JAKOB 2 - KARÚK-PËRIM KAWALU Nouveau Testament

Përëmban balon, kë tienkëtsan bacints, waraatsa

¹ Batsaar ni nji! Ind tsë jej uwak ind tsi Ajug nja Yeesu Këristu, nul nan dëmbanee, ndë bofëlan wul ni pëkicës bañaan.

² Uci tsi bëjúk ind, a ñaan niaji tsul awaki kanel uwëru a na tiemee kaŋí kawaralkan, a uci naranj niaji buts tsul atiemee kaŋí ka cätsar,

³ a uci nda rëmban nan tiema unk kaŋí kawaralkan, a nda jaul: “tsoaran tsi pëtsoari pëwar pi;” maa a nda ja naranj: “Wi natsan dun oo tsoaran tsi utsia tsëpafëni iyots nji;”

⁴ nda cits këci tsi pëkicës bañaan tsi pëncuaf ind-a? A cits unk di nda ci run bawat-pëleents ban tsij biki ngëwejats nga waraatsa ngi-a?

⁵ Batsaar ni nji, ind biki n ŋal biki! Nda cikëndëni-e: Nasien-batsi ratats iink ba n jaka biki tsi umundu bë ci baranj-a? Pa ba ci barëmb tsi uwak, ni barukanda pësien pi na watsan pi ba ŋalul biki.

⁶ Maa ind, nda tsuuts naranj ko. Cits iink barëmb ka luekan ind bukun, a bu kë puular ind tsëko kawat-pëleents-a?

⁷ Cits bukul ka kar bukun katim kawar kan tsua ind ki -a?

⁸ Tsi ucär, uci nda ro ko wi ulua pësie n ja wi, bi u picana bink aja: “Ŋalan acintsu pi m ŋal pi beenu,” ndë ro uwar.

⁹ Maa uci nda ci tsi puu kicës bañaan, ndë ro ujuban, din ulua ka lacan ind, par nda mabats tsi wul.

¹⁰ Par, uci ñaan mob tsi përo ko wi ulua ja wi bëlieng, maa a na lac tsi ulua uloole, në ci na laci tsi ngul bëlieng.

¹¹ Par, na njai: “M di kë piintsand ŋaats na nimee,” ajaand përim pi: “M di kë fiŋ ñaan.” Bi u ci bank, uci m piintsandats ŋaats na nimee, maa a m fiŋ ñaan, m duka m ci na laci tsi ulua.

¹² Nda ñakani, ndë ro, pi bañaan ban ka biki pëwata pëleents bi ulua wi kan bueran wi tsu bi.

¹³ Par, nandootsi ka yëkar bañaan ipës, di ka yëkara ipës tsi kawata-pëleents. Kayëk-ipës ka gaañar kun kawata-pëleents.

Uwak, ni karo-ko

¹⁴ Batsaar ni nji! We kat wun kalon ñaan pëja aka uwak, maa a di ka ro ngëko ngëwar? Uwak wan a yëlan pëbuera nul-a?

¹⁵ Uci ni nda tsaari, niints oo ŋaats, tiemaatsa kaŋí, a kaats bariala kara unu,

¹⁶ a nalon tsi ind jaul: “tsëpan ni pëfac, wupatsari kë yëkan, dialaan suets;” maa a wëlatsul ko wi na fier wi pa uliaful, wee umënts wun ka wun bëkat?

¹⁷ Unk di uwak ci run buts: Uci u pibanats ngëwar, ci wun a cäts bërier wul.

¹⁸ Maa nalon ka ja: “Wi, m ka uwak, a nji man ka ngëwar ngi n do ngi.” Pibanin-e uwaku, wul un kaats wi ngëwar; a nji, ngëwar ngi n du n pibanaanu ngun uwak nji.

¹⁹ M wak tsi pëja, Nasien-batsi aci naloole baŋ; m do uwar. Ngëcaay awak buts tsi ko wan, a nguu lënk bak-bak.

²⁰ Ko wi m danj wi ibats! Ane m ŋal pëme uwak un kaats wi ngëwar kaats bëkat-a?

²¹ Abraam, asin nja cits iink undo ngëwar ngi na ro ngi, ka wun na tsua namabal, uwal wi na tseend wunk abukul, Isaak, tsi bëgij-a?

²² Wi win unk: Uwak, ni ngëwar ngi nuu ro ngi ayandaar; a ngëwar tsu uwakul a u band.

²³ Unk piban dun ko wi Bëpica n ja wi rolaa: “Abraam awak tsi Nasien-batsi, a na tsua namabal, undo uwakul;” a nuu rua bëfetsar Nasien-batsi.

²⁴ Ind win bukunk: Ngëwar ngi ñaan kë ro ngi ka ngun na tsua namabal, ciinats tsi uwak rin.

²⁵ Raab, nul nan ci ŋaats natúk-ufuts, cits iink buts undo ngëwar ngi na ro ngi ka wun na tsua namabal, bi na welan bi bayëlia, a nee wëtan bukul ba tsëp bëlon bëga - a?

²⁶ Bi uja bunk uliaf kaats uyafënts u cats, unk buts uwak a cäts uci u pibanats ngëwar.