BAYEBËREU 9 - KARÚK-PËRIM KAWALU Nouveau Testament

Bërafal karo-pëloole kajon

¹ Unk, karo-pëloole kacak aro ka ngan tsuura ngi ubëndan; a ka ro kaand tsëko-tsëyëman, tsan ci tsi tsëko umundu wi.

² Par, unkundan aro leempaa. Di pëfër pëcak, tsëpafëni-ulamp aro ci rul, ni untabul, ni këpom bëtseend. Pul ka jaka, tsëko-tsëyëman.

³ Tsi pëpar uridu ucints, a u ci pëfër pi ka n jaka pi, Tsëko tsan pe tsi pëci tsëyëman.

⁴ Bëgij butabanaani ucuraay, ba leempana bi uwëru, aci rul, ni unkes karo-pëloole, un jëk wi uwëru tsi ngëjara bëlieng. Pëtsukar pan tsij pi manaa aci di bametsu unkes, pul ni pëndog Aaron pa n jaban pi, ni itagëba karo-pëloole.

⁵ Ngëkerubin, ngul ngi kan piban ngi përëmb Nasien-batsi, aruetsi unkes. Ni ulimënts ngul a nga kund tsëjampësaani-ngëjuban. Maa ngë ri ka ñakanaan ngëmënts ngan pa pëpaci ngul inkri.

⁶ Bi ngëmënts ngun yecisa bunk, uja tsi uwal un ci wi, bajakan kë niaj pëfër pëcak pun pa pëleemp uleemp bukul.

⁷ Maa pëfër pëcints pun, nan pei pëci nawiak-bajakan, nul baŋ ka niaj undul, uyaas uloole tsi uwaanu; a te cits pëjaa di ka ñaakandar beenul, ka ñaakandar beenul në ñaakandar ngëjuban ngi bañaando ngi tsi kameets.

⁸ Unk, Uwejats ujënts apiban ne, bëga pëniaj Tsëko tsan pe tsunk pëci tsëyëman netse ro waantsaa, par unkundan ucak wun awama ro nats.

⁹ Ko umënts wun aci katib-përim pa uwal untsari; apiban ne, ngëtseend ni ijakan arolaa, maa tsi ume-kabats yëlanats pëtsu nabëndan në ci nan bai pëci nawar.

¹⁰ Ngëmënts ngun aci këci ngëtsua bañaan-bajin tsi uleka bariala, ni mdaan, ni ngëndimaan ngëcumal ngi mñawësar; unk te tsi uwal pëwitsës ngëko ngë ci ngëwalu.

Karo-pëloole kawalu tsi pëñaak Këristu

¹¹ Uwal wi Këristu bi wi pi nan pei pëci nawiak-bajakan tsi uleka ngëko ngëwar ngan ka ngi pëbaandi, apar-na unkundan un pe wi pëci uwiak, a u peand pëba pëci uwar, a te kañan ñaan-najin leempats wul; un ci wi, wul cits wi umundu u leempa wink.

¹² Nul, niajënats pëñaak ngëruekas, ni pi ngëbay, maa pëñaakul bërierul pi na niajëna pun uyaas uloole baŋ di Tsëko tsan pe tsunk pëci tsëyëman, a na tsiji nja pëfacana pa sandëndën.

¹³ Par, uci pëñaak ngëruekas, ni pi ngëyët-ngëkas, ni ufab upatar guraa wi ban tsop biki, a ngëmënts ngan kë jëntsan bukul ngëliaf,

¹⁴ andes pëñaak Këristu, tsi Uwejats un dits wi ka ba, nul bërierul na wëli Nasien-batsi ubiiraul, a u ci bëjakan ban kaats bi ujink. Pul ka jëntsan pun ume-kabats nja pa pëpënan tsi wul ngëko ngan dolaa ngi, ngi kan tsëpand ngi ñaan pëcäts. Unk, nja ka yëlan puu leempar Nasien-batsi nayësal.

¹⁵ Wul ka wun Këristu ci natsu-manteelar tsi karo-pëloole kawalu, bi na cäts bunk, pa pëluk pëbuer bañaan tsi ngëjuban ngandolaa ngi tsi uwal karo-pëloole kacak, pa banduee biki ka yank bërukanda ba watsana bi, bul ban dits bi ka ba.

¹⁶ Par tsi karuk-përim ci tsi, afiera u roon u pibanaa ne, kanduk-përim a cäts.

¹⁷ Par karuk-përim ka kaana pëyëlan uwal wi ñaan cats wi. Kul kaats nin pëyëlan, uwal wi kanduk-përim wama wi ci nayësal.

¹⁸ Wul ka wun, ŋal karo-pëloole kacak kun ka rolaa, a u ci ni pëñaak.

¹⁹ Moises aleents bañaan bëlieng utsua un ci wi-ba këci, bi ulua ja bi. A na jej pëñaak ngëbay, [ni pi ngëruekas,] a na jejand mlik, ni imuets ijankal, ni ina bëko bi ka n jaka bunk isoopu, a na lícar ulibëru bërier wul, ni bañaan bëlieng.

²⁰ A nuu ja: “Ko wi, aci pëñaak karo-pëloole ki Nasien-batsi tsu ind ki.”

²¹ Unk buts, a na lícar pëñaak tsi unkundan, ni tsi iŋi bëlieng i ka leempëna yi uleemp uyëman.

²² Bi ulua-Moises tsu bi, anats pi, ko un ci wi-ba këci, pëñaak ka jëntsanaan pun wul; a uci pëñaak tulaatsa, mjampësa cits.

²³ Bi u ci bank, aro fiera u roon, ijakan imënts yun ka jëntsan ngënaamanaani ngëko ngan ci ngi di batsi; maa ngëko batsi bërier ngul, ijakan in pe yi imënts yun pëwara ka jëntsan yun ngul.

²⁴ Par, Këristu niajats tsëko-tsëyëman tsan ci tsi uleemp kañan ñaan-najin, tsan ci tsi këci-unaamanaani tsëcar tsun. Maa aci koon batsi bi na niaj bun, pa në natsar nja inkri tsi bërun Nasien-batsi.

²⁵ Te cits pëjaa aniaj batsi pa pëjakan ubiiraul ngëyaas ngëcumal, bi nan pei pëci nawiak-bajaka n ja bunk kara uwaanu në niaj Tsëko tsan pe tsunk pëci tsëyëman, ni pëñaak pan cits pi piicul.

²⁶ Par, u ro ci ank, Këristu ka ro ka na roon në noor aa ngëyaas ngëcumal, ki umundu leempa ki. Maa inkri, tsi uba ngëwal, apibandari uyaas uloole baŋ, unk ni bëjakan ubiiraul në pënan ujuban.

²⁷ A bi ñaan-najin tsuura bi nul pëcäts uyaas uloole rin, a uu ba u ci kawata-pëleents,

²⁸ unk buts Këristu ajakan ubiiraul uyaas uloole baŋ, pëpënan ngëjuban bacumal. Nul, ka pibandari uyaas ucints tsi ban ci biki tsi pëlipul undo pëbuer, te di ka ci-undo ujuban.