BAYEBËREU 3 - KARÚK-PËRIM KAWALU Nouveau Testament

Yeesu ape Moises

¹ Batsaar ni nji, bayëman, ind ban bof biki tsi karua batsi, nda teenan tsi Yeesu, nul Napostolu a na ciind Nan pei pëci nawiak-bajakan tsi uleka uwak nja wi ngë pets wi.

² Aci na mobi tsi përim nan tsuuli uleemp, pi Moises ro punk mob tsi kato Nasien-batsi, kul bëlieng.

³ Par nul, awina na tsënkan pëjaa përëmbul ape pi Moises, bi na leempi kato pe bunk kato pëwëla urispiitu.

⁴ Par kara kato aka na leempi kul; maa Nasien-batsi ci-un na leempi ko un ci wi-ba këci.

⁵ Moises amob tsi përim, undo bi na ci bi naleemp di kato Nasien-batsi, kul bëlieng; a u ro ci ko un piban wi ngi kee leentsa ngi.

⁶ Maa Këristu amob tsi përim, undo bi na ci bi Abuk a na tsijëna kato Nasien-batsi. A kato kamënts, n ja ci bukun kul, uci ngë mob aliincan tsi bëyeentsal ni upícëni tsi uwats.

Pënaakësa, pa bañaan Nasien-batsi

⁷ Wul ka wun, bi Uwejats-ujënts ja bi: “Ntsari, uci nda te përimul,

⁸ ind tsë tamban ngëwaas ind, bi u rolaa bi tsi kapok-ko un jaka wi, tsi uwal mteen-teenan di ulaalats,

⁹ uwal wi basin ind teen-teenanin wi, pa pëteenamanin. A tsi ngëwaanu ngëntaaja ngëbaakër, a ba win ngi ndo ngi.”

¹⁰ Wul ka wun n diabatsar uraan umënts wun, a n ja: “Ngëwaas bukul aci tsi puu niam, a bë meets iga nji.”

¹¹ Bi u ci bank, a n baaja tsi uriab nji, a n ja: “Bë ri ka niaj koon këniaj tsi pënaakësa nji.”

¹² Nda katan ibats, ind batsaar ni nji, pa nin nalon tsi ind tsë tsij koon këtsij uwaas ujuatsal, wi karika-wak, u tsuul pëpën tsi Nasien-batsi nayësal.

¹³ Maa kara unu, tsi uwal u yëla wi ba këyëla pëjaa Ntsari, nda liinc-liincandari ngëwaas, pa manfalar ujuban tsë tsu nin nalon tsi ind na liinc been.

¹⁴ Par ngë ruka ci ban bof biki ni Këristu, uci ngë mob ci uwak wë ngë wak wë tsi ujuundi aliincan, te tsi utuami,

¹⁵ bi u jaka bi: “Ntsari, uci nda te përimul, ind tsë tamban ngëwaas ind, bi u rolaa bi tsi kapok-ko un jaka wi.”

¹⁶ Par, bo woom te bukun a ba pok ko un jaka wi? Cits iink biki Moises pënani biki bëlieng di Ejipët-a?

¹⁷ A bo woom biki Nasien-batsi riabatsar bukun aa ngëwaanu ngëntaaja ngëbaakër? Cits iink ban juban biki a muum bukul yër di ulaalats-a?

¹⁸ A bokoom biki Nasien-batsi baaja bukun aja, bu ri ka niaj koon këniaj tsi pënaakësaul? Cits iink ban doots biki ko un jaka wi-a?

¹⁹ Unk, ngë win ba yëlanats pëniaj, undo kawakats.