JAKOB 4 - KARÚK-PËRIM KAWALU Nouveau Testament

M ŋal ba umundu, kë me m ñaas Nasien-batsi

¹ We tsu ind wun ukam, ni pëŋom tsi pëncuaf ind? Cits iink ngëlílal ngi nda ŋal ngi, a nguu kaman ind tsi ngëliaf ind-a?

² Nduu rí, maa nda ri ka ka. Ndë fiŋ ñaan, ndë ñibula, maa nda ri ka yëlan pëwin ko wi nda ŋal wi. Nduu ŋom, a nduu kam. Nda kaats, par nda ri ka yep.

³ Nduu yep, maa nda ri ka yank, par bi nduu yep bi waraatsa, nduu yep pa përoona ngëko kalílan-uliaf.

⁴ Ind ba mobats biki tsi Nasien-batsi! Nda meets pëŋal umundu ci pëñaas Nasien-batsi-a? Unk, na ŋali pëfets ngëko umundu, ka ci buñaasar Nasien-batsi.

⁵ Ane nda ja ne, përim pi Bëpica n ja pink kaats bëkat-a? Iink di pa ja run: “Nasien-batsi aŋal Uwejats wi na tsu wi tsi nja a na laaŋaraan wul;

⁶ maa a nuu wël bëtseend ban pe bi përëmb.” Wul ka wun Bëpica n ja: “Nasien-batsi anatsara bape-iyeen bukul, maa a nuu wël bëtseend pa batienkëtsan iyeen bukul.”

⁷ Bi u ci bank, nda baari ibats ind tsi Nasien-batsi; nda liincandari tsi pëpok Ujabël, din u túk u lawan ind.

⁸ Nda gige wokan Nasien-batsi, din në wokan ind. Nda ñawan iñan ind, ind baro-ngëjuban; nda jëntsani ngëwaas ind, ind ba tsijëna ngëwejats ngëtëb.

⁹ Nda niirani nda juatsan; nda ciin tsi ikaan puum, ni irug. Pëji ind pa witsaan pa ci ikaan puum, pëlilan ind ka witsa pa ci pëjuatsan.

¹⁰ Nda welani iyeen ind tsi bërun Ajug, din në riang ind.

cäts jaar acintsu ko

¹¹ Batsaar ni nji! Ind tsuu tsë jaarlar nga waraatsa ngi. Na n jai u waraatsa wi pa acintsul, oo na wati acintsul pëleents, aja ko u waraatsa wi pa ulua, a na wat ulua pëleents. A uci m ci tsi pëwat ulua pëleents, ande m cits naro ko wi u ja wi, maa m ci nawat wul pëleents.

¹² Aci naloole baŋ ka tsu un ulua, a nuu wat pëleents; nul ci-un na yëlani pëbueran, ni pëniaman. Maa wi nan ci tsi pëwat acintsu pëleents, m ci yën?

Maguukandër apokaa

¹³ tsi inkri, nda cikëndëni-e, ind biki ka nja biki: “Ntsari, oo faan, nja ka tsëp përaasa pan, n ja kee ro rul uwaanu, nja ka ro pëjúla rul, din nja ka kai ko!”

¹⁴ Ind ba meets biki wi ndii ciina wi faan! Par, nda ci pi uwamël, un ja wi u natsee, di ka jon, din u ba.

¹⁵ Nda ro ka puu ja: “Uci Ajug ŋal, nja ka wamand ubiira, nja ka ro ko wi, ni ko wan.”

¹⁶ Maa ind, nda ci tsi pëguukandër tsi mtsupalar ind. Mguukandër pi mmënts mi, aci ko u waraatsa wi.

¹⁷ Bi u ci bank, na mei përo uwar, a roots wul, aro ujuban.