BAYEBËREU 11 - KARÚK-PËRIM KAWALU Nouveau Testament

Ngandoona ngi ni uwak

¹ Uwak, aci umobanaani nga fiaara ngi, upibanaani ngëcar ngan dits ngi ka wina iink.

² Undo wul, ka wun uwar leentsaa tsi uleka bajon.

³ Uwak, wi ngë meena wun uci përim Nasien-batsi leempëna pun ngëmundu. Unk, ko u wina wi pënënatsi tsi ko un yëlan wi pëwina iink.

⁴ Uwak, wi Abel wëlëna wun Nasien-batsi bëjakan ban pe bi bi Kain. Undo wul a na jaka aci namabal, uwal wi Nasien-batsi ñakan wunk uwar tsi uleka ngi nul Abel wël ngi. A uwak ka wun na wama ka ñakan, ŋal bi na cäts bi.

⁵ Uwak, ka wun Enok wajaa, pa na rits par-na pëcäts; a winaatsa, par Nasien-batsi awajul. Ka ruka ka wajaa, a u jaka, Nasien-batsi alílandërul.

⁶ Ucits ba tsi uwak, kaats bi Nasien-batsi kë lílandër bi ñaan. Par, ni ka woki Nasien-batsi aka pë wak Nasien-batsi ci, a na ciind naluk ban tsu biki ibats tsi pëtsasul.

⁷ Uwak tsu wun Noe, uwal wi Nasien-batsi car wi aleentsul uleka nga netse ngi winaa, a na lënk Nasien-batsi, a na leemp bëntsian pa pëbueran bañaan katoul. Uwakul wi na lacanaan wun bañaan umundu, a na ruka ci narukanda bëmabal, bul bi ñaan kë kaana bi tsi uwak.

⁸ Uwak tsu wun Abraam, uwal wi na rua wi pa na tsëp tsëko tsi nu yank tsi, tsë ci bërukandaul, a na niiran a na tsëp, ŋal bi na meets bi tsi nu ya tsi.

⁹ Uwak tsuul wun a na ciina di kandeer ka watsana ki, pi kandeer katsooŋ. A nuu ciina di ngënkundan, ni Isaak ni Jakob, bukul ban bofara biki ni nul pëci barukanda uwatsan umënts wun.

¹⁰ Par, aro ka lip këlip përaasa pan ka pi iujuundi, a Nasien-batsi ci-un na n jaaki bi pu ci bi, a na ciind na leempi pul.

¹¹ Undo uwak ka wun Saara yank pëyëlan pëci nambukari, ŋal bi ngëwaanul par bi; par awejats aja, na watsanuli aci namob-tsi-përim.

¹² Unk, tsi niints naloole baŋ, nanduka ink a cäts ba, a bañaan bëka, bu cum unk pi ngëpesaj batsi; a bë yëlanaatsa pëpinaa, pi pëyii tsi kambaŋ bërëk.

¹³ Bamënts biki bëlieng bë cätsand uwak, te bë yankats nga watsana ngi; bu win këwin ngul alawan, a ba leena ngul. A ba leents koon ba ci batsooŋ, ni bapar-këpar, tsi umundu.

¹⁴ Ban ci biki tsi pëja ngëmënts ngun, bu piban ne, bë ci tsi pëtsas ucaak un ci wi wiic bukul.

¹⁵ A uci ba ron unk ci tsi pëwejats ucaak wi ba pënëna wi, din bu ka ro jalara pëwitsa rul.

¹⁶ Maa, bu lofëntsar ucaak un pe wi pëwara, un ci wi, wi batsi. Wul ka wun Nasien-batsi kawaatsa pëjaka Nasien-batsi bukul, par ayecis bukul përaasa.

¹⁷ Uwak, wi Abraam wëlëna wun Isaak na ci bëjakan, uwal wi Nasien-batsi teenamanul wunk. Nul na yanki ngëwatsan, aruka ro ci tsi pëwël abukul naloole baŋ na ci bëjakan,

¹⁸ ŋal bi Nasien-batsi jaul bi: “Tsi Isaak tsi kajëru kë ruuna tsun.”

¹⁹ Abraam awejats aja, Nasien-batsi ayëlan, ŋal ñaan nan cätsi, në tsuul na natsee tsi bacäts. A Isaak kakanaa awëlaul, apëni di pëcäts: Tsi uñakandar, aci ko un piban wi ko wi kan ci wi.

