KAKÚRAN-KAWAR YEESU KRISTU BI JOŊ LEENŢ BI KUL AJA 10 - KARÚK-PËRIM KAWALU Nouveau Testament

Nayafan nawar

¹ Mán leents ind ucär: Ñaan na niajënatsi pëlëman pëtan ngënkanel, maa a na lutëna ulon ubuuru, namënts nun aci nakiej, aci uwayu.

² Maa, ñaan ni ka niajëni pëlëman, nul ci-un nayafan ngënkanel.

³ Nul ni nawaay pëlëman kë waants un, ngënkanel ka te përimul; ngënkanel ngan ci ngi ngiicul, në ja kara un ci wi në ru wul tsi katim wul, në pënandi ngul utsand.

⁴ Uwal wi na pënandi wi ngul bëlieng utsand, në yër ngul bërun, nguu fetsul, par ngul ame përimul.

⁵ Maa yaas a ngë fets natsooŋ, koo túkul, par ngul meets përim batsooŋ.”

⁶ Yeesu tib bukul përim pan, maa ngi na ja ngi bukul, bë meets ko wi nga pac wi.

⁷ A Yeesu kaka ja bukul: “Mán leents ind ucär: Nji n ci-un pëlëman ngënkanel.

⁸ Ba yëriin biki bërun bëlieng, bë ci bakiej ni ngëwayu; maa ngënkanel cikëndënats bukul.

⁹ Nji n ci-un pëlëman. Uci ñaan niajëna tsi nji, në buer; koo niaj, nuu cili, nuu win tsëko kafeer.

¹⁰ Nakiej ka bi pa pëkiej rin, ni pëfiŋ, ni pëcok; maa nji man bi pa bañaan pëka ubiira, ubiira un kës wi.

¹¹ Nji n ci-un nayafan nawar; nayafan nawar ka wël ubiiraul pa ngënkanel.

¹² Maa najeja-uleemp, nul nan citsi nayafan a ngënkanel cits ngiicul, uwinul unjurtu kë bi, në bër ngënkanel, në túk. Din, unjurtu ka yërand ngul, u garës ngul.

¹³ Undo aci najeja-uleemp, fierandats uleka ngënkanel.

¹⁴ Nji n ci-un nayafan nawar; man me ngënkanel nji, a ngënkanel nji mein,

¹⁵ bi Asin nji mein bi, a me Asin nji, a ndu n wël ubiira nji pa ngënkanel.

¹⁶ Man ka ngëlon ngënkanel nga bofats ngi tsi pëtan pi; ngul buts, man ka pëtsiji ngul, ngii te përim nji, din u ci pëtan pëloole ni nayafan naloole.

¹⁷ Bi u ci bank, Asin nji ŋalin, par mán wël ubiira nji, pa pëyank wul kak.

¹⁸ Ñaan di ka pënanin ubiira, maa nji ka n wël un wul bërierin. Man ka pëyëlan pa pëwël ubiira, ni pëyëlan pa pëyank wul kak. Utsua umënts wi, man yankëni wul di Asin nji.”

¹⁹ Undo irim imënts yi, a manteelarats kaka ci tsi Bajudeu.

²⁰ Bacumal tsi bukul ka ja: “Nul a tsij ucaay, katse tsij uwejatsul; we ka wun nduu cikëndënul?”

²¹ Maa, balon kë ja: “Irim yan cits yi ñaan na niajee ucaay. Ane ulon ucaay ayëlan pëwaants bakuel këkës-a?”

Yeesu bëraa tsi Bajudeu

²² A ufesta ulesëni upätsandara kato-kayëman rolaa di Jerusalem. Aci tsi uwal ujoonts.

²³ A Yeesu ci di kato-kayëman, a nuu yandaar tsi ukuera Salomon.

²⁴ A Bajudeu fayul, a ba jaul: “Kë riang wund ngëwaas te lum-i? Uci wi ci-un Këristu, leents wund jëntsan.”

²⁵ A Yeesu yank bukul aja: “Man leents ind ba, a nda fiaarats. Ngnja ngi n doon ka ro tsi katim Asin nji, ka leents ngun ko wi n ci wi.

²⁶ Maa ind, nda fiaarats, par nda bofënats tsi ngënkanel nji.

²⁷ Ngënkanel nji ka cikëndën përim nji. Nji, man me ngul, a nga ja nga roon nguu fetsin.

²⁸ Nji, mán wël ngul ubiira un dits wi ka ba; ngul di ka niaman yaas; nin ñaan di ka waj ngul tsi kañan nji.

²⁹ Asin nji na wëlini ngul, ape ngëko bëlieng; nin ñaan cits na yëlani pëwaj ngul tsi kañan Asin nji.

³⁰ Nji ni Asin nji, wund aci baloole.”

³¹ A Bajudeu kaka coonts ilaak pëtapënul na cäts.

³² Yeesu yank bukul aja: “Man piban ind ngëko ngëcumal ngëwar, ngan pënë-ni ngi di Asin nji; undo uwom tsi ngul ka wun ndu tapënin ilaak?”

³³ A Bajudeu yankul aja: “Cits undo ulon ko uwar wi m do wi, ka wun wund kë tapënu ilaak, maa undo bi m kar bi Nasien-batsi. Par m tsu beenu m ci Nasien-batsi, wi nan ci ñaan-najin.”

³⁴ A Yeesu yank bukul aja: “Picanaatsa iink tsi ulua ind aja: Nji ma nja: ‘Nda ci basien-batsi-a?’

³⁵ Ba wëtandaree biki përim Nasien-batsi, uci bi ulua ru bank bukul aja basien-batsi, a garats Bëpican,

³⁶ a ni Asin patsani a na yëliul tsi umundu, nul ni nda ja un: ‘Wi kë kar Nasien-batsi;’ undo bi n ja bank man ci Abuk Nasien-batsi-a?

³⁷ Uci n doots ngi Asin nji, ind tsë wak tsi nji.

³⁸ Maa uci n do ngul, ŋal bi nda wakats bi tsi nji, nda wakan tsi nga dola ngi, pa ind pëme, ndë yëkëran Asin nji ci di nji, a n ci di Asin nji.”

³⁹ A bu kë tsas pëmobul kak, maa a na buer tsi iñan bukul.

⁴⁰ A Yeesu pën atsëp kak kalutar kacints, ki kabulaŋ Jordan, ee ci di tsëko tsi Joŋ do tsi cakësaan pëmijan bañaan.

⁴¹ A bañaan bacumal kë bi tsi nul, bu kë ja: “tsi ucär, Joŋ doots nin upibanaani uloole, maa ngëko ngi na ja ngi bëlieng tsi uleka niints namëntsi, aci ngëcar.”

⁴² Dul, a bacumal wak tsi nul.