BAYEBËREU 10 - KARÚK-PËRIM KAWALU Nouveau Testament

¹ Par, Ulua-Moises aci këci ulimënts ngëwar ngi kan bi ngi – cits koon këci bënaam ngan ci ngi. Wul ka wun, yaas u yëlan pëtsu babi pëbëndan bu ka ba pëci bawar, bi bu kë par-na bunk ijakan iloole imënts yun, yul in kandolaa yi kara uwaanu, te di ka ba puu kakalësa.

² Uci u ro yëlan, ijakan imënts yun bitse iink ka wëtana përolaa-a? Par babëndan, bu bi ka ro jëntsana uyaas uloole baŋ, din bu katse ka ro te ume-kabats bukul lacan bukul tsi undo ngëjuban.

³ Maa ijakan imënts yun, aci pëlesëna ngëjuban, kara uwaanu.

⁴ Par, kaats bi pëñaak ngëyët-ngëkas, ni pi ngëruekas, kë pënan bi ngëjuban.

⁵ Wul ka wun, uniaji Këristu tsi umundu, a na ja: “M ŋalats nin bëjakan, nin bëtseend, maa m yecisn uliaf.

⁶ Ngëncaam ngan tëra ngi tsi bëgij ajakana, ni ijakan ijakandara yi pëjampësa ngëjuban, lílatsu.

⁷ Din, a n ja: Teenan-e, nji nuu ni! Par apicana tsi uleka nji, tsi ka n jand ulibëru ulua-Moises, aja: ‘Man bi përo uŋalu, Nasien-batsi!’”

⁸ Aja bërun: “Ijakan, ni ngëko-bëtseend, ni ngëncaam ngan tëra ngi tsi bëgij ajakana, ni ijakan pëjampësa ngëjuban, m ŋalats, lílatsu.” Te aci aatsum ulua-Moises tsu wun ngul pa nga rolaa.

⁹ A na ru ja: “Teenan-e, nji nuu ni! Man bi përo uŋalu.” Unk, agar ucak wun, pëtsu ucints.

¹⁰ Aci tsi uŋal umënts wun tsi ngë yëmanaana tsun, tsi bëjakan uliaf Yeesu Këristu uyaas uloole baŋ.

¹¹ Kara najakan, unu un ci wi-ba këci, në nats na ci tsi përo ngi na ka ngi përo. Aja na roon nuu ro ijakan iloole imënts yun, yul in yëlanats yi pëpënan ngëjuban, yaas.

¹² Maa Yeesu, aro bëjakan bëloole baŋ, tsi uleka ngëjuban, pa ngëwal bëlieng, a na tsoar tsi kariir Nasien-batsi.

¹³ Ki uwal umënts wun, a na ci tsi pëlip bañaasul ba ruka ci tsëpafëni iyotsul.

¹⁴ Par, ni bëjakan bëloole baŋ, atsu ba yëmana biki a ba ci ban ba biki pëci bawar, pa ngëwal bëlieng.

¹⁵ Uwejats-ujënts buts, aleents nja uleka ko umënts wun. Par wul aja bërun:

¹⁶ “Ajug aja: ‘Karo-pëloole ki n du n do ki ni bukul upar ngënu ngëmënts ngun, ci kun ki: Mán tsu ngëlua nji tsi ngëwaas bukul, ka pican ngul tsi ngëwejats bukul.’”

¹⁷ A u jaand: “Nji n katse ka les koon këles ngëjuban bukul, ni ngëko-kamabats ngi ba ro ngi.”

¹⁸ Unk, tsi pëjampësaa ngëjuban ci tsi ba këci, bëjakan tsi uleka ujuban katse ci.

Pëfiaar, ni pëtambandar tsi uwak

¹⁹ Bi u ci bank, ind batsaar ni nji, pëñaak Yeesu ka pun ngë ka bëyeentsal pa pëniaj Tsëko tsan pe tsi pëci tsëyëman.

²⁰ Awaants nja bëga bëwalu ban tsijand bi ubiira, apar-na uridu, wul un ci wi uliaful.

²¹ A bi ngë ka bink najakan nawiak tsi kato Nasien-batsi,

²² nda ju ngë wok Nasien-batsi ni uwaas un ci wi ucär, ni tsi kacum uwak, a ngëwaas jëntsana ume-kabats un tsij wi ko u waraatsa wi, a ngëliaf ñawaa ni mlik mjëntsal.

²³ Nda ju ngë mob ngë liincandar tsi pëñakan uleka uwats, te ngë rits tankëlan; par na watsani, aci na njai na roon në mob tsi përim.

²⁴ A nda ju ngë teelar pa puu liinc-liincandar ngëwaas tsi bëŋal, ni tsi përo ngëwar.

²⁵ Nja tsë wëtan puu júk, bi balon wakëtsa bi përo; maa nda ju ngë liinc-liincandar ngëwaas, par ind win bukunk Unu kë wokani.

²⁶ Par uci nja ŋal bukun, a ngë ci tsi puu juban, te a ngë me aatsum ucär, nin bëjakan pëpënan ngëjuban katse ci.

²⁷ Maa aruka cnja pëci ni bëlal bëwiak tsi pëlip kawata-pëleents, ni bërua bi ka natsee bi ni uyëlan bu ba ni barika-ro ko wi Nasien-batsi ja wi.

²⁸ Nandoi ba këro ko wi ulua-Moises pok wi, a batëb oo bawaants ba maatir biki leents, në fiŋaa, pëjampësa cits.

²⁹ Nda wejatsari-e! Nan poos-poosani Abuk Nasien-batsi, nan tsui pëñaak karo-pëloole pi ko utsopal, te tsi pul tsi na ro tsun yëmana, a nee kar Uwejats, wi bëtseend, uwom unoor un pe pëjuats ka kakanaul wun?

³⁰ Par, ngë me na njai: “Kalukan-pëkaw aci kamiñ; nji ka n luk un.” A na ja kak: “Ajug ka wat bañaanul pëleents.”

³¹ Pëyër tsi iñan Nasien-batsi nayësal, aci ko u lënkan wi!

³² Nda lesan-e ngënu ngëcäk ngun, uwal wi nda ru ba unk pëyank ufac, din a nda kaman ukam uwiak, un tsijand wi unoor:

³³ aja bëlon bëyaas, tsi bërun bañaan nduu karaa, nduu noor-noorana; a aja bëlon bëyaas, ndë ruka bofandar ni ban ci biki tsi përola unk.

³⁴ Par, unoor barica are ind; a te nda niiran ni ulílan pëcaa ngëko ind, par nda me nda ka bërier ind bëka ban pe bi pëci bëwar, a buu jon.

³⁵ Bi u ci bank, ind tsë wëtan ko wi nda fiaar wi; wul aci bëluk bëwiak.

³⁶ Nda fier pëtambandar, pa uwal wi nda ro wi uŋal Nasien-batsi, ndë yank ko u watsana wunk.

³⁷ Par, Bëpican aja: “Awama ruka ko uties, uwal uties mak, din ni kan bii ka bi, di ka faatsani.

³⁸ A namabal nji tsi uwak ka kaana ubiira. Maa uci na fats ufets, uwaas nji cits tsi pëlilandërul.”

³⁹ Maa n ja, ngë bofats tsi kafats ufets pa pëniam, maa ngë bof tsi uwak pa ngëwaas buer.