KAKÚRAN-KAWAR YEESU KRISTU BI JOŊ LEENŢ BI KUL AJA 13 - KARÚK-PËRIM KAWALU Nouveau Testament

Yeesu ñawës bafetsul itsiim

¹ Ufesta-pëbuer aruka ka baandi, a Yeesu ro me ba Ulerul band, pa nul pëpën tsi umundu wi pëtsëp di Asin; nul na ŋali bayiicul ban ci biki tsi umundu, a na ŋal bukul te tsi utuami.

² Bi bu kë re bi ufëri, a Ujabël ro cum ba uwaas Judas, nul abuk Simon Iskarioti, pa na ya Yeesu ufets.

³ Yeesu me Asinul wëlul ngëko bëlieng tsi iñanul, na me buts na pënë-ni tsi Nasien-batsi, a nu tsëp di Nasien-batsi.

⁴ A na natsa tsi bariala, a na waas iŋi, na jej kasarbet atana.

⁵ A uu ba, na tsu mlik tsi urung, a na kur pëñawës bafetsul itsiim, a nu faa yul ni kasarbet ki na tana ki.

⁶ A nu band di Simon Per, a na jaul: “Wi, Ajug, a kë ñawësin itsiim-a?”

⁷ A Yeesu yankul aja: “Ko wi n ci wi tsi përo, m meets wul inkri; maa kii me wul tsi bërun.”

⁸ A Per jaul: “Nin-a! M di kë ñawësin itsiim, yaas!” A Yeesu yankul aja: “Uci n ñawësatsu, m di kë bof ko ni nji.”

⁹ Din, a Simon Per jaul: “Ajug, cits rin itsiim nji, maa buts iñan ni been.”

¹⁰ A Yeesu jaul: “Ñaan na ñawee ba, afier koon pëñawës itsiim din; uliaful bëlieng ajënts. A ind, nda jënts, maa cits ind bëlieng.”

¹¹ Yeesu aro me ba ni ka yauli ufets, wul ka wun na ja: “Cits ind bëlieng jënts bukun.”

¹² Bi na ba bi pëñawës bukul itsiim, a na jej iŋiul, na kak aci tsi bariala ni bafetsul, a na ja bukul: “Ko wi ndo ind wi, nda me ko wi u pac wi-a?

¹³ Ind, nda ja nda roon nduu ruin koo ja Najukan ni Ajug; nda ñakan uwar, par man ciul.

¹⁴ Unk, uci n ñawës ind itsiim, nji nan ci Ajug a n ciind Najukan, ind buts nda ka puu ñawëlar itsiim.

¹⁵ Par, ma wël ind unaamanaani, pa bi ndo ind bink, nda roon unk buts.

¹⁶ Mán leents ind ucär: Naluek peets ajugul, a na yëlee peets na yëluli.

¹⁷ Uci nda me ngëko ngan, a uci nda mob tsi përo ngul, ndë ci ba naak biki.

¹⁸ Nji n ñakanaanats uleka ind bëlieng, par man me biki n dat biki. Maa aci pa pëbandan ko wi Bëpica n ja wi: ‘Nan ci tsi përe pëpom nji, ariang pësuanjul pëkamanin.’

¹⁹ Inkri, man leents ind ko wan, tsini u ruka ka baandi; pa uwal wi u baandi wi, ndë wak, nji MAN CI.

²⁰ Mán leents ind ucär: Na welani ñaan ni n yëli, awelanin; a na welanini, awelan na yëliini.”

Yeesu aja Judas Iskarioti kee yaul un ufets

²¹ Bi Yeesu ja bi ank, a uwaas re mak, a na leents un jënts wi, aja: “Mán leents ind ucär: Nalon tsi ind kee na yain ufets.”

²² Din, a bafetsul teenëlar, maa bë meets ni na ŋali pëja.

²³ A nalon tsi bafetsul, ni na ŋal unk, ro tsoar akabëlar ni nul.

²⁴ Nul ni Simon Per siintsar un been pa na yepar Yeesu, yën ci-un ni na ja ank.

²⁵ Nafets Yeesu namënts un araga tsi bëjínc Yeesu, a na jaul: “Ajug, aci yën?”

²⁶ A Yeesu yankul aja: “Aci ni ndu n wëli kapom ki ndu n ñuawan ki.” Din na jej kapom ki na ñuawan ki, a na wël kul Judas, abuk Simon Iskarioti.

²⁷ Bi Judas yank bi kapom, Ujabël niajul, uyëk umënts wun. Din, a Yeesu jaul: “Ko wi kë ro wi, caran do wul.”

²⁸ Maa, tsi ban tsoar bukunk bariala, nin naloole meets ko un ka wi Yeesu ja ank.

²⁹ Bi Judas kë tsijëna bunk uncaam, a balon wejats aja, Yeesu ro jaul këja na weel ngëko ngan fiera ngi pa ufesta, oo na wël baranj ko ulon.

³⁰ A nul Judas, bi na yank bi kapom, na cil ucar umënts wun. Uwal umënts, aci bërëm.

Utsua uwalu

³¹ Bi Judas cil bi, a Yeesu ja: “Inkri, Abuk ñaan-najin arëmbana, a Nasien-batsi rëmbana tsi nul.

³² A uci Nasien-batsi rëmbana tsi nul, Nasien-batsi ka rëmbanul buts tsi nul bërierul; a inkri-inkri di nu rëmbanul run.

³³ Upats nji baties, ma wama n ci ni ind ko uties. Nduu tsasin; a bi n ja bunk Bajudeu, má n ja ind buts inkri: ‘tsi n du n ya tsi, nda yëlanats pëya rul.’

³⁴ Mán wël ind utsua uwalu: Nda ŋalëlari; bi n ŋal ind bunk, nda ŋalëlari buts.

³⁵ Uci nda ŋalëlar, tsul tsi bañaan bëlieng kë meena tsun nda ci bafetsin.”

³⁶ A Simon Per jaul: “Ajug, tsum tsi kë ya tsun?” A Yeesu yankul aja: “tsi n du n ya tsi, m yëlanats pëfetsin inkri. Maa tsi bërun, kii fetsin.”

³⁷ A Per jaul: “Ajug, we ka wun n di ka n yëlan pëfetsu inkri? Mán wël ubiira nji pa wi.”

³⁸ A Yeesu yankul aja: “Kë wël ubiirau pa nji-a? Mán leentsu ucär: Uguk ka ruka ka aan, kë bërin aa ngëyaas ngëwaants.”