KAKÚRAN-KAWAR YEESU KRISTU BI JOŊ LEENŢ BI KUL AJA 12 - KARÚK-PËRIM KAWALU Nouveau Testament

Maaria akër Yeesu ulicar

¹ Bi u ruka bi ngënu paaj pa Ufesta-pëbuer, a Yeesu tsëp Betaania di ucaak Lasaru, ni na natsanii unk di pëcäts.

² A na yecisa ufëri rul; Maarta kë sirbir, a Lasaru ci nalon tsi ban tsoar biki bariala ni Yeesu.

³ Din, a Maaria jej ulícar un gëbëlënaatsa wi, u wokan wi umetaari kalítar, u ñats wi mak, u leempëna wi bënardu, a na kër itsiim Yeesu; a ni uweelul, na faaul itsiim, a kato jëk bëlieng pëñal ulícar.

⁴ Din a Judas Iskarioti, nan ci nalon tsi bafets Yeesu, nul ni kee yai Yeesu ufets, ja:

⁵ “We ka wun a ulicar umënts wi waaparaatsa ngëseent ngëwaants uncaam Dinaariu, uncaam umënts ka wëlaa baranj?”

⁶ Aja ank, cits pëjaa awejats baranj, maa aci-undo bi na ci bi nakiej, a na tsijëna kamaañ uncaam, a nuu jej ko wi kan tsua wi tsi kul.

⁷ Din, a Yeesu ja: “Wëtanul! Na moban tsi përo wul, pa unu pëmooy nji.

⁸ Baranj, nduu ka bukul tsi ind, ngënu bëlieng. Maa nji nda ri ka kain, ngënu bëlieng.”

⁹ A kandënd Bajudeu kawiak bi me Yeesu ci di Betaania, a ba pën aya rul. Cits undo Yeesu rin ka wun ba ya rul, maa aci-undo pëwin bëts Lasaru, ni Yeesu natsanii tsi bacäts.

¹⁰ Maa, a bawiak-bajakan, bukul buts bë baaraan Lasaru pëfiŋaa.

¹¹ Par, undo Lasaru ka wun bacumal kë pën tsi Bajudeu, a bu kë wak tsi Yeesu.

Yeesu aniaj Jerusalem

¹² tsi unu u neki wi, a kandënd bañaan kawiak, bukul ban bi bukunk ufesta, te u jaka Yeesu apëni pëbi Jerusalem,

¹³ a ba jej ikënd mjaak, ba pën pii jëk ni nul, bu kë lië koo ja: “Osana! N ajaaran-ngëwar, ni kan bii ink tsi katim Ajug, a na ciind Nasien Israel!”

¹⁴ A Yeesu win ubuk-ubúuru, na rija wul, bi u picana bi tsi përim Nasien-batsi aja:

¹⁵ “cäts lënk, Përaasa Sion! Teenan-e, Nasienu ka bi unk, arijee ubuk-ubúuru.”

¹⁶ Tsi ujuundi, bafets Yeesu meets ko wi ngëmënts ngan pac wi; maa uwal wi Yeesu rëmbana wi, din a ba les ngëmënts ngan ro picana tsi ulekaul, a ngul ngi na rolaa ngun.

¹⁷ A kandënd bañaan bando bukunk ci ni Yeesu, bi na rui bunk Lasaru di pëbuk a na natsee tsi bacäts, kë leents ko undolaa wi.

¹⁸ Undo ko umënts wan, a kandënd bañaan kë pëni buts pii jëk ni nul, par bë te u jaka, Yeesu aro upibanaani umënts wi.

¹⁹ A Bafariseu ja ban doon biki, bu kë ja bacints bukul: “Nda win! Nda ri ka gaañaar ko tsul. Nda teenan-e, bañaan bëlieng bë ci tsi pëfetsul.”

Bagërek bë ŋal pëwin Yeesu

²⁰ tsi bañaan bando biki kata atsëp pëjintëla Nasien-batsi tsi uwal ufesta, aka balon ban ci biki Bagërek.

²¹ A ba tsëp di Filip, nul nan pënë-nii Betësaida Galileeya; a ba ñaanul aja: “Nawiak, wund aŋal pëwin Yeesu.”

²² A Filip tsëp ee leents Andëre ko wan, a ba tsëp bëlieng ee leents Yeesu.

²³ Yeesu yank bukul aja: “Uler wi Abuk ñaan-najin ka wi përëmbana abaandi.

²⁴ Mán leents ind ucär: Uci pëbuk pëmaaj yër tsi utsia, a pa cätsats, pëci koor pul; maa uci pa cäts, pë tsij mbuk mak.

