JAKOB 3 - KARÚK-PËRIM KAWALU Nouveau Testament

Uyëlan pëndiamënt

¹ Batsaar ni nji! Ind tsë cumar pëci bajukan. Par, wund bajukan, wund ka pe pëwataa pëleents.

² Nja bëlieng, nja ka yaaraar tsi ngëcumal. Uci ñaan ci, nan ditsi ka yaaraar tsi përim, namëntsan aci ñaan nan bai pëci nawar, na yëlani pëtsëkan uliaful bëlieng.

³ Aja ngë gok umpëlënc kafeeru di mtum pa u ro ko wi ngë ŋal wi, din nja ka tsijëna uliaf wul bëlieng.

⁴ Nda teenan-e bëntsian buts: Rëmb bunk pi we, a ufuts uwiak kë pamb bul, maa katsooŋ katies mak ka tsëpand kun bul, bi natúkand bul ŋal bi.

⁵ Unk buts, pëndiamënt aci kancimëntsu katies, maa a puu jakar ngëko ngëwiak. Nda teenan-e bi bërua bëties yëlan bi pëtër bëreeŋ bëwiak ba ba!

⁶ A te pëndiamënt buts, aci bërua, aci umundu kamabats; pëndiamënt aka pëlas pul tsi incimëntsu nja ka tsopan uliaf bëlieng, a puu tsiji unjuatsia tsi ubiira ñaan bëlieng, a nfeernu kë tër pul.

⁷ Ñaan-najin a yëlan pëtsu ngëkoraar ngëko bëlieng puu ro ko wi na ŋal wi, uci ank ngë n jar, ngëko-ngëyits, ngëko-ngëpuula, ni ngëko di bërëk; a te atsu ngul puu ro ko wi na ŋal wi.

⁸ Maa pëndiamënt, nin ñaan yëlanats pëtsu pul puu ro ko wi na ŋal wi: Pul, aci-unjuatsia wi ñaan yëlaants wi, a pa cum ni bunuunk bi kan fiŋ bi.

⁹ Ni pul, nja kë jaar-ngëwar Ajug nja nul Asin inja; a ni pul kak nja kë ja ngëwutsëtsuel tsi uleka bañaan-bajin, bukul biki Nasien-batsi leemp biki tsi bënaamul.

¹⁰ Mtum mi ka n ja mi ngëwar, ka ja buts ngëwutsëtsuel. Batsaar ni nji! Ko kaats pëci ank.

¹¹ Ane ukëpës aja u roon uu pënani mlik mjuab ni mlik mwaay tsi baar bëloole bun-a?

¹² Batsaar ni nji! Bëkungul, ane a yëlan pëbuk mëoliwa-a? A bëbiiñu, ane a yëlan pëbuk mbuk bëkungul-a? Unk buts, tsëko tsi kan pënani tsi mlik mwaay di ka pënani mlik mjuab.

Kameko kan pënë-ni ki di Nasien-batsi

¹³ Naom tsi ind ci-un nameko ni nalipal? Tsi bëroorul, na pibani ngëko ngi nuu ro ngi ci ngëwar, a nuu ro ngul tsi kawelan-beenul kan piban ki na ci nameko.

¹⁴ Maa, uci ngëwaas ind cum ni mñibula mwiak, ni pëŋal ngëko bëlieng pëci ngiic ind, ind tsë guukandër, ind tsë pok ko un ci wi ucär;

¹⁵ kameko kamënts ki, cits kan pënë-ni ki ruets; aci ki utsia, ki uŋal ñaan-najin, ki ngëcaay.

¹⁶ Par tsi mñibula ci tsi, a tsi pëŋal ngëko bëlieng pëci ngiic ind ci tsi, din kagusëlën ngëko ka ci tsul, ni karo ngëwutsëtsuel ngan ci ngi ba këci.

¹⁷ Maa, kameko kan pënë-ni ki batsi, acakësaan pëci kajëntsal, a ka ru ci kan tsiji ki pëfac, ni kajuab-uwaas, ni manteelar, ni pëcum ni kayëk-ipës, ni ngëwar ngan dola ngi; kul di ka kicës bañaan, kaats kanguungu.

¹⁸ Batsas pëfac pa ci, bu ka ro ngëko bëmabal tsi pëfac.