BAYEBËREU 7 - KARÚK-PËRIM KAWALU Nouveau Testament

Melkisedek aci-unaamanaani Këristu Yeesu

¹ Nul Melkisedek, aro ci nasien Salem, a na ciind najakan Nasien-batsi, Kanpe pëci di ruets. Uwal wi Abraam kë witsee wi, bi na kuk bi basien ukam, Melkisedek tsëp ee jëk ni nul a na beena jarul ngëwar.

² Abraam wëlul kafa kaloole tsi ifa untaaja tsi ngëko bëlieng. Ucak, ko wi katimul pac wi, aci nasien bëmabal, a ko wi nasien Salem pac wi, aci nasien pëfac.

³ Kaats asin, kaats anin, kaats pëbuka, nin ujuundi ngënu, nin ubaani ubiira; maa aci pi Abuk Nasien-batsi, nul aci najakan, tsi ngëwal bëlieng.

⁴ Nda teenan-e bi namënts un ci bunk ñaan nawiak! Ŋal Abraam, nan ci pëjabi pëbuka, awëlul kaloole tsi ifa untaaja yi ngëko ngan pe ngi pëci ngëwar, tsi ngi na kai ngi di ukam.

⁵ Ban bof biki tsi pëci babuk Lewi, a ba ciind bajakan, ulua-Moises atsu bukul puu yank tsi bañaan kafa kaloole tsi ifa untaaja; un ci wi, pëyank kul tsi ban tsaar biki ni bukul, ban pënë-ni biki aatsum tsi kajër Abraam.

⁶ Maa Melkisedek, nul nan bofatsi tsi pëbuka Lewi, ayank tsi Abraam kafa kaloole tsi ifa untaaja, a na ja ngëwar pa nan kaana unk nga watsana ngi.

⁷ Mantotëlër cits tsi përim pi: “Nan ci nawiak ka ja un ngëwar pa nan ci napäts.”

⁸ A tsi, biki ka yank biki kaloole tsi ifa untaaja, bë ci bañaan-bajin, bukul biki kan cats biki. Maa ndun, aci Melkisedek, nul na n jakee aci tsi puu ci nayësal, yank un kaloole tsi ifa untaaja.

⁹ Unk ko wi ayëlan pëjaka: Ŋal Lewi, nul na njai na roon në yank kaloole tsi ifa untaaja, awël tsi Abraam kaloole tsi ifa untaaja.

¹⁰ Par, uwal wi Melkisedek tsëp wunk ee jëk ni Abraam, Lewi wama ro ci di bëlank asinul Abraam.

¹¹ Babuk Israel ba n jabuni biki pëbuka Lewi, bu wëla Ulua tsi uleka bajakan. A uci uleemp bajakan ro yëlan pëbandan ñaan pëba pëci nawar, we ka wun a u wama fiera nalon najakan pëtsuaa, tsi bënekëlar ni Melkisedek, te di ka rataa tsi bënekëlar ni Aaron?

¹² Par, aja uleemp bajakan butanaa, din ulua ka fiera buts pëbutanaa.

¹³ Na n jakee ngëmënts ngi, abofëna tsi pëbuka pëlon; kaats ñaan nan bofi tsi pul a na leemp tsi bëgij.

¹⁴ Par, ko wi aci-un jënts wi, Ajug nja apënë-ni tsi pëbuka Juda; te Moises jaats ko tsi uleka pul, uwal wi na ñakan wi tsi uleka bajakan.

Këristu aci Najakan pa sandëndën

¹⁵ A u kaka pe pëjënts, uci najakan nalon tsi bënekëlar ni Melkisedek tsua,

¹⁶ a tsuunaatsa pëci najakan tsi ulua ñaan-najin, maa tsi pëyëlan ubiira un kaats wi ubaani.

¹⁷ Par ko wi ajaka tsi ulekaul: “Wi m ci najakan pa sandëndën, tsi bënekëlar ni Melkisedek.”

¹⁸ Unk utsua undo wi ci, apënana undo bërafal wul, ni kakaats-bëkat wul

¹⁹ — par ulua-Moises kaats ko wi u tsu wi, a ko umënts ba pëci uwar — maa uwats un pe wi pëwara, aniajanee, wi ngë yanaan wi pëwok Nasien-batsi.

²⁰ Te, ubaaja abaajaa! Par, ba n jabuni biki tsi pëbuka Lewi a ba ci bajakan, bu tsuunaatsa bajakan tsi ubaaja;

²¹ maa namëntsi atsuuna najakan tsi ubaaja, bi Nasien-batsi jaul bi: “Ajug abaaja, te di ka garëndan: ‘Wi m ci najakan pa sandëndën.’”

²² Undo ubaaja umënts wun, ka wun Yeesu ruka ci umobanaani karo-pëloole kan pe ki pëwara.

²³ Te, bajakan bamënts bukun bë cum, par pëcäts alaaŋ bukul pëwam tsi uleemp;

²⁴ maa Yeesu, undo aci pa sandëndën, uleempul wi bëjakan aci-un dits wi ka but tsi nalon.

²⁵ Wul ka wun, biki kan biini tsi Yeesu abaandi tsi Nasien-batsi, nul Yeesu ayëlan pëbueran bukul, te ko di ka ruka; par nul aci nayësal tsi ngëwal bëlieng, pa pëñaandar bukul.

²⁶ Nan pei pëci nawiak-bajakan pi namëntsi, ni ngë fier un, najëntsal, nan kaatsi ulaci, nan kaatsi ujink, nan patsilari ni bajuban, nan diangai aruetsi batsi ban ci bi ba këci.

²⁷ Cits pi ban pe bukunk pëci bawiak-bajakan, banduka bukunk; nul fierats përoor ngëjubanul bërun ijakan, kara unu, a uu ba në roor bañaan. Umënts wun, aro wul uyaas uloole baŋ, uwal wi na jakan wunk beenul bërierul.

²⁸ Par, ulua-Moises aja u roon u tsu bañaan-bajin bu ka ci ban pe biki pëci bawiak-bajakan, bukul ban ka biki bërafal; maa përim ubaaja Nasien-batsi, wul u nek wi ulua, atsu Abuk, nul nan bai pëci nawar pa sandëndën.