BAYEBËREU 2 - KARÚK-PËRIM KAWALU Nouveau Testament

Pëkat ibats, pa përits wëtandar

¹ Wul ka wun, ngë ka pëkat ibats mak tsi uleka ngi ngë te ngi, pa ngë rits pën tsi bëga.

² Par, uci bi përim pi ngëwaanju leents punk ka bunk uyëlan, a nan doi ko un pokaa wi, oo nan poki përo ko un jaka wi, lacana,

³ um bi ngë yil bun pëbuer, uci ngë tsuunkarats pëbuer pëwiak mak pëmënts pi? Pëbuer pëmënts pi, Ajug cakës un pëleents pul, a uu ba, a ban te biki pul kaka leents nja pul.

⁴ A Nasien-batsi kë piban pul tsi ngëpibanaani, ni tsi ngëko ngan pikra n ngi, ni tsi ngëko bawitsa ngan ci ngi ba këci, ni tsi ngëtseend Uwejats-ujënts, ngan faa ngi bi na ŋal bi ja.

Yeesu Këristu akaar nja pëbuer

⁵ Par, cits ngëwaanju ngi Nasien-batsi wël ngun pëtsijëna umundu wi kan bi wi, wi ngë ci wink tsi pëñakanaan.

⁶ Par, tsi tsëlon tsëko tsi Bëpican, aka na leentsi aja: “Yën ci-un ñaan-najin a kë lesul? Oo yën ci-un abuk ñaan-najin a kë këmandul?

⁷ M welanul m paran ngëwaanju, ko uties; m wuranul ucape përëmb ni urispiitu [a m tsuul a na tsijëna ngi iñanu leemp ngi.]

⁸ M tsu ngëko bëlieng tsi utsia iyotsul.” Bi Nasien-batsi wëlul bunk pëtsijëna ngëko bëlieng, a ndukats ko, u wëlaatsaul wi pëtsijëna. Tsi inkri, ngë netse win ngëko bëlieng ci tsi kañanul.

⁹ Maa nan welanee apar ngëwaanju ko uties, nul Yeesu, nja ka teenul bikink a na wurana përëmb ni urispiitu, par anoor unoor pëcäts. Unk tsi bëtseend Nasien-batsi a na juaban pëcäts pa ñaan nan ci ba këci.

¹⁰ Nasien-batsi, nul nan kaani ngëko bëlieng, te nul leemp un ngul a na tsiji bacumal, babuk, te tsi përëmb, awara bi na tsu bunk nan kaari bukul pëbuer a na ci na waree aba, tsi undo unoor wi na noor wi.

¹¹ Par ni ka yëmani, ni ba yëmana biki, bë pënë-ni bëlieng tsi naloole. Wul ka wun Yeesu kawaraatsa përu bukul na ja, batsaar ni nul,

¹² bi na ja bunk: “Mán leents batsaar ni nji katimu; mán yau iya ubëndan tsi pëncuaf bëjúk.”

¹³ A na ja kak: “Nji, mán waak ci nul.” A na ja kak: “Nji nuu ni, ni upäts biki Nasien-batsi wëlin biki.”

¹⁴ A bi upäts bof bunk pëñaak ni uliaf, nul buts, unk di na bof run tsi ngëmënts ngun, pa tsi pëcätsul në cok-cokan kantsijëna pëyëlan pëcäts, un ci wi, Ujabël.

¹⁵ Din në facan ban tsija biki tsi pëluek, uwal ngëbiira bukul bëlieng, undo bë lal pëcäts.

¹⁶ Par tsi ucär, cits ngëwaanju ngi na bi ngun pëtsënk, maa aci kajër Abraam ki na bi kun pëtsënk.

¹⁷ Wul ka wun na ka na roon, tsi ko un ci wi-ba këci, në ci pi batsaar ni nul. Unk në ruka ci nan pei pëci nawiak-bajakan na yëki ipës a na moband tsi ngi Nasien-batsi, në tsiji pëjampësaa ngëjuban bañaan-ucaak.

¹⁸ Par, undo nul bërierul apar-na unoor uwal wi na teen-teenana wi, wul ka un na yëlan pëtsënk ban ci biki tsi pëteen-teenana.