KAKÚRAN-KAWAR YEESU KRISTU BI JOŊ LEENŢ BI KUL AJA 11 - KARÚK-PËRIM KAWALU Nouveau Testament

Pëcäts Lasaru

¹ Aka nalon na maaki, ka jaka Lasaru; aciina Betaania, untab Maaria ni ni ba tsaari Maarta.

² Maaria namëntsi, ci-un nan doi tular Ajug ulicar; ni uweelul a na faaul itsiim; ni ba tsaari, Lasaru ci-un na maaki.

³ A bukul bakaats ban tsaar biki ni nul, yël ñaan pa pii ja Yeesu: “Ajug, teenan-e: Bëfetsaru amaak.”

⁴ Bi Yeesu te bi ko wan, na ja: “Pëmaak pan cits pi pëcäts, maa aci pa përëmb Nasien-batsi, pa Abuk Nasien-batsi përëmbanaa tsi pul.”

⁵ Yeesu ŋal Maarta, ni na tsaar ni nul ŋaats, ni Lasaru.

⁶ Maa, bi na me bi Lasaru maak, a na ci rul, ngënu ngëtëb kak.

⁷ A uu ba, na ja bafetsul: “Nda ju ngë tsëp Judeeya kak.”

⁸ A bafetsul jaul: “Rabi! Jonats ki Bajudeu ru tsas pëtapënu ilaak pëfiŋ; a kë tsëp rul kak-a?”

⁹ Yeesu yank bukul aja: “Cits iink ngëwoora untaaja ni ngëtëb ngi pënak wama ngun aci-a? Uci ñaan kë yandaar pënak, di ka jontas; par ka win ufac umundu wi.

¹⁰ Maa, uci ñaan kë yandaar tsi bërëm, ka jontas; par ufac cits tsi nul.”

¹¹ Bi Yeesu ba bi pëja irim yan, a na kaka ja bukul: “Bëfetsar nja Lasaru, aŋooy; mán tsëp pëwambiul.”

¹² Din, bafetsul jaul: “Ajug, uci na ŋooy, ka yës.”

¹³ Yeesu ro ka ñakanaan uleka pëcäts Lasaru, maa bafetsul ja ne aci uleka pënaakësa tsi bëŋooy.

¹⁴ A Yeesu ru leents bukul ajëntsan: “Lasaru a cäts.

¹⁵ Undo ind, man lílan bi ndoots bi n ci rul, unk ndë wak. Maa, nda ju ngë tsëp di nul.”

¹⁶ Din a Tomaas, nul ni ka jakee Diidimus, ja bacintsul bafets: “Nda ju ngë tsëp buts, n ja kee cats ni nul.”

Yeesu añakanaan uleka kanatsee-di-pëcäts

¹⁷ Uband Yeesu, na tsënk Lasaru ro ba ngënu ngëbaakër di bametsu pëbuk.

¹⁸ Betaania awok Jerusalem, ko unduakan wi ngënkilometar ngëwaants;

¹⁹ a bacumal tsi Bajudeu bi tsi Maarta ni Maaria pii juabëtsan bukul ngëwaas, undo pëcäts ni ba tsaari.

²⁰ Bi Maarta te bi Yeesu kë bi, a na tsëp pii jëk ni nul; maa Maaria ruka, atsoar di kato.

²¹ A Maarta ja Yeesu: “Ajug, uci m do ci tsi, natsaar ni nji, bitse ka cäts.

²² Maa nji man me, ŋal tsi inkri, ko wi m yep wi ba këyep Nasien-batsi, Nasien-batsi ka wëlu wul.”

²³ A Yeesu jaul: “Kantsaar ni wi ka natsee di pëcäts.”

²⁴ Maarta jaul: “Ma me nii natsee di pëcäts tsi unu utuami.”

²⁵ A Yeesu jaul: “Nji n ci-un kanatsee-di-pëcäts, a nji n ci-un ubiira. Ñaan na waki tsi nji, ŋal ank na cäts, në ka aatsum ubiira.

²⁶ A ñaan nan tsiji ubiira a na wak tsi nji, yaas a në cats, pa sandëndën. M wak tsi ko wan-a?”

²⁷ A Maarta ja Yeesu: “Eey-e Ajug, ma wak, wi ci-un Këristu, Abuk Nasien-batsi, ni kan bii tsi umundu.”

²⁸ Bi Maarta ja bi ko wan, na pën; na ru Maaria ni ba tsaari, a na kuetanul ajaul: “Najukan aci tsi, ka ruu.”

²⁹ Bi Maaria te bi ko wan, a na natsa ucar umënts wun pëtsëp di Yeesu.

³⁰ Par, Yeesu netse ro niaji untab, awama ci di tsëko tsi Maarta jëkëna tsunk ni nul.

³¹ Bajudeu bando biki ci ni Maaria di kato a bu kë juabutsënul uwaas, bi ba win bi na natsa ucar umënts wun pëtsëp, a ba fetsul, par bë jakar ne, ka ya këya irug di pëbuk.

