FILIIPUS 4 - KARÚK-PËRIM KAWALU Nouveau Testament

¹ Wul ka wun, batsaar ni nji, ind biki n ŋal biki a n dí pëwin ind, ind ban ci biki ulílan nji, ni ucape nji wi pësien, nda moban unk nda liincan tsi Ajug, ind ba ŋala biki!

Nda ciin tsi puu lílan tsi Ajug

² Man buara Ewoodia, a n buara Sintiki, pa ba teelar tsi Ajug.

³ Eey-e, wi kambof-uleemp ni nji, nacär! Man ñaanu këñaan, tsënkan bakaats bamënts biki, bukul ban kamandar biki Upetsan-uwar tsëloole ni nji, ni Këlementi, ni baleemp ni nji ban duka bukunk bëlieng, bukul biki itim bukul ci yi di ulibëru ubiira.

⁴ Nda lílani tsi Ajug tsi ngëwal bëlieng. Má nja ka k, Nda lílani!

⁵ Kajuab-ngëwaas ind, bañaan bëlieng ba mean kul. Ajug awokani.

⁶ Ind tsë lënkar ko; maa tsi ko un ci wi-ba këci, ndë ja tsi bëñaan ni tsi pëbuara, ni pëbaranaand, ndë yep Nasien-batsi ngi nda fier ngi.

⁷ Unk, pëfac Nasien-batsi, pul pan pe pi ko un yëlan wi pëmeaa, pë gaang ngëwaas ind ni ngëwejats ind tsi Këristu Yeesu.

⁸ Pëtuamës, ind batsaar ni nji, ko un ci wi-ba këci ucär, ko un ci wi-ba këci wi urispiitu, ko un ci wi-ba këci umabal, ko un ci wi-ba këci ujëntsal, ko un ci wi-ba këci-un ka wi pëŋalaa, ko un ci wi-ba këci-un ka wi pëbëndanaa – uci ko ci a u buer pëwara, oo a u tsënkan pëjaa abëndanaa —nda tsuun ibats tsi ngëko pi ngëmënts ngun.

⁹ Ko wi nda juk wi ba këjuk tsi nji, wi nda yank wi tsi nji, wi nda te wi tsi nji, wi nda win wi tsi nji, nda roan wul. Din Nasien-batsi, kankaana pëfac, ka ci ni ind.

Bëbaran tsi uleka ngëtseend ngan tseenda ngi

¹⁰ Man lílan mak tsi Ajug, par nda yela piban kak nda wejatsin. Tsi pëwejatsin, nda wejats, maa nda roots ka bi ndu piban bi ko umënts wun.

¹¹ Cits bëranj tsuin bun pëja ko umënts, par man juk puu lílan, tsi ko wi nciina wi ba këciina.

¹² Ma me ko un ci wi pëci ni ko un tienkëts wi, a me ko un ci wi pëka n dëmban. Bi u ci bi ba këci, ni tsi ko un ci wi-ba këci, man juk përiala n suets oo pëbonats, pëka cuman oo përanj.

¹³ Man yëlan ko un ci wi-ba këci, tsi Këristu, nawëlin pëyëlan.

¹⁴ Maa nda ro uwar, bi nda tsënkin bink tsi unoor nji.

¹⁵ Ind ban ciina biki Filiipus, nda me koon, tsi ujuundi uleemp kaleents Upetsan-uwar, uwal wi n pën wunk di Masedoonia, nin Ngëriisia ngëloole ñakanaanats ko ni nji tsi uleka pëwël ko, ni pëyank ko; aci koon ind koor ind.

¹⁶ Par ŋal uwal wi n ci wi di Tesalonika, cits uyaas uloole wi nda wëtaniin wun ko wi n fier wi; nda tëbants.

¹⁷ Nji n cits këci tsi pëtsas n tseenda ko, maa mán tsas këtsas bëkat bi ka watsës bi bëka ind.

¹⁸ Man yank ngëko bëlieng a n kësan, a n par-paran. Man cumana ngi n fier ngi, bi Epafëroditu wëlin bink ngi nda wëliin ngi. Ngul, aci pi ulicar u líl wi pëñal, bëjakan ba niiranaa bi, ba líl bi Nasien-batsi.

¹⁹ Nasien-batsi nji, ka roor ind ngëfier ind bëlieng, bi bëka përëmbul ci bi tsi Këristu Yeesu.

²⁰ Përëmb pa ciin pa Nasien-batsi nja nul Asin, pa sandëndën. Ameen!

Kawël-mboos katuamë-ni

²¹ Nda leendarin kara nayëman tsi Këristu Yeesu! Batsaar ni nja ban ci biki ni nji, bë leeni ind.

²² Bayëman bëlieng, bë leeni ind, apeena biki kato Seesar.

²³ Bëtseend Yeesu Këristu, Ajug, ba ciin ni uwejats ind. Ameen!