EFEESU 2 - KARÚK-PËRIM KAWALU Nouveau Testament

Pëpën tsi pëcäts pa ubiira

¹ A ind bando biki cats tsi undo ngëlaci ind ni tsi ngëjuban,

² bi nda ro bi ci uwal ujon, bi nda ro bi ka fets bëci umundu wi; bi nda ro bi ka fets pëyëlan nasien nan ci tsi ufuts; wul uwejats umënts wun ka leemp wun inkri tsi babuk karoots ko un jaka wi.

³ Nja bëlieng buts ngë ro ci pi bukul, nja kë yandaar tsi ngëko ngi uyamats nja kë rí ngi, nja kë ro ko wi uyamats ŋal wi, ni ko wi ngëwejats nja ŋal wi; a tsi bëci bañaan-bajin, ngë ro ci upäts uriab Nasien-batsi, pi ban duka bukunk.

⁴ Maa Nasien-batsi, nul nan cumi ni kayëk-ipës, tsi undo bëŋalul bëwiak bi na ŋal nja bi,

⁵ n ja ban do biki wama cäts tsi karo ngëwutsëtsuel, na awël nja ubiira ni Këristu, — a tsi bëtseend ka bun nda buer.

⁶ Nasien-batsi natsani nja un di pëcäts ni Këristu, a na tsu nja ngë tsoar di ruets ni nul Këristu Yeesu,

⁷ pa tsi ngëwal ngi kan bi ngi, në piban përëmbul pan pelëk pi tsi bëtseendul, bi na ci bi uwar pa n ja tsi Këristu Yeesu.

⁸ Par tsi bëtseend ka bun nda buer, tsi undo uwak ind. Umënts wan biinatsi tsi ind, aci ko wi Nasien-batsi wël wi;

⁹ cits un biini wi tsi ngëro, pa ñaan përits rëmbandar.

¹⁰ Par ngë ci ko wi Nasien-batsi leemp wi. Aleemp nja tsi Yeesu Këristu pa ngëwar ngi na ro ngi yecis ba, pa n ja pëci tsi përo ngul.

Pëci baloole tsi Këristu

¹¹ Wul ka wun, nda lesan ki uwal ujon, ind ban cits biki Bajudeu tsi uyamats, a ban tsuar bukunk pëci biki iñan bañaan-bajin welan biki kambac tsi uyamats, kë ru ind koo ja bawelaatsa-kambac.

¹² A tsi uwal umënts wun, nda ro ci ban kaats biki Këristu, ban bofanaatsa biki tsi bëjúk Israel, a nda bofanaatsa tsi karo-pëloole tsi ko wi Nasien-batsi watsan wi; nda kaats uwats, nin nda kaats Nasien-batsi tsi umundu.

¹³ Maa inkri tsi Këristu Yeesu, ind bando biki lawan, tsi pëñaak Këristu, nda ruka ci bañaan ba wokan biki.

¹⁴ Par nul ci-un pëfac nja nul nan tsui Bajudeu ni ban cits biki Bajudeu ba ci baloole, bi na wat bi pëlënk pan kic pi bukul, un ci wi mañaasëlër,

¹⁵ nul tsi uyamatsul, aba ni ngëtsua ni bërolara ngul, pa tsi batëb bukun, në leemp tsi nul ñaan naloole nawalu, në tsu pëfac.

¹⁶ A di kruus na tsu batëb ban ci bukunk uliaf uloole, a ba teelar ni Nasien-batsi; bi na fiŋ bi mañaasëlër dul.

¹⁷ Abi a na leents Upetsan-uwar pëfac, tsi ind bando biki lawan, ni pëfac tsi bando biki wokan;

¹⁸ par tsi nul, ind ni wund ngë ka bëga bëbaandë-ni di Asin tsi Uwejats uloole.

¹⁹ Unk, nda katse ci batsooŋ nin balaay; maa ind, nda ci ban bof biki ni bayëman, a nda ci bañaan kato Nasien-batsi.

²⁰ Nda leempan tsi ujuundi di bapostolu ni bayëlia leemp ri; a nul Yeesu Këristu bërierul ci-un pëlaak pëtsaak.

²¹ tsi nul, u leempa wi a u mobëlar bëlieng, u ru watsësar pa pëci tsëko-tsëyëman tsan patsana tsi pa Ajug.

²² A tsi nul, ind buts nduu ci tsi pëleempaa nda mobulana pa pëci tsëciini Nasien-batsi tsi Uwejats.