JAKOB 5 - KARÚK-PËRIM KAWALU Nouveau Testament

Ind barëmb, ind car bakank aleentsa

¹ tsi inkri, ind barëmb, nda cikëndëni! Nda rugan, nduu lië mak, uleka ngënjuatsia ngi kan baandë-ni ind ngi.

² Bëka ind anooy, ngëkuc are iŋi-bëtiem ind.

³ Uwëru ind, ni uncaam ind utsak area krus; a krus ngul kë natsara ind, kë leents nda lac, kë re uyamats ind pi bërua. tsi ngënu ngëtuami, nda jukëlën bëka ind!

⁴ Nda teenan-e! Bëluk bi nda lukats bi baleemp ban cëtar ind biki mleempëna ind, ka lië bank. Irug bacët aband di ibats Ajug Basondaari.

⁵ Nda ci tsi una, ni tsi ngëlílal, tsi umundu wi. A nduu re ko u niir wi nda suets, pi ngëcaam, tsi unu pëfiŋa.

⁶ Nda lacan namabal, te a nda fiŋul; pokats ind.

Umiira, ni bëñaan

⁷ Batsaar ni nji! Bi u ci bank, nda miiraan, aa Ajug ka baandi. Nda teenan-e! Najaar aja na roon në lip mjaarnaul man buk mbuk mwar; a nuu miira mak tsi pëlip mul, aa në tsënkëne ka win usubal ucäk, ni utuami.

⁸ Ind buts, nda miiraan; nda liincani ngëwaas ind, par ubaandari Ajug awokani.

⁹ Batsaar ni nji! Ind tsuu tsë ŋëmŋëm tsi uleka acints ind, pa nda rits wata pëleents. Nda teenan-e! Nawat-pëleents nats ink ba tsi pëlëman.

¹⁰ Batsaar ni nji! Nda teenëni bayëlia ba ñakan biki tsi katim Ajug, umiira wi ba miira wi tsi unoor wi ba noor wi.

¹¹ Nda me koon, n ja koo ja, bu naak, ban tambandar biki. Nda te uleka umiira wi Job miira wi, a nda win ko wi Ajug tsuul wi pëtuamanaan; par Ajug acum ni mjampësa, ni kayëk-ipës.

¹² Batsaar ni nji! Ucak ngëko bëlieng ci wun wi: Ind tsë baaja pa batsi, nin pa utsia, nin ulon ubaaja. Eey-e ind, aka pëci eey-e; a Naaw ind ka pëci naaw, pa nda rits wata pëleents.

¹³ Nalon tsi ind aci tsi unoor-a? Na ñaanan. Aka nan ci tsi ulílan-a? Na yaan uya-ubëndan.

¹⁴ Nalon tsi ind amaak-a? Na rui ban tsua biki bajëŋal Ngëriisia; ba ñaanan tsi nul, bu kë kërandul mkër, tsi katim Ajug.

¹⁵ Din buñaan bandola bi ni uwak ka bueran namoj, Ajug ka katul. Uci na ro ngëjuban, në jampësaa.

¹⁶ Bi u ci bank, nda jaan nan ci në pets bacintsul ngëjubanul, nan ci nuu ñaandar bacintsul, pa ndë yës. Bëñaan namabal, bandola bi ni pëyëlan, aka bëkat mak.

¹⁷ Eliyas aci ñaan-najin pnja. Añaan mak pa usubal tsë sub, a usubal subatsi tsi utsia, ngëwaanu ngëwaants ni këli paaj.

¹⁸ A nee ñaan kak, a batsi wëtani usubal, a utsia mayani mbuk.

¹⁹ Batsaar ni nji! Uci nalon tsi ind niam alawan ucär, a nalon kakaniul tsi wul,

²⁰ ndë me, nan pënanii najuban tsi bëga bi na ro bi niamëna, ka bueran ubiira ñaan namënts un tsi pëcäts, në kund ngëjuban ngëcumal mak.