EFEESU 5 - KARÚK-PËRIM KAWALU Nouveau Testament

Pëyandaar tsi ufac

¹ Nda ciin bateenëna Nasien-batsi, bi nda ci bink upäts biki na ŋal biki;

² nda yandaari tsi bëŋal, bi Këristu ŋal nja bi a na wël ubiiraul bërierul pa n ja, pi bëtseend ni bëjakan ba líl bi pëñal pa Nasien-batsi.

³ Unk, mampiintsandar ni karo-ngëtsopal kan ci ki-ba këci ni karisan-ko tsë lesaa koon këlesaa tsi pëncuaf ind; bi u ka bi pëci tsi bayëman.

⁴ Irim i waraatsa yi buts, ni ngëñakan bëfuur oo ngan waraatsa ngi, ngëmënts ngan yukats; maa, u yuk wi aci puu baran Nasien-batsi.

⁵ Par ind, nda mean ko wi uwar: napiintsandar, oo naro-ngëtsopal, oo narí-ko — un ci wi najintëla-icap — di ka ka bërukanda tsi Pësien Këristu ni Nasien-batsi.

⁶ Ñaan tsë fal ind ni irim in kaats yi bëkat; par uleka ngëko ngëmënts ngi ka wun uriab Nasien-batsi kë baandë-ni babuk karoots ko un jaka wi.

⁷ Wul ka wun, ind tsë bof ni bukul tsi ngëmëts ngun;

⁸ par uwal ujon, ind nda ro ci karëm, maa inkri, nda ci ufac tsi Ajug. Nda yandaari pi upäts ufac;

⁹ par ko wi ufac kë buk wi aci karo-uwar kan ci ki ba këci, ni bëmabal ban ci bi ba këci, ni ucär un ciwi-ba këci.

¹⁰ Nda yëkërani ko u líl wi Ajug;

¹¹ ind tsë bof tsi ngëko ngi kandola ngi tsi karëm, ngul ngan kaats ngi bëkat, maa nda kúndësi ngul tsi ufac.

¹² Par ngi bu kë ro ngi tsi kambeku, akawundan pëleents.

¹³ Maa ngan pibanaa ngi bëlieng, ka wina tsi ufac,

¹⁴ par nga wina ngi bëlieng aci ufac. Wul ka wun u jaka: “Teenani, wi ni ka ŋooyi, natsaan tsi pëncuaf bacäts, Këristu ka fietsu.”

¹⁵ Wul ka wun, nda roon bëtsaag tsi bëyandaar ind, ind tsë ci bafuur; maa nda ciin bameko.

¹⁶ Nda kaan bëkat tsi uwal un ci wi, par ngënu aci ngan waraatsa ngi.

¹⁷ Wul ka wun, ind tsë ci bafuur; maa nda yëkërani ko wi Ajug ŋal wi.

¹⁸ Ind tsë kuj pëwat, pul aci kacok ubiira; maa nda cuman ni Uwejats-ujënts.

¹⁹ Nda ru kë jaalar irim tsi uya ubëndan, ni uya ubaran, ni iya tsi Uwejats-ujënts. Nda ru kë ya, nduu bëndan Ajug tsi ngëwaas ind bëlieng;

²⁰ nda ru kë ja Nasien-batsi, nul nan ci Asin, baran tsi ngëko bëlieng tsi katim Yeesu Këristu Ajug nja.

²¹ Nda welani iyeen ind tsi nda ci tsi, tsi pëlënk Këristu.

Bakaats banima ni bayën bukul

²² Bakaats nda welani iyeen ind tsi bërun bayën ind bi u ci bi tsi Ajug.

²³ Par niints na nimi ci-un been ŋaats, bi Këristu ci bunk been Ngëriisia, ngul ngan ci ngi uliaful, a nul ci-un nabueran wul.

²⁴ A bi Ngëriisia fets bunk përim Këristu, unk ŋaats na ci, na fetsan përim ayënul tsi ko un ciwi-ba këci.

²⁵ Ind bayënts, nan ci, na ŋalan aarul bi Këristu ŋal bunk Ngëriisia, a na wël ubiiraul bërierul pa ngul;

²⁶ pa pëyëman ngul, uwal wi na jëntsanaan wi ngul mlik, ni përim,

²⁷ pa nul pëpiban tsi bërunul bërierul Ngëriisia ngan bëndana ngi, ngan kaats ngi ujink, nin urotsar, nin ko ulon unaam wi ni ngëmënts ngi; maa Ngëriisia nga yëman ngi, ngan kaats ngi ulaci.

²⁸ Unk buts bayënts, nan ci na ŋalan aarul bi na ŋal bi uliaful. Na ŋali aarul, aŋal beenul bërierul.

²⁹ Par, yaas a ñaan ka bër uliaful; maa aja na roon nuu rialan wul, nuu tsuunkar wul, bi Këristu kë ro bunk Ngëriisia,

³⁰ par ngë ci incimëntsu uliaful.

³¹ Wul ka wun niints kë pën tsi asin, ni tsi anin, në bofëlar ni aarul, bukul batëb bu ka ci uyamats uloole.

³² Undoots wi mea arëmb, maa nji ma ñakan uleka Këristu ni uleka Ngëriisia.

³³ Bi u ci bank, ind buts kara ñaan tsi ind na ŋalan aarul bi na ŋal bi beenul bërierul; a ŋaats, na rëmbani ayënul.