²⁰ Uwak buts, wi Isaak ja na wun ngëwar pa Jakob ni Esau, tsi uleka ngi kan baandi ngi.

²¹ Uwak tsu wun Jakob, ucatsul a na ja ngëwar pa kara ñaan tsi babuk Juse, bayënts; a na mobara bujul pëndogul a nuu bëndan Nasien-batsi.

²² Uwak tsu wun Juse, a uwokan pë ba ubiiraul a na leents babuk Israel kë pën tsi Ejipët, a na ruk përim tsi uleka imuaul.

²³ Uwak tsu wun a Moises, uwal wi na bëka wi, a bábukul bekul aro këlí këwaants; par bu win napäts ci nawar nan, a bu lalats utsua wi nasien tsu wi.

²⁴ Uwak tsu wun Moises, uwal wi na ruka wi jëŋ, a na pok puu jaka, Abuk abuk Farao, ŋaats.

²⁵ Arat përolaa ko u waraatsa wi ni bañaan Nasien-batsi, tsi pëjaa afets ulílar ujuban tsi uwal un dunkët wi.

²⁶ Awin ne, pëkawërana tsi undo Këristu, aka bëkat apean bëka Ejipët; par ajutsan këkësul tsi bëluk, tsi bërun.

²⁷ Uwak tsu wun, a na pën tsi Ejipët, te lalats uriab nasien; par aliincandar, pi aci tsi pëwin nan dits unk ka wina.

²⁸ Uwak tsu wun, a na ro Ufesta-pëbuer, ni kagur pëñaak tsi ilëman ito, pa uwaanju Ucok tsë kërara kara bajan bañaan Israel.

²⁹ Uwak tsu wun a bañaan Israel yandaar apar tsi Bërëk Bëjankal bun, pi tsi kankay. Maa uwal wi bañaan Ejipët teenaman wi përo unk, a ba yoora.

³⁰ Uwak tsu wun, a ilënk in fay yi përaasa Jeriko yër uwal wi bañaan Israel ba wi përo ngënu paaj ni ulon tsi puu fayësa yul.

³¹ Uwak tsu wun a Raab, nul natúk-ufuts, fiŋaatsa, uwal wi baroots ko un jaka wi kë fiŋaa wi. Par bajuunkats, awelan bukul ni pëfac.

³² A má n ja we kak? Uwal di ka kësin pëleents uleka Gedeon, Barak, Samson, Jefëte, Dawid, Samuel, ni bayëlia.

³³ Bukul, bu kamanaan uwak a ba yank msien, ba tsu bëmabal a buu rolaa, ba yank nga watsana ngi, a ba ruman ngëlioŋ itum,

³⁴ a ba jimb uyëlan bërua, a ba buer tsi pëcäts ulaac, ba pën tsi bërafal a ba ruka ci ni pëyëlan; a ba ruka ci baliincal tsi ukam, bu ruak impañ-basondaari, itsooŋ.

³⁵ Bakaats akakana bayiic bukul ban cats biki a ba natsee di pëcäts. Maa balon apikaara te a ba cäts, bu niiraants pëfacana. Unk, pa bu ka band tsi kanatsee-di-pëcäts kan pe ki pëwara.

³⁶ A balon kak, bu par-na puu jiaa, ni puu kobaa ilumbaj. A balon buts par-na pëtanaa mkorente bu ka gutsa di ukalabus.

³⁷ Aka ban tapaa biki ilaak te a ba cäts, ni ban falaa biki ngëliaf tsi umetaari, ni ban fiŋënaa biki ulaac. Bë ruka ro ka yandaar unk, bë tiema iŋi in ci yi injand ngënkaanel, ni yi ngëpi. Bë ci ni bëranj, bë noor-noorana, bë tsija ka tsija ka waraatsa ki –

³⁸ bukul biki umundu tsënkaants wi pëjaa aka bukul! Bu ruka ro ka faya-faya unk di ngëlaalats, ngëntunda, iwang, iyar tsi utsia.

³⁹ Bamënts bukun bëlieng, uwar ajaka tsi uleka bukul, undo uwak; maa bë yankats ko u watsana wi.

⁴⁰ Par, Nasien-batsi akaar nja ko un pe wi pëwara, pa ba rits bandan pëba pëci bawar, ucits ba ni inja.