FILEMON 1 - KARÚK-PËRIM KAWALU Nouveau Testament

Kawël-mboos kajuudë-ni

¹ Pol, narica undo Këristu Yeesu, ni Timoteu, nul natsaar ni nja; pa Filemon, na ŋalee a na ciind naleemp ni wund,

² ni pa Apëfia, ŋaats nan tsaari ninjani pa Arkiipu, wi, acints wund nakaman, ni pa Ngëriisia ngi kan júk ngunk di katou.

³ Bëtseend ba wëlaan ind ni pëfac, pëpën-ni tsi Asin nja Nasien-batsi, ni tsi Yeesu Këristu, Ajug.

Bëŋal Filemon, ni uwakul

⁴ Ma n ja n doon koo baran Nasien-batsi nji, tsi ngëwal bëlieng, bi n du n lesu bi tsi bëñaan nji.

⁵ Par, ma nja n doon koo te uleka uwak wi m ka wi tsi Yeesu, Ajug, ni bëŋalu pa bayëman bëlieng.

⁶ Unk, kambofu tsi uwaku, ka ciin kan ka ki pëyëlan, tsi pëme uwar ko u wara wi-ba këwara, wi ngë ka wi tsi Këristu.

⁷ Man ka ulílan uwiak, a n liinc-liincana uwaas, undo bëŋalu. Par wi, natsaar ni nji, m juabutsan ngëwaas bayëman.

Pol añaandar Oneesimu

⁸ Wul ka wun, ŋal bi n fac bi mak tsi Këristu pa pëtsuu përo ko un ka wi përolaa,

⁹ nji man ñaanu këñaan, tsi undo bëŋal. Nji Pol, bi n ci bink natsafal, a n ciind inkri narica, undo Këristu Yeesu,

¹⁰ man ñaanu këñaan pa napäts nji, Oneesimu, ni n dukee n buk tsi mdica mi n dica mi.

¹¹ Nul, tsi uwal un par wi, roots kaaru bëkat; maa inkri akaaru bëkat, ni nji buts.

¹² Mán wëtaniul na kaki tsi wi, nul nan ci uwaas nji.

¹³ Mando n ŋal pëtsijul n wokaraand, pa nuu tsënkin tsi pëlasu, tsi uwal wi n tanaa wink mkorente undo Upetsan-uwar.

¹⁴ Maa nji n ŋalats përo ko, uci m niiraants; pa uwar wi kë ro wi tsë ci pi aroona ni pëyëlan, maa u ciin wi m ŋal wi përo, wi bërieru.

¹⁵ Par, ulon unk, ko un ka wi na ro patsësau, pa ngëlon ngëwal, aci pa nii kakanau pa ngëwal bëlieng;

¹⁶ katse ci pi naluek, maa ape naluek, aci ni nda tsaari këtsaar, na ŋalee. Nul aci ko umënts wun mak tsi nji, a na peena pëci wul tsi wi, unk tsi bëciirul ñaan-najin, ni tsi bëciirul tsi Ajug.

¹⁷ Bi u ci bank, uci m mobin pi ngë bof, welaniul pi aci nji.

¹⁸ A uci na lacu tsi ko, oo uci u ka ko wi na tsiatsu wi, tsuun wul tsi katim nji.

¹⁹ Nji Pol, nji ka n pican ink ni kañan nji bërierin. Nji, mee n luk. Pa nji tsë n jau këja, wi buts m tsiatsin ubiirau bërier wul.

²⁰ Eey-e, natsaar ni nji, ma ŋal wi pëkaarin bëkat bëmënts bi, tsi Ajug; juabutsanin uwaas tsi Këristu.

²¹ Man picariu, undo ma wak koon kë ro ko un jaka wi, a me kë ro aa kë paran ko wi n ja wi.

²² Paarirarin buts pëfër pëtsooŋatsaani, par undo buñaan ind, man wak ndu n kakana ind.

Kawël-mboos katuamë-ni

²³ Epafëras, acints nji narica, undo Këristu Yeesu, aleeniu.

²⁴ A Marku, ni Aristaarku, ni Demas, ni Lúkas, bukul baleemp ni nji, bu leeniu buts.

²⁵ Bëtseend Yeesu Këristu, Ajug, ba ciin ni uwejats ind.