EFEESU 1 - KARÚK-PËRIM KAWALU Nouveau Testament

Kawël-mboos kajuudë-ni

¹ Pol, Napostolu Yeesu Këristu tsi uŋal Nasien-batsi, pa bayëman ban ci biki di Efeesu, ba mob biki tsi Yeesu Këristu.

² Nasien-batsi Asini nja ni Yeesu Këristu Ajug, ba wëlan ind bëtseend ni pëfac.

Ngëwar ngan ci ngi tsi Yeesu Këristu

³ Nasien-batsi na bëndanaan, nul Asin Yeesu Këristu Ajug inja; na n jaari njai ngëwar ni ngëkoraar ngëko ngëwar bëlieng tsi Këristu di tsëko tsan ci tsi ba këci di batsi.

⁴ Umundu aruka ka juund, a na rat nja ba tsi nul, pa n ja pëci ba yëman biki, ni pëci ban dits biki ka jaara ngëwutsëtsuel tsi nul; a tsi bëŋal,

⁵ na car ayecis pëtsu nja pëci babukul tsi Yeesu Këristu, tsi bëŋal kawara-uwaasul;

⁶ pa n ja pëbundan përëmb bëtseendul bi na wël nja bi bëlukats tsi Abukul na ŋalee.

⁷ tsi nul, tsi ngë lukaraana pëbuer, tsi pëñaakul, pa pëjampësaa ngëjuban; tsi undo përëmb bëtseendul,

⁸ bi Nasien-batsi cuman bi tsi nja ni kameko kan ci ki ba këci ni bëlipal.

⁹ Nul tsu nja un pëme un doots wi mea, wi bëŋalul, bi u ci bi tsi ko uwar wi na ŋal wi u ci, a na tsu wul tsi Këristu;

¹⁰ pa uband uwal, Nasien-batsi ka tsu ngëko bëlieng, ngan ci ngi di batsi, ni ngan ci ngi tsi utsia, në jukëlën ngul tsi nawiak naloole, un ci wi Këristu.

¹¹ A tsi nul buts tsi ngë ratënaa tsun, ngë ci ban yecisa biki tsi utsaag na leempi ngëko bëlieng tsi buwejatsul tsi uŋalul;

¹² pa n ja pëci ubëndan përëmbul, n ja ban ci biki bacak ban tsu biki uwatsi nja tsi Këristu.

¹³ tsi nul, ind buts, uwal wi nda te wi përim ucär, un ci wi Upetsan-uwar pëbuer ind, a nda wak tsi Këristu, nda tsua umarëka Uwejats-ujënts u watsana wi,

¹⁴ wul ci wun umobanaani bërukanda nja te ulukaa pëbuer biki Nasien-batsi ka biki pa ubëndan Përëmbul.

Bëñaan bi Pol ñaan bi

¹⁵ Wul ka wun, nji buts, uwal wi n te wi bañaan kë ñakanaan uleka uwak ind tsi Yeesu Ajug, ni bëŋal bi nda ka bi pa bayëmanul bëlieng,

¹⁶ in wëtaants pëja Nasien-batsi baran pa ind, ni puu les ind tsi bëñaan nji.

¹⁷ Nasien-batsi Yeesu Këristu Ajug nja nul Asin, nan dëmbanee, na wëlan ind uwejats kameko ni upiban, u tsu ind ndë meul.

¹⁸ Nul na waantsan ind ngëwaas pa ind pëme uwats un ci wi tsi karuaul, ni bëka Përëmbul bi bayëmanul kë rukanda bi.

¹⁹ Ndë yëkëran buts upelëkar pëyëlanul tsi wund ba uwak biki, bi uyëlan pëyëlanul kë leemp bi tsi wund.

²⁰ Pëyëlan pëmënts pi, pi Nasien-batsi leempëna pun tsi Këristu, na natsaniul di bacäts, a na tsuul na tsoar di kariirul di batsi;

²¹ na ruets pësien pan ci pi-ba këci, ni peyëlan un ciwi-ba këci, ni pëyëlan pan ci pa ba këci, ni pëwiak pan ci pi-ba këci, ni katim kan yëlan ki ba pëtsua; cits tsi umundu wi rin, maa buts tsi umundu wi kan bi wi.

²² A na tsu ngëko bëlieng tsi utsia iyotsul, na tsuul pëci Nawiak tsi ngëko bëlieng tsi Ngëriisia,

²³ ngul nga ci ngi uliaful; nul nan cumi ni kan cumani ko un ciwi-ba këci tsi ngëko bëlieng.