FILIIPUS 3 - KARÚK-PËRIM KAWALU Nouveau Testament

Bëmabal bucar, ni pëtukar ngi Këristu

¹ Pëtuamës, ind batsaar ni nji, nda lílani tsi Ajug! Nji pëpicari ind ngëloole ngëmënts ngun, cits ko u ñatsin wi përo; te aci uliincëni ind.

² Nda katan ibats tsi uleka ngëbuus! Nda katan ibats tsi uleka baro-ngëko-kawaraatsa! Nda katan ibats tsi uleka kawela-kambac kan cits ki kacär!

³ Par kawela-kambac, acnja, nja ban ja biki ngë roon, nja kë jintëlaana Nasien-batsi tsi Uwejats-ujënts, a nja kë pícëna tsi Këristu Yeesu, a ngë fiaarats ngëko uliaf.

⁴ Te mando n yëlan buts pë wak bëci ñaan-najin. Uci ñaanja tsi ibatsul ayëlan pë wak bëci ñaan-najin, nji n pe un.

⁵ Man welana kambac tsi unu uwasantsan. A n ci ñaan kajër Israel, ñaan pëbuka Benjamin, nayebëreu kanbëka Bayebëreu. Tsi uleka ulua-Moises, mando n ci Nafariseu.

⁶ Tsi kayëkandar përo ko, mando n ci tsi puu noor-nooran Ngëriisia. Tsi uleka bëmabal tsi ulua, nji n kaats ulaci.

⁷ Maa ngando ngi ci bëkat tsi nji, manduka n tsu ngul pi kaniaman-ko, undo Këristu.

⁸ Tsi ucär, man tsu ngëko bëlieng pi kaniaman-ko, undo ko un pe wi pëwara, un ci wi pëme Këristu Yeesu, Ajug nji. Tsi undoul a n niaman ngëko bëlieng. Man tsu ngul pi ngëtsopal ngan gutsaa ngi. Unk ka ka Këristu,

⁹ ka winaa tsi nul, te u rits ciina tsi bëmabal nji bërierin ban pënëni bi tsi ulua-Moises, maa ban pënëni bi tsi uwak tsi Këristu. Aci bëmabal ban pënëni bi tsi Nasien-batsi a ba sëtsaraan tsi uwak.

¹⁰ Man ŋal pëme Këristu, ni pëyëlan pënatsa pi na natsee pi di pëcäts, ni kambof tsi unoor wi na noor wi ba kënoor, ka ruka n naam pi nul tsi pëcätsul,

¹¹ pa ndoon, bi u ci bi-ba këci, ka tsënkan pënatsee tsi bacäts.

Pëtúkar pëtsënkan

¹² Cits pëjaa ne, man yank ba umënts wan bëlieng, oo ne manduka n ba ba pëwarandana. Maa, man ci tsi pëtukar pëmob wul, par nji bërierin, Këristu Yeesu amobin.

¹³ Batsaar ni nji, nji bërierin, in tsuuts pëja manduka n mob ba wul. Maa, man ci tsi përo ko uloole, pëfin ngan ci ngi di ufets, ni pëpënar ngan ci ngi di bërun.

¹⁴ Koo n tukar pëband pii yank bëluk bi Nasien-batsi ruurin bi di batsi, tsi Këristu Yeesu.

¹⁵ Bi u ci bank, n ja bëlieng ban jëŋ biki, nda ju ngë tsij uwejats umënts wun. A uci ko ci, wi nda pats wi buwejatsar tsi wul, Nasien-batsi kee jëntsan ind wul buts.

¹⁶ Maa tsi ngë ruka tsink aband, nda ju ngë bof pëya bërun.

¹⁷ Batsaar ni nji, nda ciin bateenënin; nda mabani këkës tsi biki ka yandaar biki bi wund piban ind bi!

¹⁸ Par, bi ndo bunk leents ind ngëyaas ngëcumal, a nji ka n leents ind ink kak ni mŋand, bacumal aci tsi pëyandaar pi bë ci bañaas kruus Këristu.

¹⁹ Ko wi bu kë tuamanaan wi, aci pëniam; par pëpës ci pun nasien-batsi bukul, a bu kë pícëna ko un ci wi bukul mkaw, bukul bawejats ngëko umundu.

²⁰ Maa use nja aci di batsi. A ngë ruka ci tsi pëlip Nabueran, un ci wi Yeesu Këristu, Ajug, na pëni rul

²¹ nii witsës ngëliaf nja ngul ngan tienkëtsana ngi, në tsu ngul ngë naam ni uliaful wi përëmb. Ka roona ko wan tsi pëyëlan pi na ka pi, pi nu tsuuna pi ngëko bëlieng, nga fets përimul.