³² Bi Maaria band bi tsi tsëko tsi Yeesu ci tsi, a nu win Yeesu, a na yër tsi itsiimul na jaul: “Ajug, uci m do ci tsi, kantsaar ni nji, bitse ka cäts.”

³³ Bi Yeesu win bi Maaria kë kaan, a Bajudeu ban ñuatsaniul biki kë kaan buts, a uwaasul re mak, a na juatsan.

³⁴ A na ja bukul: “tsum tsi nda mooyul tsun?” A ba jaul: “Ajug, pëni kii win.”

³⁵ A Yeesu rug.

³⁶ Din Bajudeu ja: “Nda teenan-e bi na ro bi ŋalul!”

³⁷ A balon tsi bukul ja: “Namëntsi, nul na waantsi këkës nakuel, roots yëlan pëtsu buts Lasaru na rits cats-a?”

Yeesu anatsani Lasaru di pëcäts

³⁸ A uwaas Yeesu kaka re mak, a na tsëp di pëbuk. Aci baar ban jëpa bi bëlaak, a pëlaak pëwiak sëtsa tsi tsëniaji.

³⁹ Din, a Yeesu ja: “Nda pënani pëlaak!” A Maarta, nan tsaari ni kancäts, ja Yeesu: “Ajug, aruka ñal; par wul ci wink unu ubaakëndan.”

⁴⁰ Yeesu jaul: “Njnjaatsu iink, uci m wak, kë win përëmb Nasien-batsi-a?”

⁴¹ Din, a pëlaak pënanaa; a Yeesu katar këkës ruets, a na ja: “Paapa, man baranu, par m cikëndënin.

⁴² Ma me m ja m doon kuu cikëndënin. Maa, undo kandënd bañaan ba nats bikink afayin, wul ka wun nja ank, pa bukul pëfiaar u ci wi yëliin un.”

⁴³ Bi Yeesu ba bi pëja ngëmënts ngan, a na lië mak, aja: “Lasaru, pëni utsand!”

⁴⁴ A nul nando unk cats pëni utsand; itsiim ni iñan atana ni ifaal, a urostuul faya ni kaleenj. Din, Yeesu ja bukul: “Nda pacanul, ndë wëtanul na tsëp!”

⁴⁵ A bacumal tsi Bajudeu bando bukunk bi tsi Maaria, win ko wi Yeesu ro wi, a ba uwak tsi nul.

Bafariseu ajúk abaar pëloole, pa Yeesu pëfiŋaa

⁴⁶ Maa balon tsi bukul tsëp di Bafariseu ee leents bukul ko wi Yeesu ro wi.

⁴⁷ A bawiak-bajakan, ni Bafariseu, ru kato kawat-pëleents kawiak ba júk, a ba ja: “Wee ngë ci-un tsi përo? Ñaani aci tsi përo ngëpibanaani ngëcumal.

⁴⁸ Uci ngë wëtul unk, bañaan bëlieng ka wak tsi nul. Rooma ka bi kee cok tsëko nja tsëyëman, ni ucaak nja.”

⁴⁹ Maa Kayafas, nan ci nalon tsi bukul, te ci-un nan pei pëci nawiak-bajakan uwaanu umënts wun, ja bukul: “Ind, nda meets ko un ci wi;

⁵⁰ nda winats u pe pëwara ind ñaan naloole pëcäts pa bañaan, ni pëjaa ucaak bëlieng aniaman.”

⁵¹ Përim pan, pënënatsi tsi nul bërierul; maa, aci-undo bi na ci bi nan pei pëci nawiak-bajakan uwaanu umënts wun, wul ka wun na car aleents Yeesu ka pëcäts pa ucaak Bajudeu.

⁵² A te cits pëcäts pa ucaak rin, maa aci buts pa pëbofëlan upäts Nasien-batsi ban garandar biki, pa ba ci baloole.

⁵³ Pëkur tsi unu umënts wun, ba baaraan pëtsu Yeesu na fiŋa.

⁵⁴ Wul ka wun Yeesu katse yandaar na wina tsi pëncuaf Bajudeu. Maa, na pën tsul atsëp ulaalats di pëboos pa woki pi tsul, di përaasa Efraim; a nee ci rul ni bafetsul.

⁵⁵ Ufesta-pëbuer wi Bajudeu awokani, a bañaan pëboos bacumal kata pëtsëp Jerusalem pa bee ba jëntsandar, tsini Ufesta-pëbuer ruka ka baandi.

⁵⁶ A ba ci tsi pëtsas Yeesu; a di kato-kayëman, a bu kë yepëlar koo ja: “Wee nda wejats wun tsi ko wan? Di ka bi koon këbi ufesta-a?”

⁵⁷ A bawiak-bajakan, ni Bafariseu, wëtan irim pa, na mei ba këme tsi Yeesu ci tsi, në leents, pa në mobaa.