BAYEBËREU 13 - KARÚK-PËRIM KAWALU Nouveau Testament

Bi ngë ka bi përo, Nasien-batsi pëlilandër nja

¹ Nda moban tsi pëŋalëlar tsi nda tsaar tsi.

² Ind tsë fin kawelan-batsooŋ; par tsi puu ro unk, a balon welan ngëwaanju, te bu meets.

³ Nda lesan barica, pi nda ricaa ni bukul. Nda lesan ban tsija biki pëtsija pa waraatsa pi, pi ind buts tsi ngëliaf ind nda tsua tsi unoor.

⁴ Bënim, bañaan bëlieng ba rëmbani bul, a bëkaab bënim tsë tsopana ni ujuban. Par baro ngëko katúk-ufuts, ni baro-mjubi, Nasien-batsi ka wat bukul pëleents.

⁵ Kaŋal-uncaam tsë tsijëna ind tsi përo ko; nda liingan tsi ko wi nda ka wi, par Nasien-batsi aja: “In di ka n wëtanu, yaas; In di ka n bëru, yaas.”

⁶ Unk a ngë ka bëyeentsal pëja: “Ajug aci Natsënkin, in di ka n lal ko; we wi ñaan yëlan wun përoin?”

⁷ Nda lesan ban tsijëna ind biki, bukul ba leents ind biki përim Nasien-batsi. Nda niimani-e utuami ngëbiira bukul, din ndë teenëna uwak bukul.

⁸ Yeesu Këristu aci bi na ci bunk, taakal, ntsari, pa sandëndën.

⁹ Ind tsë wët ngëkoraar bëjukan ba meaatsa bi, bul pëpënand ind pëtsëp. Par awara u roon, bëtseend kë wël uwaas uyëlan; cits ngëre ka wël ngun, ngul kaats bëkat pa bamob tsi ngul.

¹⁰ Ngë ka bëgij bi m me bi, biki ka leemp biki di unkundan uyëman kaats puu rialaana tsi bul.

¹¹ Par, nan pei peci nawiak-bajakan aja na roon, në tsëpand pëñaak ngëncaam di Tsëko tsan pe tsi pëci tsëyëman, përo bëjakan bëpënanaani ujuban. Maa uyamats ngëncaam ja u roon u tëraa di utsand ngëcën.

¹² A wul ka wun Yeesu cats di utsand pëlëman përaasa, a ni pëñaakul bërierul në tsu bañaan bu ka ci ba yëman biki.

¹³ Bi u ci bank, nda ju ngë pën ngë tsëp di nul di utsand ngëcën, nja ka bofa tsi mkawëranaul.

¹⁴ Par tsi umundu wi, ngë kaats përaasa pnja kë ciina pi; maa ngë ci tsi pëtsas përaasa pi kan baandi pi.

¹⁵ Unk, tsi Yeesu, nda ju ngë mob tsi pëwël Nasien-batsi bëjakan ban ci bi ubëndan, un ci wi, ko wi itum kë pets wi tsi uleka katimul.

¹⁶ Ind tsë fin karo-uwar, ni mantsënkëlar; par ijakan pi imënts yun, Nasien-batsi aja na roon në lílandër yul.

¹⁷ Nda roan ko wi ban tsijëna ind biki kë ja wi, ndë niiran wul; bë ci tsi pëwaay ngëwaas ind, par bu ka pëleents bi ba ro bi ja. Nda roan ko wi bu kë ja wi, bukul puu leemp uleemp bukul ni ulílan, u rits ci ni ngëwaas ngan de ngi. Par ucits ank ba, di ka wara ind.

¹⁸ Nda ñaandëri wund, par wund afiaar koon ume-kabats wund jënts, a uŋal wund ci wund puu ro uwar tsi ngëko bëlieng.

¹⁹ Mandu n pe këpe pëbuara ind, pa ind përo unk, nji pëkakana ind, tsi ko un pe wi pëcar.

ka ja ngëwar, irim ituamë-ni uletar

²⁰ Nasien-batsi kankaana pëfac, nul nan katii nayafan ngënkaanel nawiak di bacäts, un ci wi Ajug nja Yeesu, undo pëñaak karo-pëloole kan dits ki ka ba.

²¹ Na yecis ind tsi ko u wara wi-ba këwara, ndë yëlan përo uŋalul. Nuu ro tsi ngëbiira nja ko wi nuu lílandër wi. Yeesu Këristu ka ro un ko wan; përëmb pa ciin pa nul, pa sandëndën. Ameen!

²² Batsaar ni nji, man buara ind pa nda roon ndë niiran përim pan ci pink katseend-ibats; te man picandëri ind a n runkëtën kërunkëtën.

²³ Nda mean, nan tsaari ni nja nul Timoteu, apënanee di ukalabus. Uci na car abaandi, ka bi ni nul pëwin ind.

²⁴ Nda leeni ban tsijëna ind biki, bukul bëlieng, ni bayëman bëlieng. Biki Itaalia bë leeni ind.

²⁵ Bëtseend ba ciin ni ind bëlieng. Ameen!