JAKOB 1 - KARÚK-PËRIM KAWALU Nouveau Testament

Kawël-mboos kajuundë-ni

¹ Jakob, naluek Nasien-batsi ni Yeesu Këristu, Ajug, pa këbuka untaaja kun ni këtëb, kan gara ki jëk umundu: Nda ciin uwar!

Uwak, ni bëlipal

² Batsaar ni nji! Tsi unoor wi nda ciina wi ba këciina, nda moban wul ni ulílan un kës wi;

³ ndë me, pëteenamën-napi uwak ind teenamana pi, ka tsu ind tsi umiira.

⁴ Umiira aka pëba uleemp wul, pa ndë ba pëci bawar, ndë jëŋ, nda rits cika tsi ko.

⁵ Uci nalon tsi ind kaats kameko, na yepan kul Nasien-batsi, nul na njai na roon nuu wël unk bañaan bëlieng, te di ka leentsar ñaan. Na yepul kul, në wëlaa.

⁶ Maa na yepan kul ni uwak, nul tsë tsij ngëwejats ngëtëb; par nan tsiji ngëwejats ngëtëb, aci pi umaroŋ bërëk, wi ufuts ja wi u roon uu siints-siintsan, uu riang wul.

⁷ Ñaan pi namëntsan, nul tsë wejatsar na ja ne Ajug ka wëlul ko;

⁸ par aci ñaan nan ditsi ka mobuna pëloole, di ka mob tsi ngi na ciina ngi, ngul bëlieng.

Baranj, ni barëmb

⁹ Nan tienkëtsanee, na lílani urëmbanaul.

¹⁰ Maa narëmb, na lílani utienkëtsanaul, par nul ka par këpar pi pëtsiañ pëtsats.

¹¹ Unu natsee, a bunu tabi, a pëtsats kay a pëtsiañ pul yii, din a kawara pul ba. Unk di ubiira narëmb kë naam dun pi ko undots wi, a u ba.

Pëka umiira tsi pëteenamën-na

¹² Anaak, ñaan na miiree tsi pëteenam-na! Par, nan pei pëteenam-na, në yank kape ubiira wi Ajug watsan wi ba ŋalul biki.

¹³ Uwal wi ñaan kë teen-teenana wi, nul tsë ja: “Aci Nasien-batsi ci-un tsi pëteen-teenanin.” Par, ngëwutsëtsuel yëlanats pëteen-teenan Nasien-batsi, a Nasien-batsi bërierul di ka teen-teenan ñaan.

¹⁴ Maa nan teen-teenanai, ateen-teenana tsi uleka kari-koul, a u raacul tsi kafäl.

¹⁵ A kari-ko seempa, kë buki ujuban; a ujuban jëŋ u buk pëcäts.

¹⁶ Batsaar ni nji, ind biki n ŋal biki! Ind tsë fal iyeen ind;

¹⁷ ko bëtseend u wara wi, ni ko wi kan tseenda wi ñaan, un ba wi pëci uwar, aci ngan pëni ngi ruets, ngan pënë-ni ngi di Asin, nan doi ngëfac; nul di ka witsësar, kaats ulimënts wi kan buta-buta wi;

¹⁸ abukëni nja përim ucär, tsi uŋalul, pa nja ka yëlan përo pi ngë ci bacäk tsi ngëkoul ngi na leemp ngi.

Pëcikëndan, ni përo ko un jaka wi

¹⁹ Batsaar ni nji, ind biki n ŋal biki! Nda moban ko wi tsi ibats: Ñaan, në cësara puu cikëndan, në tsëkandar a në rura ñakan, në wët pëcar uriab.

²⁰ Par, uriab ñaan-najin di ka ro ko u mab wi, wi Nasien-batsi ŋal wi.

²¹ Wul ka wun, nda wëtani ko un tsop wi, ni kabuer kajuats-ngëwaas, ndë mob ni ngëwaas-ngëjuab përim pi nda wëla pi, a pa yëlan pëbueran ind.

²² Nda moban tsi përo ko wi përim ja wi, ind tsuu tsë cikëndan këcikëndan pul rin, tsi kafäl iyeen ind.

²³ Par, uci ñaan cikëndan përim a mobats tsi përo ko wi pa ja wi, në ci pi ñaan nan teenari tsi kateenaraani a na win urostuul wi na bëkanda wi;

²⁴ a nu ba pëteenar, a na pën atsëp. A tsi uyëk umënts, a na fin bi na naam bi.

²⁵ Maa nan kaŋani këkësul tsi ulua un ba wi pëci uwar, wi kan bueran wi, a na liincandar, a cits nacikëndan ni ka fini, maa a namob tsi puu ro ko wi u ja wi, namënts un ka naak tsi ngi nuu ro ngi.

²⁶ Uci ñaa n ja tsi ibatsul aci nafets-bëga, te di ka mob pëndiamëntul, maa a nuu fal beenul, bëga ñaan namënts un cits koon këci ko.

²⁷ Bëga bëjëntsal, te kaats mtsopi tsi bërun Nasien-batsi, Asin nja ci bun bi: Puu ya pëwin babënatsa ni ban cätsëndan biki bayën bukul, puu ya pëwin bukul tsi unjuatsia wi ba ciina wi, ni përits tsopandar ni ngëko umundu.