2 TIMOTEU 4 - KARÚK-PËRIM KAWALU Nouveau Testament

¹ +-Nji n leentsu ank, tsi bërun -+Nasien-batsi ni Këristu Yeesu nul nan kai pëwat bayësal pëleents, në watand bacäts pëleents, nji n leentsu ank tsi undo upibandariul, ni tsi undo pësienul:

² Leentsan përim Nasien-batsi; uwal wara oo u waraatsa ank, moban tsi puu leents pul. Pibani un cits wi ucär, leentsari nan kai pëleentsara, liinc-liincani ngëwaas bañaan; kuu ro ank ni umiira bëlieng, kuu jukanaand.

³ Par, uwal ka ci a u baandi, wi bañaan katse wi ka niiran bëjukan bëwar, maa bu koo ro ngi ba ŋal ngi, bu kë cum mak bajukan, biki koo nja biki bukul ngëko ngi ka com ngi bukul ibats.

⁴ Bu ka pënan ibats bukul tsi pëcikëndën ucär, din bu ka tsu yul tsi itëtan.

⁵ Maa wi, moban beenu tsi ko un ci wi-ba këci, miiraan tsi unoor, leempan uleemp naleents Upetsan-uwar, leempan bëlieng uleemp wi m duuree wi.

Pol aleents uleka pëcätsul

⁶ Par, pëñaak nji tula pink ba, pi uncaam bëjakan. Uwal nji wi përëta n tsëp aband.

⁷ Man kaman ukam u wara wi, man túk aa n ba pëtúk, man mob tsi uwak.

⁸ Inkri, ucape-pësien wi bëmabal ayecisa pa nji, un ci wi, uluumpan undo ubiira ujëntsal: Ajug, nul nan ci nawat-pëleents namabal, ka wëlin wul tsi Unu umënts wan. A te cits nji rin ka wëla un, maa ba ŋal biki a bu kë lip ubaandariul, bukul bëlieng bu ka wëla wul.

⁹ Doan uyëlan kë pëni baandi tsi nji, tsi ko un pe wi pëcar;

¹⁰ par Demas afatsin ufets, uleka aŋal umundu untsari; apën atsëp Tesalonika, a Këreskes tsëp Galaasia, a Tiitu tsëp Dalmaasia;

¹¹ Lúkas koorul ci-un ni nji. Pënandi Marku, par ka kaarin bëkat tsi uleemp.

¹² Tiikiku, ma yëlul Efeesu.

¹³ Ubiu, kë tsiji kapantu ki n duki ki di Troas, di kato Karpus; tsijandi ngëlibëru, andes ngan leempëna ngunk ni itël.

¹⁴ Aleksandër, natsakaj, arolin mak ngëko-kawaraatsa; Ajug ka kakanul ngi na ro ngi.

¹⁵ Wi buts, randanul, par anatsara mak bëjukan inja.

¹⁶ Bëyaas bëcak, bi n nats bi pëpok ko wi n tsupara wi, ñaan tsënkatsin, bë bërin bëlieng. Wul tsë kakanaa bukul.

¹⁷ Ajug tsënkin un, a na wëlin uyëlan, pa n leents përimul bëlieng, pa ban cits biki Bajudeu bëlieng ka te pul. A n pënanee di mtum ulioŋ.

¹⁸ Ajug ka pënanin tsi ko un ci wi-ba këci u waraatsa wi, në bueranin pa pësienul pi batsi. Përëmb pa ciin pa nul, pa sandëndën. Ameen!

Kawël-mboos katuamë-ni

¹⁹ Wëlarin Priska ni Akiilas mboos, ni bañaan kato Onesiforu.

²⁰ Eraastu arukee di Korintu. Man duki Troofimu di Mileetu, amaak.

²¹ Doan uyëlan kë pëni baandi, tsini uwal ujoonts. Ebulus, ni Pudes, ni Liinus, ni Këlaudia, ni batsaar ni nja bëlieng, bu wëliu mboos.

²² Ajug na ciin ni uwejatsu. Bëtseend ba ciin ni ind.