EFEESU 6 - KARÚK-PËRIM KAWALU Nouveau Testament

Upats ni bábuk bukul

¹ Ind upäts, nda moban tsi përim bábuk ind, bi u ci bi tsi Ajug, par umënts wun mab wun.

² “Rëmbani asinu ni aninu” aci utsua ucak un tsij wi uwatsan:

³ “pa wi pëci uwar, kë yamp ubiira tsi ucaak.”

⁴ A ind basin upäts, ind tsë riabatsan upäts ind; maa nda kusan bukul, tsi pëjukan bukul, ni pëmaban bukul tsi Ajug.

Baluek ni bajug bukul

⁵ Ind baluek, nda roan ko wi bajug ind tsi uyamats kë ja ind wi. Nda roan wul tsi bulal ni pëlënk, ni kajuab-ngëwaas ind; pi aci pa Këristu ni nduu leempar un.

⁶ Ind tsë ro ank tsi këkës bañaan-bajin din, pa bukul pëlilandër ind; maa nda ciin pi baluek Këristu, ndë mob tsi përo uŋal Nasien-batsi ni ngëwaas ind bëlieng.

⁷ Nda leempan ni uŋal pi aci Ajug ni nduu leempar un, cits bañaan-bajin;

⁸ nda mean ne, kara ñaan nan ci, ka yank tsi Ajug uwar wi na ro wi, na ci ank naluek oo nafacal.

⁹ Ind bajug baluek, nda roan unk buts pa bukul, ndë wët pëlënkan bukul; nda mean ne, Ajug ind ni bukul aci naloole na ci-unk di batsi, te ngëkicës cits tsi nul.

Iŋi Nasien-batsi ikamanaani

¹⁰ Pa pëtuamës, nda tambandari tsi Ajug ni tsi uyëlan pëyëlanul.

¹¹ Nda waan iŋi Nasien-batsi bëlieng ikamanaani, pa ind pëyëlan pënats uwar tsi igungan Ujabël.

¹² par nja, ngë ri ka kaman pëñaak ni uyamats; maa nja ka kaman msien, ni myëlan, ni myëlan ngan tsijëna ngi umundu wi, wi karëm, ni ngëwejats kawaraatsa ngan ci ngi di tsëko tsan ci tsi ba këci di batsi.

¹³ Inkri nda jejan iŋi Nasien-batsi bëlieng, ikamanaani; pa ind pëtambandar tsi pëpokëna tsi ngënu nga waraatsa ngi, ni pëci ba nats biki uwar uwal wi nda ba wi përo ngëko bëlieng.

¹⁴ Wul ka wun, nda natsan uwar ndë tsij ucär pi katël tsi bëlank, nda waan kakundi bëjinc ki bëmabal;

¹⁵ nda tsuun iraala tsi itsiim, un ci wi kayëkandar pëleents Upetsan-uwar pëfac.

¹⁶ tsi ngëmënts ngan bëlieng, nda jejan karandi, kan ci ki uwak wi nduu jimbuna wi iŋaaja bërua i Naro-ngëko-kawaraatsa kë wëtani yi bëlieng;

¹⁷ nda jejan kakapaciiti pëbuer, ni ulaac Uwejats-ujënts, un ci wi përim Nasien-batsi.

¹⁸ Nda moban tsi bëñaan tsi Uwejats-ujënts ngëwal bëlieng, ni tsi puu yep. Nda tambandari pëwaay tsi ko umënts wan, ni tsi puu yep pa bayëman bëlieng.

¹⁹ Nda ñaanarin buts, pa përim pëwëlain uwal wi ndu n waaban wi mtum, pa pëpiban tsi bëyeentsal undoots wi mea tsi Upetsan-uwar,

²⁰ wi n ci wi naciir wul tsi përica; pa tsi wul, nji pëyeents pëñakan bi n ka bi pëñakan.

Kawël-mboos katuamë-ni

²¹ Pa ind buts pëme ko wi nciina wi, ni ko wi n du n do wi; Tiikiku, nul natsaar nja na ŋalee, a na ci naleemp na mobi tsi Ajug, ka leents ind bëlieng ngan par ngi.

²² Man yëli ind nul pa umënts wan, ni ind pëme bi wund ro bi, në juabutsan ind ngëwaas.

²³ Pëfac ni bëŋal ni uwak, nga wëlaan batsaar tsi Këristu, ngul ngan pënë-ni ngi tsi Nasien-batsi Asin, tsi Yeesu Këristu, Ajug.

²⁴ Bëtseend ba ciin tsi ban ŋal biki bëlieng Yeesu Këristu Ajug nja tsi bëŋal ban dits bi ka niaman.