BAYEBËREU 6 - KARÚK-PËRIM KAWALU Nouveau Testament

¹ Wul ka wun, nda ju ngë wëtan bëjukan ngëko ngëcäk tsi uleka Këristu, nja ka pënar ngëko këjëŋal. Nja tsë tsu kak ucak-cakan, un ci wi, kayaar-ibats tsi uleka ngi ñaando ngi, ngi kan tsëpandul ngi pëcäts, ni un ci wi uwak tsi Nasien-batsi,

² ni un ci wi bëjukan tsi uleka bëmijana, ni kapaf iñan, ni bacäts pënatsee, ni pëlacana pa sandëndën.

³ Wul ci wun ko wi nja kë ro wi, uci Nasien-batsi niiran.

⁴ Par uleka ban facana bukunk ba, yëlaatsa bëro, ban juaban biki utseend un pëni wi batsi, ban bofana biki tsi Uwejats-ujënts,

⁵ ban juaban biki ulílar përim Nasien-batsi, ni ngëko pëyëlan ngan ci ngi ngi umundu wi kan bi wi,

⁶ uci ba yër, yëlaatsa bëro, pëkakan bukul ba ci bawalu kak, pa kayaar-ibats. Par bukul bërier bukul, bë ci kak tsi përieŋ Abuk Nasien-batsi, di kruus, a bu kë kawaranul tsi bërun bañaan.

⁷ Par utsia wi kan daan wi mlik usubal ma nja mi man doon muu yëri tsi wul, a uu mayani mbuk man kaar mi ban ka biki u jaaraa bëkat, wul ka yank kafa tsi bëbeenir Nasien-batsi.

⁸ Maa uci u mayani iyu ni uŋoñu, kaats bëkat, aruka ci wul pëjaa ujuatsal, utuamanaan pëtëraa.

⁹ Maa ind ba ŋalaa biki, ŋal bi wund ñakan bi unk, wund afiaar koon ngëko ngan pe ngi pëwara tsi uleka ind, nga yandaar ngi ni pëbuer.

¹⁰ Par, Nasien-batsi cits namabats; yëlanats pëfin uleemp ind, ni bëŋal bi nda piban bi tsi uleka katimul, bi nda leempar bunk bayëman, a ind ka leempar bikink bukul.

¹¹ Wund aŋal u roon, kara ñaan tsi ind, nuu piban kabaar-ibats kamënts kun te tsi utuami, pa pëtsu uwats ind u baar pëci ko un ci wi.

¹² Wund ŋalats ind përuka ci batsuunk, maa ind pëteenëna biki kan par-na biki uwak ni umiira bu ka yank nga watsana ngi.

Nasien-batsi aja na roon në ro ko wi na watsan wi

¹³ Uwal wi Nasien-batsi watsan wi Abraam, bi u kaats bunk nan pei pëci nawiak, ni nu baajee, a na baaja beenul,

¹⁴ aja: “Aci ucär: tsi pë ja ngëwar, má n jaru ngëwar; a tsi pëwatsës, mán watsësu kabuk mak.”

¹⁵ Unk a nul Abraam kë lip a nuu miira, a nee yank u watsana wi.

¹⁶ Bañaa n ja ba roon bu ka baaja nan pei bukul, din ubaaja ka mob tsi ko un jaka wi, u ba ni mantotëlër.

¹⁷ Unk, Nasien-batsi aŋal pëpiban barukanda uwatsan, ne, ko wi na tsaag wi di ka but bëlon bëci. Wul ka wun, ni ubaaja a na mob tsi ko wan.

¹⁸ Unk, tsi ngëko ngëtëb ngan yëlanats ngi pëbutanaa, ngan yëlanats ngi pëjaa Nasien-batsi atsup tsi ngul, nja ka liinc-liincana ngëwaas mak, n ja ban túki biki pii mob pëliincan uwats un tsua wunk tsi bërun.

¹⁹ Uwats umënts wun, ngë tsij wul pi kasëtsi ubiira ka wakan ki, a ka liincand. Wul, ka niaj u par uridu,

²⁰ tsi Yeesu yër nja tsunk bërun ee niajar nja. Nul ruka un ci nan pei pëci nawiak-bajakan, pa sandëndën, tsi bënekëlar ni Melkisedek.