FILIIPUS 2 - KARÚK-PËRIM KAWALU Nouveau Testament

Pëteenëna kawelan-been ki Këristu welan ki

¹ Bi u ci bank, uci kalon kaliinc-liincana ngëwaas tsi Këristu ci, uci kalon kajuabutsana-ngëwaas tsi bëŋal ci, uci kalon kambof tsi Uwejats-ujënts ci, a uci kalon kajuab-uwaas ni kayëk-ipës ci,

² nda tsuun ulílan nji u ci-un kës wi, tsi ind pëbaar pëloole, ni pëbof bëŋal bi nduu ŋal bi, ni pëci uwaas uloole, ni pëbof uwejats uloole.

³ Ind tsë ro ko, pa pëpícëlër, nin pa pëpibandar; maa tsi kawelan-been, nan ci na moban bacintsul pi bu peul.

⁴ Nan ci, nul tsë teenëna ngiicul bërierul, maa na teenëni buts ngi bacintsul.

⁵ Nda tsijan uwejats umënts wun tsi ind, bi u ci bunk tsi Këristu Yeesu,

⁶ nul nan ci bëci Nasien-batsi, teenats pëkuendala pëliing këliing ni Nasien-batsi.

⁷ Maa atsu beenul nacits-ko, a na ruka ci bënaam bañaan-bajin, a na jej bëci naluek atsuar. A bi na wina bunk tsi bënaamul na ci ñaan-najin,

⁸ na welan beenul, aruka mob tsi ko wi na jaka wi. Unk te di pëcäts, pëcäts pan ci pi pi kruus!

⁹ A wul ka wun Nasien-batsi riangul te tsan pe tsi pëci di ruets, a na wëlul katim kan ciki di ruets itim bëlieng.

¹⁰ Unk tsi katim Yeesu, pëjuul pan ci pi-ba këci di batsi, ni tsi utsia, ni di bametsu utsia pë kuuja.

¹¹ A pëndiamënt pan ci pi-ba këci, pë pets ka ja, Yeesu Këristu ci-un Ajug, pa përëmb Nasien-batsi, Asin.

Bañaan-Këristu ba fietsan pi ufac tsi umundu

¹² Unk, bamiñ ba ŋala biki, ind ba nja biki nda roon tsi ngëwal bëlieng nduu ro ko wi nda jaka wi, nda ciin tsi puu ro unk. Cits rin tsi bërun nji, maa nda ruraan pe këpe puu ro unk inkri, bi n cits bink. Nda moban tsi pëtsu pëbuer ind tsi karo-ko, nduu lënkand mak.

¹³ Par, Nasien-batsi ci-un nan ci tsi pëleemp tsi ind, pa pëwël ind uŋal, ni përo bi utsaagul uwar ci bi.

¹⁴ Nda roan ko un ci wi-ba këci, te mŋëmŋëm tsë ci, mantotëlër tsë ci.

¹⁵ Ndë ci ba lacäts biki, ndë ciind bajëntsal. Ndë ci upäts Nasien-batsi ban kaats biki ulaci tsi pëncuaf bañaan uwal wi, ban ci biki baniamëlan ni bacolats ubiira. Nduu fiets tsi wul pi ngëpesaj tsi umundu,

¹⁶ ind ba mob bikink përim ubiira aliincan. Unk, tsi Unu Këristu, ko umënts wun ka ci upícëni nji, undo pëtuk pi n túk pi, ni mcibi mi n cib mi, përits ci ko un kaats wi bëkat.

¹⁷ Maa, ŋal ank ka ka pëwël ubiira nji u ci bëjakan ni bëtseend uleemp uwak ind, man lílan, a ndu n juc ni ulílan ni ind bëlieng.

¹⁸ Unk, ind buts, nda lílani, ndë juc ni ulílan ni nji.

Timoteu ni Epafëroditu

¹⁹ Tsi Yeesu Ajug, man wejats pëyëli Timoteu di ind, tsi ko un car wi, uwejats nji ka tsëk, ute nji uleka ind.

²⁰ Nji, in kaats ñaan nan ci pi nul, ni wund bofi ibats, nan ci tsi pëwejats tsi ubaaraari ko u wara wi pa ind.

²¹ Par, aja nan ci nuu tsasar ngëko beenul, cits ngi Yeesu Këristu.

²² Maa nda me ko wi Timoteu piban wi tsi bëciul: par, pi napäts tsi kawok asinul, aleemp ni nji tsi uleemp Upetsan-uwar.

²³ Wul ka wun, nul ni n wejats un pëyëli, uba nji pëwin ko un jënts wi tsi uleka nji.

²⁴ Te tsi Ajug, man wak koon ndu n bi bërierin, tsi ko un car wi.

²⁵ Maa, ma wak u wara pëkakani ind Epafëroditu, nul natsaari ni nji, acints nji tsi uleemp, acints nji tsi ukam, nul ni nda yëlii pa puu roorin ko wi n fier wi.

²⁶ Par, arí mak pëwin ind bëlieng. Ajuatsan par nda te na maak.

²⁷ Tsi ucär, aro maak aa nuu tsas pëcäts. Maa a Nasien-batsi yëkarul ipës; te citsul rin ni na yëkar un ipës, maa nji buts, nji përits ci tsi pëjuatsan.

²⁸ Nji n car ink pëyëliul, uwin ind nul kak, ndë lílan, din pëjuatsan nji ka rukësa.

²⁹ Bi u ci bank, nda welaniul tsi Ajug ni ulílan uwiak, ndë rispitaar bañaan pi nul.

³⁰ Par aruka ko uties në cats, undo uleemp Këristu; awaants ubiiraul përo tsi pëlas ind ko wi nda yëlanats wi përoorin bërier ind.