FILIIPUS 1 - KARÚK-PËRIM KAWALU Nouveau Testament

Kawël-mboos kajuundë-ni

¹ Pol ni Timoteu, baleempar Këristu Yeesu, pa bayëman bëlieng tsi Këristu Yeesu, ban ci biki di Filiipus, bukul ni bawaay, ni batsënk.

² Bëtseend ba wëlaan ind ni pëfac, pëpën-ni tsi Nasien-batsi, Asin nja ni tsi Yeesu Këristu, Ajug.

Pëbaran tsi uleka bayëman di Filiipus, ni pëñaandar bukul

³ Ma n ja n doon ka baran Nasien-batsi nji, kara bëyaas bi n les ind bi.

⁴ Tsi ngëwal bëlieng, aja kara buñaan bi ndu n ñaandar ind bi ind bëlieng, ka ñaan ni ulílan,

⁵ undo nda bof tsi uleemp Upetsan-uwar, ki unu ucak te inkri.

⁶ Man wak koon ko wi: Nan kur unk përo ko uwar tsi ind, ka mob tsi përo wul na ba, te tsi unu Këristu Yeesu.

⁷ Nji pëwejats unk tsi uleka ind, ind bëlieng, aci ko u mab wi, par man tsu ind tsi uwaas nji; par tsi mdica mi n dica mi, ni tsi pënatsar Upetsan-uwar ni pëpiban u baaraan pëci, ind bëlieng nda bof ni nji tsi bëtseend Nasien-batsi.

⁸ Par, Nasien-batsi awin bi n tsu ind bi bëlieng mak tsi uwaas nji, ni kayëk-ipës ki Këristu Yeesu yëk ki.

⁹ A bëñaan nji ci bun bi: Bëŋal ind ba pelëki, buu pe këpe, tsi ume ni tsi buwinal,

¹⁰ ndë yëlan pëyëkëran ngan pe ngi pëyuk, ndë ci bajëntsal, nda rits ka ulaci, te tsi Unu Këristu.

¹¹ Unk ndë cum ni ko wi bëmabal kë buk wi, wi kan pënë-ni wi tsi Yeesu Këristu, pa përëmb Nasien-batsi ni ubëndanul.

Përica Pol, aci pa Upetsan-uwar pëya bërun

¹² Batsaar ni nji, ma ŋal ind pëme, ko un baandë-niin wi, atsu këtsu Upetsan-uwar pëya bërun.

¹³ Par, tsi bagaarir kato-pësien bëlieng, ni tsi bañaan ban duka bukunk bëlieng, awinaa u ci-undo Këristu ka wun n tanaa mkorente.

¹⁴ Undo man tanaa mkorente, a ban pe biki pëcum tsi batsaar tsi Ajug kë pe këpe pëka bëyeentsal pa pëleents përim Nasien-batsi; bë cits ni bëlal.

¹⁵ Tsi ucär, aci-undo mankocar ni mampícëlër ka wun balon kë leents uleka Këristu, maa aka biki kan do biki umënts wun ni uŋal uwar.

¹⁶ Batuami biki, bë ja ba roon bu kë ro umënts wun, tsi undo bëŋal. Bë me n tsua pa pënatsar Upetsan-uwar.

¹⁷ Maa bukun, bë ja ba roon bu kë leents uleka Këristu, undo mampícëlër. Ngi bu kë wejats ngi jëntsats; bë ja ne bu yëlan pëtsu pëtana pi n tanaa pink mkorente pa pe këpe pëjuats.

¹⁸ A umënts wan do we? Aci koon ko wi: Bi u ci bi-ba këci, ŋal ank tsi kanguungu, ŋal ank ni ucär, Këristu aleentsaa bañaan. Man lílan tsi ko wan, a ndu n mob tsi pëlilan.

¹⁹ Par, man me umënts wun kë tuamanaan pëci pëbuer nji, undo bëñaan ind, ni bëtsënk Uwejats Yeesu Këristu.

²⁰ Ko wi n dí wi mak pëwin, ni tsi uwats nji, aci nji përits kawarana koon këkawarana, maa n doon ka liincan katsëb. Këristu ka rëmbanaa tsi uliaf nji, tsi inkri ni tsi ngëwal bëlieng, uci ank pëpar-na ubiira, oo pëcäts.

²¹ Par tsi nji, pëci ni ubiira aci Këristu, a pëcäts ciin bëkat.

²² Maa, uci pëwamand ubiira tsi uliaf kë tsiji bëkat pa uleemp nji, we wi n du n dat wun-i? Nji n meets!

²³ Man mí tsi ngëjara ngëtëb ngi; ma ŋal mak pëtsëp kee ci ni Këristu, te wul pe wun pëwara mak;

²⁴ maa nji pëwamand ubiira tsi uliaf, ape pëfieraa, tsi undo ind.

²⁵ Man wak koon umënts wi, a me n du n duka, ka ci ni ind bëlieng, pa ind pëya bërun ni pëci ni ulílan, tsi uwak.

²⁶ Unk, din pëkaki nji tsi ind ka tsu upíc ind tsi Këristu Yeesu pëwatsësar, undo nji.

Pëmob pëliincan tsi ukam

²⁷ Maa ko uloole rin, nda yandaari bi u ka bi pëci tsi Upetsan-uwar Këristu. Unk, uci ank n bi a n win ind, oo uci ank n cits a n te uleka ind, ka me nda ci tsi pëliincandër tsi kabof-uwejats uloole, a nduu bof ukam tsi uwaas uloole, pa uwak Upetsan-uwar.

²⁸ Te nda lënkats koon këlënk bakaman ind. Umënts wun aci bukul ko un piban wi pëniam bukul, maa ind, pëbuer ind; a u ci-un pënë-ni wi tsi Nasien-batsi.

²⁹ Par nda wëla bëtseend, tsi undo Këristu. Cits pëwak tsi nul rin, maa buts pënoorarul.

³⁰ Nduu kaman ukam uloole wun, wi nda win wunk n kaman, a inkri a nda te n wama n ci tsi pëkama wul.