EFEESU 4 - KARÚK-PËRIM KAWALU Nouveau Testament

Kambof tsi uliaf Këristu

¹ Wul ka wun, nji narica nan ci tsi Ajug, man buara ind nda ru kë yandaar uwar tsi karua ki nda ruuree ki,

² ni kawelan-iyeen ind bëlieng ni kajuab-ngëwaas, ni umiira. Nda ru kë míirëlar tsi nda ci tsi ni bëŋal,

³ ni pëtambandar pëka pëfac tsi pëtsuunkar kambof kan pënë-ni ki tsi Uwejats.

⁴ Uliaf aci uloole, a Uwejats ci uloole. Unk buts, tsi karua ind, nda ruuree uwats uloole;

⁵ Ajug aci naloole, uwak ci uloole, bëmijan ci bëloole,

⁶ Nasien-batsi ci naloole, Asin bañaan bëlieng, nul ruets un ngëko bëlieng, nuu leemp tsi ngëko bëlieng, a na ci tsi ngëko bëlieng.

⁷ Maa kara ñaan nan ci tsi nja awëlaa bëtseend tsi kaniibi utseend Këristu.

⁸ Wul ka wun Bëpica n ja: “Bi na paya bi ruets, a na tsëpand bamoba, na wël ngëtseend pa bañaan-bajin.”

⁹ A inkri we ci wun nul apaya, ucits ba nul buts awela te tsëko di tsan pe tsi pëci ri utsia?

¹⁰ Na wela unk, ci-un naloole nan paya unk koo jíntsani batsi ban ci bi ba këci, pa nul pëcuman ngëko bëlieng.

¹¹ A nul wël un balon ngëtseend pëci bapostolu, bacints bayëlia, bacints baleents Upetsan-uwar, bacints ka ci bayafan bu ka ciind bajukan;

¹² pa pëyecis bayëman pa përo uleemp, pa bukul pënatsan uliaf Këristu,

¹³ te nja ka ruka ci bëlieng tsi kambof uwak, ni tsi pëme Abuk Nasien-batsi, tsi bëci niints nan bandi këjëŋal ni pëliing ni Këristu tsi bëciul ban band bi.

¹⁴ Unk ngë katse ka ci upäts uluunt biki ngëmaroŋ kë bats-batsan biki, biki ufuts bëjukan bucumal kë tsëpand biki; bu kë niam tsi kafal bañaan-bajin.

¹⁵ Uwal wi nja kë leents wi ucär tsi bëŋal, nja kë wiaka tsi ngëko bëlieng, tsi nul Këristu nan ci been;

¹⁶ aci-undoul ka un uliaf ci upëban a u mobular uwar tsi ngësúk bëlieng, ngi u ka ngi. Unk, uwal wi kara ubuuru kë leemp wi bi u ka bi përo, uliaf bëlieng kë wiaka uu watsësar tsi bëŋal.

Ubiira uwalu tsi Këristu

¹⁷ Wul ka wun, ko wi, wi n du n ja wun, a ndu n leents wul tsi Ajug: Ind tsë kaka yandaar bi ban cits bukunk Bajudeu kë yandaar bunk tsi ngëwejats bukul bërier bukul ngan kaats ngi bëkat.

¹⁸ Bëlipal bukul arëmënts, bëbi bofats tsi ubiira Nasien-batsi undo kameets-ko kan tsu ki bukul kajëŋ-ngëwaas.

¹⁹ Ngëwejats bukul aruka tël, a ba baar tsi karo ngëko ngëtsopal ni karí përo ngëwutsëtsuel ngan ci ngi ba këci.

²⁰ Maa ind, cits unk di nda juk run Këristu.

²¹ Nda te ulekaul tsi ucär, a nda jukana tsi nul ucär un ci wi tsi Yeesu;

²² bi nda ka bi pëwëtan ñaan najon tsi bëci ind ban par bi, bi kan cok bi tsi karí-ko manfalar.

²³ Nda ka pëkak bëci buwalu tsi Uwejats, tsi bëtsaag ind

²⁴ ni ind pëwaa ñaan nawalu na leempee tsi uŋal Nasien-batsi tsi bëmabal ni uyëman, ngan pënë-ni ngi tsi ucär.

²⁵ Wul ka wun, nda wëtani butsup, ndë ja nan ci nuu ñakanaan acintsul ko un ci wi ucär; par n ja bëlieng ngë ci incimëntsu uliaf uloole.

²⁶ Uci nda riabats, ind tsë juban; te ind tsë wamand uriab a unu ka yër.

²⁷ Ind tsë wël Ujabël tsëko.

²⁸ Nandoi ka kiej, nul tsë kiej kak; maa na leempëni iñanul bërierul ko u wara wi, pa pëka ko wi nuu wël wi nan fieri.

²⁹ Përim pa waraatsa pi tsë pëni di itum ind, maa përim pa wara pi baŋ pa pëleempëna tsi pa fiera tsi, pë wël bëtseend pa ban te biki pul.

³⁰ Ind tsë tsu Uwejats-ujënts Nasien-batsi u juatsan, wul wi nda markaaraana wi pa unu kaluk-pëbuer.

³¹ Kajuats-uwaas, ni uriab, ni ukulëñ, ni ma njanësar, ni mankarar ni kawaraatsa, ngan bëlieng nga pënanaan tsi ind.

³² Nda ciin ban wara biki tsi nda ci tsi, nda yëkëlari ipës, nan ci na jampësaan acintsul, bi Nasien-batsi jampësa ind bi tsi Këristu.