BAYEBËREU 4 - KARÚK-PËRIM KAWALU Nouveau Testament

¹ Bi u ci bank, bi pëwatsana pëniaj tsi pënaakësaul wama bink aci, nda ju ngë lënkar nalon tsi ind pii wejats na ja afaatsani.

² Par nja buts, ngë ci ba leentsa biki upetsan-uwar pi bamënts bukun; maa përim pi ba cikëndën pi kaats bëkat tsi ngëbiira bukul, par ban cikëndën biki pul bu bofanats pul ni uwak.

³ Nja ba uwak biki, nja ka niaj di pënaakësa, bi Nasien-batsi ja bunk: “Unk, man baaja tsi uriab nji, a n ja: ‘Bë ri ka niaj koon këniaj tsi pënaakësa nji.’” Te uleempul aci aatsum um ba wi, ki umundu leempaa ki.

⁴ Par, tsi tsëlon tsëko di Bëpican, iink di na ja run tsi uleka unu upaajantsan ni ulon: “A tsi unu upaajantsan ni ulon, Nasien-batsi naakësa ngi na ro ngi bëlieng.”

⁵ A tsi tsëmënts tsun, a na ja kak: “Bu ri ka niaj koon këniaj tsi pënaakësa nji.”

⁶ Unk, bi pëniaj tsi pënaakësa pëmënts pun wama bunk arukara balon, ate bacak ban do bukunk leentsa upetsan-uwar niajats tsi pul, undo karika-ro ko un jaka wi,

⁷ Nasien-batsi atsu kak unu, a uu jaka, Ntsari, uwal wi u bi par ajon, a na ja ni mtum Dawid, bi u jakaa bi ba: “Ntsari, uci nda te përimul, ind tsë tamban ngëwaas ind.”

⁸ Par uci Josue ro naakësan bukul, Nasien-batsi, tsi bërun, bitse ka ro ñakan tsi uleka ulon unu.

⁹ Bi u ci bank, pënaakësa pan ci pi pi unu upaajantsan ni ulon, arukara bañaan Nasien-batsi.

¹⁰ Par, na niaji tsi pënaakësa Nasien-batsi, anaakësa ngi na ro ngi, bi Nasien-batsi naakësa bunk ngiicul.

¹¹ Bi u ci bank, nda ju ngë tambandër pa pëniaj tsi pënaakësa pëmënts pun, pa ñaan tsë yër, nul tsë fets bukul tsi karika-ro ko un jaka wi.

¹² Par, përim Nasien-batsi aka ubiira a pa kaand pëyëlan; pul are ape ulaac un de wi ngëjara ngëtëb. Aja pa roon pë niaj te pë kicës uwaas ni uwejats, ngësúk uliaf ni pëluŋ; a pa yëlan pëyëkëran ngi uwaas ciina ngi, ni ngi u wejats ngi.

¹³ Tsi nga leempa ngi bëlieng, kaats ko un beka wi Nasien-batsi; ngëko bëlieng akundësa a nga pibana tsi këkësul, a nul ni ngë ka un pëleents ngi ngë ciina ngi.

Yeesu ci-un nan pei pëci nawiak-bajakan

¹⁴ A bi ngë ka bink nan pei pëci nawiak-bajakan, nul niints nawiak, nan tsëpi a na par-na batsi ban ci bi-ba këci, nul Yeesu, Abuk Nasien-batsi, nda ju ngë mob uwak wi ngë pets wi, ngë liincan.

¹⁵ Par, ngë kaats nan pei pëci nawiak-bajakan na yëlaantsi pëyëkar inja ipës tsi uleka ngi barafal inja; ateen-teenana tsi ngëko bëlieng pinja maa kaats ujuban.

¹⁶ Bi u ci bank, nda ju ngë wok pëtsoari-pësien, pi bëtseend, ni bëyeentsal, n ja pëyëkaraa ipës ni pëka bëtseend, nja ka tsënkaa tsi uwal u wara wi.