²⁵ Ñaan na ŋali ubiiraul, ka niama wul. A nan ñaasi ubiiraul tsi umundu wi, ka gaang wul pa ubiira un dits wi ka ba.

²⁶ Uci ñaan kë leemparin, na fetsin; a tsëko tsi n ci tsi, naleemp nji ka ci buts tsul. Uci ñaan kë leemparin, Asin nji ka rëmbanul.

Yeesu añakanaan uleka pëcätsul

²⁷ Inkri, uwaas nji ajuatsan, a wee n du n ja wun? Paapa, bueranin Uler wi-a? Maa, undo ko umënts wi ka wun n bi pa Uler umënts wi.

²⁸ Paapa, dëmbani katimu.” Din, a përim pëni di batsi, a pa ja: “Man dëmban ba kul, a ndu n dëmban kul kak.”

²⁹ A kandënd bañaan ban do biki ci tsul, ute bukul përim, a ba ja: “Aci kampalambamb.” A balo n ja: “Aci ulon uwaanju ñakanaanul wun.”

³⁰ A Yeesu yank bukul aja: “Cits undo nji ka wun përim pan tea, maa aci-undo ind.

³¹ Inkri, kawat umundu wi pëleents abaandi; a tsi inkri, kantsijëna umundu wi ka gutsa di utsand.

³² A nji, uwal wi n dianga wi tsi utsia, ka toti bañaan bëlieng ba bi tsi nji.”

³³ Yeesu ja ank, par aci këci tsi pëleents bi nii cats bi.

³⁴ A kandënd bañaan yankul aja: “Wund ajukana tsi ulua, ajaka, Këristu ka ci pa sandëndën; a um di kë ja run: ‘Abuk ñaan-najin aka përianga.’ Yën ci-un Abuk ñaan-najin namëntsan?”

³⁵ Yeesu kaka yank bukul aja: “Ufac awama ci tsi pëncuaf ind tsi ko un jonats wi. Nda yandaari tsi uwal wi nda wama wi aka ufac, pa bërëm dits mob ind; par ni ka yandaari tsi bërëm, di ka me tsi nuu ya tsi.

³⁶ Uwal wi nda wama wi ka ufac, nda wakan tsi ufac, pa ndë witsa ka ci babuk ufac.” Bi Yeesu ba bi pëja irim yan, a na pën tsul, a na cëra bukul.

Kakaats-uwak tsi Yeesu

³⁷ Ŋal bi Yeesu ro bi ngëpibanaani ngëcumal tsi bërun bukul, bë wakats tsi nul.

³⁸ Unk a përim pi Isaaya, nayëlia, ja pi rolaa; iink di pa ja run: “Ajug, yën wak un tsi ko wi wund leents wi? A yën ni Ajug piban un kañanul?”

³⁹ Wul ka wun, bu yëlanats bi bu kë wak bi, par Isaaya akaka ja:

⁴⁰ “Akuelëtsan këkës bukul, a na tamban ngëwaas bukul, pa ba rits win ni këkës, ba rits me tsi ngëwaas, pa ba rits witsësee, ka yësan bukul.”

⁴¹ Isaaya aja ank, par awin përëmb Yeesu, a na ñakan tsi ulekaul.

⁴² Ŋal bi u ci bank, bacumal tsi ba tsijëna-ucaak wak tsi Yeesu; maa tsi undo Bafariseu, bë leentsats, pa ba rits ruaka di kato-kajúki.

⁴³ Par bë ŋal përëmb bañaan-bajin, apean përëmb Nasien-batsi.

Yeesu ci-un ufac umundu

⁴⁴ A Yeesu lië, aja: “Na waki tsi nji, cits tsi nji tsi na wak tsun, maa awak tsi na yëliini.

⁴⁵ A na winini, awin na yëliini.

⁴⁶ Nji nan ci ufac, man bi tsi umundu pa ñaan na waki ba këwak tsi nji, di ka ci di krëm.

⁴⁷ A uci ñaan te irim nji, a mobats tsi yul, in di ka n watul pëleents, par nji n biits këbi pëwat umundu pëleents, maa tsi ucär, pëbueran umundu.

⁴⁸ Ñaan nan bërini, a niiranats irim nji, nul, aka ni ka watuli pëleents; përim pi n leents pi, pul ka watul pun pëleents, tsi unu utuami.

⁴⁹ Par, ko wi n ja wi, biinatsi tsi nji bërierin; maa na yëliini, nul Asin nji, tsuin un ko wi n du n ja wi, ni wi n du n leents wi.

⁵⁰ A n me utsuaul aci ubiira un dits wi ka ba. Unk, ngi n du n ja ngi, má n ja bi Asin nji jain bi.”