BAYEBËREU 1 - KARÚK-PËRIM KAWALU Nouveau Testament

Nasien-batsi añakanaan nja tsi Këristu

¹ Tsi uwal ujon, tsi ngëyaas ngëcumal ni tsi ngëkoraar ngëcumal, Nasien-batsi añakan ni basin nja aparanaan tsi bayëlia.

² Maa tsi ngënu ngëtuami ngi, añakanaan ni nja aparanaan tsi Abuk; nul ni na tsu un pëci narukanda ngëko bëlieng, a nul ni na leempëna un ngëmundu.

³ Abuk ci-un ufietsar përëmb Nasien-batsi, ni bënaam Nasien-batsi bi ba ci bi ja. A nul tsijëna un ngëko bëlieng tsi përim uyëlanul. Uwal wi na ba wi mjëntsandar tsi uleka ngëjuban nja a na tsoar tsi kariir Kanpe-përëmbana, di ruets.

⁴ A na ruka pe ngëwaanju mak, a katim ki na yank ki pe itim ngul.

Abuk Nasien-batsi ape ngëwaanju

⁵ Par uwom tsi ngëwaanju, wi Nasien-batsi ja wun ba: “Wi, m ci Abuk nji; nji, ntsari man buku.” A uwom kak wi na ja wun ba: “Nji, mán ci këci Asinu; a wi m ci këci Abuk nji.”

⁶ Maa, uwal wi Nasien-batsi tsiji wi Bajan tsi umundu, a na ja: “Ngëwaanju Nasien-batsi bëlieng, nga jintëlaanul.”

⁷ Tsi uleka ngëwaanju, aja: “Naro ngëwaanjuul pëci ngëwejats, naro baleemparul pëci indiamënt bërua.”

⁸ Maa tsi uleka Abuk, aja: “Nasien-batsi! Pëtsoariu pi pësien ka ci pa sandëndën; a pëndog bëmabal ci pun pëndog pësienu.

⁹ M ŋal bëmabal, a m ñaas kamabats. Wul ka wun, wi, Nasien-batsi, Nasien-batsiu atulariu mkër ulílan, m pean bacintsu.”

¹⁰ A na ja kak: “Wi Ajug, tsi ujuundi, m leemp utsia. Batsi aci uleemp iñanu.

¹¹ Ngul ka niaman; maa wi, m ci tsi puu ci. Ngul ka tsaf bëlieng pi kaŋí-bëtiem.

¹² Kë buats ngul pi kapantu, ngë tsëtsëlana pi kaŋí-bëtiem. Maa wi, m ci bi m ci bi, a ngëwaanuu di ka ba.”

¹³ A uwom tsi ngëwaanju, wi Nasien-batsi ja wun ba: “Tsoaran tsi kariir nji, aa ka tsu babëru ba ci tsëpafëni iyotsu.”

¹⁴ Ngëwaanju bëlieng cits ink ngëwejats ngan ci ngi tsi uleemp-a? Nga yëlee ngi pa puu tsënk biki ka yank biki pëbuer.