KAKÚRAN-KAWAR YEESU KRISTU BI JOŊ LEENŢ BI KUL AJA 1 - KARÚK-PËRIM KAWALU Nouveau Testament

Përim, ci pun Nasien-batsi

¹ Tsi ujuundi, përim aci, a përim ci ni Nasien-batsi, a përim ci Nasien-batsi.

² Pul, tsi ujuundi aci ni Nasien-batsi.

³ Pul leempëna pun ngëko bëlieng; kaats ko u leempa wi, te cits pul leempëna pun wul.

⁴ tsi pul tsi ubiira ciina tsun, a ubiira umënts wun ci wun ufac bañaan-bajin.

⁵ A ufac fiets tsi krëm, maa krëm kaats kape tsi wul.

⁶ A nalon ñaan baandi, ni Nasien-batsi yëlii, katimul Joŋ.

⁷ Nul abi pi namaatir, pa pii leents ngi na me ngi tsi uleka ufac; pa tsi undo përimul, bañaan bëlieng ka wak.

⁸ Citsul ci-un ufac, maa, abi pii leents uleka ufac.

⁹ Pul përim ci pun ufac ucär, wi kan fiets wi kara ñaan, ubi wul tsi umundu.

¹⁰ Përim aci tsi umundu, a pul leempëna pun umundu; maa bañaan umundu meets pul.

¹¹ Abi pa bañaan pul, maa bañaan pul niiraants pul.

¹² Maa bañaan bëlieng, ba yank biki pul, ba uwak biki tsi katim pul, pul awël bukul pëtsënkan përuka ci upäts Nasien-batsi;

¹³ bukul, bë bukënaatsa tsi pëñaak, nin tsi uŋal uyamats, nin tsi uŋal niints, maa tsi uŋal Nasien-batsi.

¹⁴ A Përim witsësar aci ñaan-najin; a na ciina tsi pëncuaf nja acum ni bëtseend ni ucär. Ngë win përëmbul, aci pi përëmb Kanbuka koorul baŋ tsi Asinul.

Joŋ-namijan aleents uleka Yeesu

¹⁵ Joŋ leents uleka Yeesu, a na lie aja: “Ni ci-un ni nja ind unk: ‘Ni kan bii tsi ufets nji, aciin bërun, par man duka ka n ci, a na ro ci ba.’

¹⁶ A nja bëlieng buts, tsi përëmbul ngë yank un cum wi, ni bëtseend ba nekëlar bi.

¹⁷ Par ulua awëlënee tsi Moises, maa bëtseend ni ucär abiini tsi Yeesu Këristu.

¹⁸ Ñaan winats Nasien-batsi, yaas. Maa Nasin-batsi, nul Kambuka koorul, nan ci tsi Asin, piban nja un nul.”

¹⁹ Ko wi, ci wun wi Joŋ leents wi, bi Bajudeu ban ci biki di Jerusalem yëli bi bajakan, ni bañaan pëbuka Lewi, pa bee ba yepar Joŋ ba ja: “Wi ci-un yën?”

²⁰ A Joŋ leents, pokats, aleents aja: “Cits nji n ci-un Këristu.”

²¹ A ba yeparul aja: “A ba m ci yën? M ci Eliyas a?” A na ja: “Nji n citsul.” A ba jaul: “M ci nayëlia-a?” A na yank aja: An-a

²² Maa, a ba jaul: “Wi ci-un yën, pa wund pii leents ba yëlii wund biki? Wee m ja wun tsi ulekau bërieru?”

²³ Din, a na yankësaan bukul irim Isaaya nayëlia, aja: “Nji n ci-un përim ni ka lie unk di ulaalats, a nuu ja: ‘Nda colani bëga Ajug.’”

²⁴ Ba yëlee biki, bë ci ban pënë-ni biki tsi Bafariseu.

²⁵ A ba yeparul aja: “Uci u cits wi ci-un Këristu, nin Eliyas, nin nayëlia, a we ka wun a kë mijan bañaan?”

²⁶ A Joŋ yank bukul aja: “Nji, mán mijanaan di mlik, maa tsi pëncuaf ind aka nalon ni nda meetsi,

²⁷ nul ci-un ni kan bii tsi ufets nji; nji n tsënkaants pëjaa mán pacul katani karaalaul.”

