja: “Paapa, uler aband. Rëmbani Abuku, pa Abuk ka rëmbanu,

² bi m wëlul bunk pëyëlan tsi ruëts bañaan-bajin bëlieng, pa na wël ubiira un dits wi ka ba, pa biki m wëlul biki bëlieng.

³ A ubiira un dits wi ka ba, aci bukul pëmeu, wi rin Nasien-batsi nacär, ni Yeesu Këristu, nul ni m yëlii.

⁴ Man dëmbanu tsi umundu, a n bandan uleemp wi m wëlin wi përo.

⁵ A inkri, Paapa, rëmbanin tsi wi bërieru, ni përëmb pi n ka pi tsi wi, bi umundu netse bi leempa.

⁶ Bañaan biki m pënani biki di umundu a m wëlin, man tsu bukul a ba me katimu. Bu ro ci bayiicu, a m wëlin bukul, a ba mob tsi përimu.

⁷ Inkri, bë me ne, ngëko bëlieng ngi m wëlin ngi apënë-ni tsi wi.

⁸ Par, ma wël bukul irim i m wëlin yi, a ba yank yul; tsi ucär bë me ne, di wi di n pënë-ni run, a ba fiaar u ci wi yëliin un.

⁹ Man ci tsi pëñaandar bukul; cits bañaan umundu biki n ci bukun tsi pëñaandar, maa biki m wëlin biki, par bë ci bayiicu.

¹⁰ Ko wi n ka wi ba këka, aci wiicu; a ko wi m ka wi ba këka, ci umiñ; tsi ngul tsi n dëmbanaana tsun.

¹¹ Nji n katse ink a n ci tsi umundu, maa, bukul bë wam tsi wul; a nji mán bi di wi. Paapa, kanpatsana, waayan bukul tsi katimu ki m wëlin ki, pa bukul pëci baloole, pinja.

¹² Bi n do bi n ci ni bukul, man waay bukul tsi katimu ki m wëlin ki; man waay bukul, a nin naloole tsi bukul niamats, ucits ba nan bukaree pëniam, pa u ci bi Bëpica n ja bi.

¹³ Maa inkri, mán bi di wi, a n ja ko wan tsi umundu, pa bukul pëka ulílan nji un kës wi, tsi bukul bërier bukul.

¹⁴ Man wël bukul përimu, a bañaan umundu ñaas bukul, par bë cits biki umundu, bi n cits bi ni umundu.

¹⁵ Nji n ñaandarats wi pëpënan bukul tsi umundu, maa randani bukul kañan Ujuatsal.

¹⁶ Bukul bë cits biki umundu, bi n cits bi ni umundu.

¹⁷ Patsanaani bukul ucär; përimu ci pun ucär.

¹⁸ Bi m yëliin bi tsi umundu, unk buts bi ndu n yël bun bukul tsi umundu.

¹⁹ Mán patsandar bërierin, undo bukul, pa bu ka ci buts ban patsanaana biki ucär.

²⁰ Cits biki rin biki ndu n ñaandar bukun, maa, man ñaandar buts biki kee wak biki tsi nji, tsi undo irim biki;

²¹ pa bukul bëlieng pëci baloole, bi m ci bi di nji, Paapa, a n ci di wi, bukul buts bu ka ci di nja. Unk, pa bañaan umundu pëfiaar u ci wi yëliin un.

²² Nji ma wël bukul përëmb pi m wëlin pi, pa ba ci baloole, bi ngë ci bi baloole,

²³ nji di bukul, wi di nji, pa bu ka ba pëci baloole, pa bañaan umundu pëme u ci wi yëliin un, a m ŋal bukul bi m ŋalin bi.

²⁴ Paapa, ma ŋal tsi n ci tsi, biki m wëlin biki ka ci buts tsul ni nji, pa bukul pëwin përëmb nji pi m wëlin pi. Par, umundu ruka ka leempa, a m ŋalin.

²⁵ Paapa, namabal, bañaan umundu meetsu, maa nji man meu; a biki me u ci wi yëliin un.

²⁶ Man tsu bukul a ba me katimu; mán tsu bukul bu kë pe këpe pëme kul. Unk, bëŋal bi m ŋalin bi ka ci di bukul, nji buts ka ci di bukul.”