BAYEBËREU 8 - KARÚK-PËRIM KAWALU Nouveau Testament

Tsëko-tsëyëman tsëwalu, ni karo-pëloole kawalu

¹ Inkri, un pe wi tsi nganjaka ngi, ci wun wi, bi ngë ka bink nan pei pëci nawiak-bajakan na naam ink, nan tsoari di batsi tsi kariir pëtsoari Kanpe-përëmbana, pi pësien;

² a na ci tsi uleemp, wi tsëko-tsëyëman, wi unkundan ucär wi Ajug natsan wi; cits ñaan-najin natsan un wul.

³ Nan pei pëci nawiak-bajakan nan ci ba këci, atsua puu wël ngëtseend ni ijakan. Unk, namëntsi buts, aka pëka ko wi nu wël wi.

⁴ A uci na ro ci tsi umundu wi, bitse ka ro ci ŋal najakan, par bawël ngëtseend pi bi ulua-Moises tsu bi, bë ci ba.

⁵ Bë ci tsi pëleempar unaamanaani, wul un ciind wi ulimënts ngëko batsi. Ko umënts wi ka wun Moises car aleentsa, bi na ruka bunk ayecis pëleemp unkundan; par Nasien-batsi ajaul: “Teenan-e! Leempan bëlieng, naaman ni bënaam wi m pibana wunk di untunda.”

⁶ Maa inkri, uleemp wi Yeesu wëlaa wi ape wiic bukul, pi bi karo-pëloole ki na ci ki natsu-manteelar pe bi kajon. A nga watsana ngi, ngan pe ngi pëwara, tsijëna ngun kul.

⁷ Par, uci karo-pëloole kacak kamënts kundoots ka ulaci, katëbantsan bitse ka ro tsasaa.

⁸ Maa Nasien-batsi aleentsar babuk Israel, aja: “Ajug aja: ‘Teenan-e! Ngënu ka baandi ngink, ka ci uwal wi ndu ndo wi karo-pëloole kawalu ni kato Israel, ni kato Juda buts.

⁹ Di ka ci pi karo-pëloole ki ndo ki ni basin bukul, tsi unu wi n mob wunk bukul tsi kañan, pëpënan bukul di Ejipët pëtsëp. Par bu mobats tsi karo-pëloole nji, nji buts a n wëtan bukul.’ Ank di Ajug ja run.

¹⁰ Ajug aja: ‘Ki ci kun karo-pëloole ki ndu ndo ki ni kato Israel, upar uwal umënts, mán tsu ngëtsua nji tsi ngëwejats bukul, ka pican ngul di ngëwaas bukul. Mán ci Nasien-batsi bukul, bu ka ci bañaan nji.

¹¹ Ñaan katse ka jukan koon këjukan acintsul, oo nan tsaari ni nul, na jaul: Mean Ajug! Par bukul bëlieng bu ka mein, pëkur tsi nan pei pëci ñaan naties, te nan pei pëci ñaan nawiak.

¹² Par, mán yëk ipës tsi uleka ngëko bukul ngi kamabats, a in katse ka les koon këles ngëjuban bukul.’”

¹³ Bi Nasien-batsi ja bink karo-pëloole kamënts ki, kawalu, atsu kacak kun a ka ci kajon. A ko unduka wi jon, a u tsaf, awokan pëniaman.