²⁸ Ngëko ngan apar-na di Betaania, di kalutar Jordan, di Joŋ do ri ka mijanaan.

²⁹ Tsi unu ucints, a Joŋ win Yeesu kë bi tsi nul, a na ja: “Ni ci-un unkaanel-uties Nasien-batsi, wi kan pënan wi ujuban umundu.

³⁰ Ni ci-un ni n doi ja ind: ‘tsi ufets nji, nalon niints ka bi, aciin bërun, par man duka ka n ci, a na ro ci ba.’

³¹ Nji bërierin nji n doots meul; maa pa pëtsu bañaan Israel ba meul, wul ka wun n bi a ndu n mijanaan di mlik.”

³² A Joŋ ñakan aja: “Man win Uwejats pëni di batsi awelee, pi utuuba, ee jut tsi nul.

³³ Nji n doots n meul, maa na yëliini pii mijan di mlik, nul jain un: ‘Ni m wini Uwejats welee ee jut tsi nul, nul ci-un ni ka mijan indi di Uwejats-ujënts.’

³⁴ Maa nji ma win, a n leents a n ja, nul ci-un Abuk Nasien-batsi.”

Bafets Yeesu bacäk

³⁵ tsi unu ucints, a Joŋ kaka nats ni bafetsul batëb, tsi tsëko tsëmënts tsun.

³⁶ Bi na win bi Yeesu kë par, a na ja: “Ni ci-un unkaanel-uties, wi Nasien-batsi.”

³⁷ A bafetsul batëb bukun te bi na ñakan bank, din a ba fets Yeesu.

³⁸ A Yeesu witsësa, a na win bu kë fetsul, a na ja bukul: “Wee nduu tsas wun?” A ba jaul: “Rabi,” un ci wi Najukan, “tsum tsi m ciina tsun?”

³⁹ A na ja bukul: “Nda bili n dii win.” A ba tsëp ee win tsi na ciina tsi, a ba ci ni nul unu umënts wun; aro ci ko pi mfuts-unu.

⁴⁰ Nalon tsi batëb bando bukunk te irim Joŋ a ba fets Yeesu, aci Andëre, nan tsaari ni Simon Per.

⁴¹ Ni Andëre cakësi pëwin aci Simon, nan tsaari bërierul ni nul; a na jaul: “Wund awin Mesia:” “un ci wi Këristu”.

⁴² A na tsëpandul di Yeesu. A Yeesu teenul a na ja: “M ci Simon, abuk Joŋ; kë ruka ka jaka Seefas” un ci wi Per.

Yeesu arui Filip, ni Natanael

⁴³ tsi unu ucints, a Yeesu natsar pëya Galileeya, a na win Filip, na jaul: “Fetsin.”

⁴⁴ Filip aciina përaasa Betësaida, përaasa Andëre ni Per.

⁴⁵ A Filip win Natanael, a na jaul: “Wund awin nan picana unk ulekaul tsi ulua-Moises, ni tsi ngi bayëlia pican ngi: aci Yeesu Kanpënë-ni-nasaret, abuk Juse.”

⁴⁶ Natanael jaul: “Ulon ko u wara wi a yëlan pëpën-ni di Nasaret-a?” A Filip yankul aja: “Bili kë win.”

⁴⁷ A Yeesu win Natanael kë bi tsi nul, a na ñakandar ulekaul aja: “Nul ni, naisrael nacär, nan kaatsi kanguungu.”

⁴⁸ A Natanael jaul: “Meenin tsum?” A Yeesu yankul aja: “Filip aruka ka ruiu, a n do winu ba, uwal wi m ci wunk di utsia bëkungul.”

⁴⁹ Din, a Natanael yankul aja: “Rabi, wi ci-un Abuk Nasien-batsi! Wi ci-un Nasien Israel.”

⁵⁰ A Yeesu yankul aja: “Undo bi n jau bi man winu di utsia bëkungul, ka wun m wak-a? Kii win ngan pe ngi pëci ngëwiak.”

⁵¹ A na kaka jaul: “Mán leents ind ucär, Ndii win batsi waantsar, ngëwaanju Nasien-batsi kë paya, nguu welee tsi Abuk ñaan-najin.”